Selasa, 18 November 2014

JANGKA & TINJAU 1JAKU 1IBAN 1SARAWAK 1MALAYSIA 1DUNYA?

Lebuh ngenang kini ke penunga sereta tuju jaku Iban kitai tu dudi hari aku tusah amat ati berunding, nama kebuah pia?  Kati enda dih?  Ulih ka enda kitai ngadaka generasyen rebak diatu enggau rebak dudi ngena jaku Iban standard baka ke dikena belajar di sekula kemaya hari tu?
Lebuh aku berandau enggau sekeda orang ke ukai pengajar di luar sekula, mayuh amat penemu ti enggai amat didinga pending senentang tuju, kuing sereta penunga jaku Iban kitai tu jemah ila.  Sekeda ari penemu sida nya madahka nadai guna kitai ngajar jaku Iban di sekula laban ba runding sida baka tu; “ Uji nuan berunding, jaku nama ti dikena orang bekomunikasyen di luar sekula diatu? Bisi kitai ngena jaku Iban lebuh betemu enggau bansa bukai baka bansa Cina, Melayu, Dayak bukai? Tentu nadai, sekeda kitai Iban bejaku di nengeri, pasar, opis enggau dini-dini endur endang enda ngena jaku kitai Iban taja bisi kitai Iban dia?  Enti siku bansa bukai dia enggau tiga empat iku Iban, jaku ke suah agi dikena kitai nya tentu jaku bansa bukai chunto iya jaku Melayu. Suah agi kitai ninga sida bejaku Melayu Sarawak  tauka jaku Bahasa Malaysia tauka jaku ribai. Nya bepanggai ba sosial sida ke berandau nya.  Enti ba situasyen enda formal sida suah agi bejaku champur (rojak).  Sekejap jaku English + Iban + Melayu + jaku ti digaga sida empu (raban sida aja nemu). Enti ba situasyen formal baka ba opis kompeni enggau bejaku maya bekereja kitai suah agi ninga endang English ti dikena. Nadai sida ngena jaku Iban.  Ni enda bala nembiak ke diajr kita di sekula enda rindu belajarka jaku Iban?”  nya pejah penemu siku orang ti gawa ba kompeni ti berandau enggau aku.
“Amat nya , “ ku aku.
“Nama tuju kita ngajar nembiak jaku Iban,” ku iya.
Berunding baru aku baka ni deka nyaut;  “Kami di sekula endang bisi tuju ngajar nembiak sekula, keterubah, ambika waris pesaka bansa iya nya jaku kitai tu enda lenyau ditelan arus pemansang dunya, kedua, enti enda kitai Iban ke ngetanka jaku kitai tu sapa dih?  Nadai bansa bukai ti deka ngetanka bansa bukai?” ku aku.  Tambah aku baru; “Bisi ga kitai Iban ti udah mansang, idup ba ekonomi ari jaku Iban chunto iya bala penyanyi Iban baka sida Jenny Tan, Andrewson Ngalai, Ricky El enggau sida bukai. Nya siti ari nilai komersil jaku Iban.  Bisi mega sida penulis kitai Iban ngaga majalah, bup enggau video(vcd) ngena jaku Iban.  Ulih ga sida tu bulih penguntung ari jaku Iban taja pan semina ba Sarawak.  Nemu aku pasar ekonomi jaku kitai tu mit enda baka jaku Melayu, Cina enggau English tang nya pan pama mih kena kitai ngemujurka diri ba dagang,” ku aku.
“Enti kitai minta pengawa udah tembu sekula tauka universiti maya interbieu diatu semua ngena English?” ku pejah penemu iya.
Nemu aku pengamat penemu iya nya, tang ukai reti aku setuju. Pengeransing aku ngajar sereta ngemajuka jaku Iban endang enda padam ketegal pejah penemu baka nya.  Semimit nadai mih penemu nya nasalka pengeransing aku ngajar jaku Iban.
Kala mega aku ninga siku ini orang ti ngasuh uchu iya bejaku ngena jaku bansa bukai baka Melayu, English tauka Cina ambika orang enda ngelala nama bansa uchu iya.  Betul endar mega uchu iya enda belajarka jaku Iban di sekula laban ti disekulaka apai indai iya ba sekula Cina.  Enti baka nya nama penyadi jaku bansa Iban dih?  Ini orang nya udah enda sanggup ngasuh uchu iya ngayanka identiti Iban, anang ka ngasuh belajarka jaku Iban tauka main asal Iban tang ngasuh uchu iya muai identiti diri!?.
Ba runding aku, nadai salah kitai nganjung anak kitai ba sekula Cina, Melayu, English, Tamil enggau ti bukai tang anang ngasuh anak uchu kitai muai identiti bansa diri.  Mayuh agi jaku ditemu anak uchu kitai, nya manah agi tang anang mih ketegal deka ngayanka diri nemu jaku orang, jaku diri enda dipelajarka.
Penujung penemu, ni mih maya jaku Iban ulih nyadi jaku ti dikena kitai nyadi jaku Iban standard ti dikena sebaka di serata menua kitai Malaysia tu.  Agi bisi ga sekeda kitai Iban ti ngumbai jaku sida enda dikena ba jaku Iban standard.  Ketegal sebut di pelilih menua diri ti bisi lain ari sepil ba atur sepil di sekula sida ngumbai jaku sida enda dikena ba sekula.  Kebendar iya enti kitai semua udah belajar ari mit jaku Iban di sekula enggau macha bup ti ngena jaku Iban standard sereta ngena sepil ti betul, kitai badu agi nyebut jaku Iban enggau entak sebut ari pelilih menua diri empu.  Automatik jaku ti pansut ari mulut kitai nya udah nitihka sepil ukai nitihka sebut asal pelilih menua diri. Ambika banding,  jaku Melayu pan bisi slang ari menua diri baka Melayu Kelantan, Terengganu, Johor endang enda sebaka,  baka nya mega jaku Iban bisi penyelai mih mimit entara pelilih menua diri, tang lebuh sida ngena jaku Bahasa Melayu ti dikena ba Malaysia slang nya tau lenyau kediri empu, kelebih agi ba situasyen formal.  Nya alai nya mih tuju jaku Iban diajar di sekula kena nyemakaka jaku Iban ti dikena kitai di Malaysia tu sebaka, nadai siku orang ti ngumbai diri Iban enda meretika utai disebut Iban bukai taja pan sida nya orang Lundu, Kuching, Betong, Sibu, Miri nyentukka Limbang tauka Lawas.
Simpul penemu, kena mih jaku Iban standard baka ke dikena ba sepil ti diajar di sekula ambika jaku Iban ila tau nyadi 1Jaku, 1Iban, 1Sarawak, 1Malaysia enggau 1Dunya.

Khamis, 11 September 2014

Keretas Peresa Sains UPSR 2014 Buchur

Buchur tu jaku ti diinjau aku ari jaku Melayu bocor. Ba penemu aku, enda salah kitai ngena leka jaku nya laban aku enda tetemuka leka jaku ti engkeman agi kena ngalihka reti bocor dalam jaku kitai Iban.

Nama kebuah pekara tu nyadi? Kati alai pekara baka tu tau nyadi ba Sistem Pelajar Menua kitai Malaysia? Mayuh kitai ti bisi besangkut paut enggau sistem pelajar menua tu sama bela enggau aku berundingka pekara tu. Chunto iya, nembiak, apai indai, pengajar, pengelicha,  pengereja pengawa perintah ti besangkut paut enggau opis pelajar, enggau menteri pelajar. Makin mayuh kitai berunding makin mayuh ga saut ti ukai saut ti datai engkabit ba runding kitai. Reti nya saut ukai saut tang saut nyau nyadi tanya baru ti nanya kitai empu nama kebuah utai tu tau nyadi. Sapa ti patut dipesalahka kitai ba pekara ti baka tu?

Keterubah, nembiak.  Patutka enda kitai nyalah nembiak. Bisi ga biuh runding aku nyalah nembiak.  Nama kebuah baka nya? Ba penemu aku, enti nembiak semua pandai magang enda patut sida beambi ulih enggau orang bukai ti enda beradat nya nerima tanya ti buchur nya lalu nyaut tanya nya enggau ati gaga.  Enti nembiak enda nemu keretas ti diberi ngagai sida nya keretas tanya ke buchur sebedau peresa nya engka nya ukai salah nembiak. Salah sapa? "Salah aku" ku Ibau ba lagu iya. Sanggup kita ngaku penyalah diri baka Ibau. Kala kita ninga penchuri ngaku diri ngenchuri?  Kala kita ninga orang ke majau indu ngaku diri majau? Sapa sanggup ngaku penyalah diri? Nyangka tanya tu ulih disaut enti nuan datai ba rumah sembiang baka gerija kini? Ngampun penyalah diri ba mua Petara?

Kedua, enti tu pengawa bala pengajar? Lapa bisi pengajar kempang ati ngaga ulah tu dih?  Sida ti ngereja penyalah tu tentu deka nyalah orang bukai mega, iya nya orang ti bisi besangkut paut enggau sistem pelajar? Mayuh orang kena pangki penyalah tu enti kitai ninga ari sukut runding bala pengajar.  Tentu pengajar ke ngaga pekara tu deka bulih penguntungka diri empu, deka nguntungka sekula, opis pelajar pelilih menua, opis pelajar menua enggau mayuh agi.  Ba penemu aku ti sama pengajar, enti  pengajar ke muchurka keretas peresa tu, ketegal mayuh amat penanggul tauka kebuah: 

Keterubah, pengajar munyi ku aku ari pun tadi tentu diansak kepala pengajar iya ngajar bebendar awakka bulih pemutus peresa ti manah sereta lati ari taun ke udah.  Kepala pengajar diansak opis pelajar pelilih menua. Opis pelajar pelilih menua tentu diansak opis pelajar menua.  Opis pelajar menua tentu diansak Opis Menteri Pelajar Menua (KPM).  KPM tentu diansak Menteri Pelajar. Nyau baka lagu Bangau oh Bangau.  Siku nyalahka siku. Ujung-ujung nadai pengujug cherita tu.  Taun baru agi ga pekara tu nyadi.

Nangkan nya, pengajar ti ngambi jalai muntang deka bulih pemutus peresa ti manah ari taun ti udah.  Pengajar ti baka tu ba penemu aku iya nya pengajar ti enda ngajar enggau manah di sekula.  Sida deka ngena chara muntang bulih pemutus peresa ti tinggi ari sekula bukai ambika bulih rita, puji enggau insentif mengal mit ari perintah.  Sekeda penemu ti baka tu ti muntanka tuju pelajar ke bendar baka ke bisi dalam Falsafah Pendidikan Kebangsaan(FPM).  Tuju pelajar sekula ke bendar dalam FPM iya nya ngasilka nembiak ti setimbang ari segi JERI, iya nya ari segi selangkuh tubuh, emosyen, rohani enggau intelek.  Peresa UPSR tu semina ulih nisih nembiak ari segi intelek aja lalu ukai semua segi.  Kati alai pengajar sanggup meda nembiak iya semina manah pemutus peresa tang enda setimbang ba segi bukai?

Nambahka nya, pengawa ke baka tu endang enda nyereminka pengajar tu siku ari mensia ke bisi integriti.  Semua pengereja pengawa perintah di menua tu endang bisi diberi kus integriti setiap taun.  Kati sida enda nemu reti integriti lebuh ngereja pengawa tu?  Tau amat sida ke ngereja pengawa tu lari ari tanggung pengawa diri ti nempa, ngasilka nembiak ti lati ba semua segi. Enda berunding sida tu pengawa sida nya endang nadai ngenataika penguntung? Nama penguntung kitai muchurka keretas peresa?  Ba penemu aku, nadai?  Kitai ti ngereja pengawa tu semina meri pemutus peresa ti pelesu (palsu) ngagai nembiak kitai. Pengarap kitai meda sida bulih A besai tang udah nya enti dipilih masuk ke sekula sekondari bisi ke enda nemu macha.  Ambika banding, ba sekula MRSM di pelilih menua kitai ditu bisi nembiak ke masuk dia ditemu enda tentu nemu macha. Nama reti A ulih iya nya dih? Bisi penguntung?  Enda malu kitai ti ngajar ba sekula nya dikejakuka orang ngasilka nembiak ti enda nemu macha taja bulih A ba semua mata pelajar ba tikas UPSR?

Kelimpah ari nya, lebuh bekenangka pekara tu, ba penemu aku, sekeda sida ke ngereja penyalah tu endang orang ke teleba ngereja penyalah dalam pengidup iya. Iya ukai semina nipu ba pekara tu aja tang nipu mega kala nipu ba pekara bukai baka nipu ruang bilik diri, nipu anak bini, nipu kaban belayan enggau orang bukai mega.  Nipu orang tu endang ukai pengawa ti tau dikereja enda milih nuan nya bisi pengarap baka pengarap Kristian, Islam, Buddha, Hindu enggau pengarap bukai. Nadai ajar Petara kitai di dunya tu ngemendarka pengawa nipu orang.

Kepenudi iya, orang ti bisi besangkut paut enggau pengawa besekula? Aku endang ngembuan penemu ke muntang agi enti sema kitai deka bulih pemandai tauka meda anak kitai tauka nembiak kitai pandai, kitai mesti belajar, ngajar anak enggau nembiak kitai enggau naka ulih, ukai ngena jalai nipu ti mai pengerusak ke semua kitai.  Anang beambi ulih meda sekeda pekara ti muntang ulih diakal kitai endur kitai ngereja penyalah baka tu. Ngagai opis Lembaga Peperiksaan Malaysia arapka kita merati sereta meretika nama kebuah utai tu tau nyadi.  Anang nyadika pekara baka tu tau ngemuntan sistem peresa pelajar menua kitai.  Nya alai arapka orang ti bekuasa ulih nasat sereta mansik sapa, nama kebuah sida ngereja pengawa tu enggau baka ni chara mutarka pekara tu dudi hari ila.  Terima kasih.


Sabtu, 19 Oktober 2013

PROGRAM MUHIBAH GURU DAN IBU BAPA & PROGRAM KHIDMAT BAKTI WARGA EMAS

BETONG-Sekula SMK Datuk Patinggi deka ngaga Program Begulai Sejalai Pengajar enggau Apai Indai sereta diserimbai enggau Program Meri Tulung Ngagai Orang Tuai ba RH. Mau. Enteban Ulu Skrang kena 26 Oktober 2013 tu ila.  Berita pasal atur enggau pengerami din ila aku deka mantaika ngagai kitai semua.


Banner ti deka digantung ba Enteban ulu tu ila.

Sabtu, 28 September 2013

MAJLIS SERAH ILMU PMR 2013

27 SEPT: BETONG - Unit Bimbingan & Kaunseling sekula SMK Datuk Patinggi Kedit udah mujur ngatur Majlis Serah Ilmu ke nembiak ke deka ngambi peresa PMR 3013 iya nya PMR ke penudi ba sistem pelajar menua kitai Malaysia. Pengawa baka tu udah kala diatur berengkah ari beberapa taun ti udah. Tuju program tu awakka nembiak ke deka ngambi peresa PMR besedia ari segi mental enggau emosyen.

Nyadi di baruh tu disanggitka sekeda gambar ti sempat diambi maya nya.
PRS baru tembu ngerijester penatai apai indai

Sempat mega begambar

Bala pengajar ke ngajar nembiak PMR

Benung mendingka Pengajar Kaunseling nerangka tuju pengajar ngajar

Bebaris minta ampun  enggau berekat ari pengajar

Sekeda apai indai nembiak pom 3

Bebaris minta ampun enggau berekat ari pengajar

Agi nganti penatai Pengetua

Bala apai indai enggau nembiak benung sabar nganti

Bala pengajar sedia betabi meri peransang ngagai  nembiak sida

Apai indai pan bebaris deka meri terima kasih ngagai bala pengajar ti ngajar anak sida




Jumaat, 27 September 2013

MALAM MESRA PIBG

 24 OKT: Betong - Sekula SMK Datuk Patinggi Kedit Betong udah mujur ngatur makai malam begulai gerempung PIBG.  Pengawa tu diatur belabuh ari pukul 7. 30 lalu tembu kira kira pukul 10. 00 malam. Lebih 50 iku apai indai bisi datai lalu nyau deka semua pengajar enggau kaki tangan sekula tu bebai diri sebilik sama bela datai ngulu pengerami tu.

Tuju pengawa tu iya nya keterubah senipak bendar kena ngisi Sarana Ibu Bapa ti bisi ba PPPM 2013 -2015 ti udah nyadi dokumen sekula kena napi pemansang pelajar sekula rebak diatu.
YDP benung mantaika jaku pengelalu
Pengawa tu digulu lima iku pengari ari opis-opis perintah ari Opis Pelajar Betong, Opis Polis Bagi Menua Betong, Opis Bomba Betong enggau Opis Pengerai Betong. Sida lima lalu dipasukka nyadi kaban komuniti. Tuju kedua makai malam begulai PIBG tu iya nya kena ngerapatka agi kaul apai indai, kaki tangan sekula, pengajar, enggau kaban komuniti.

Dalam jaku pengelalu YDP PIBG En. Jail anak Seliman, madah pengawa tu baru berengkah lalu iya gaga amat ati meda sambut apai indai manah amat ke sekali tu. Baka nya mega dalam jaku ari Tuan Pengetua Dr. Lambat anak Lindong mega madahka pengaga ati ke penatai kaban komuniti enggau apai indai malam nya.

Arapka pengawa baka tu tau diatur suah agi ba taun-taun ti deka datai.

Bala ke bisi datai

Pengetua mantaika jaku 

Kaban komuniti nerima tepa ari YDP

Kaban komuniti nerima tepa ari YDP

Kaban komuniti nerima tepa ari YDP
Kaban komuniti nerima tepa ari YDP

Mija VIP

Benung matahka lengan

Sabtu, 21 September 2013

PROGRAM MUHIBAH GURU DAN IBU BAPA (2)

21 SEPT- AUR BANGAT: 43 iku pengajar enggau kaki tangan sekula SMK. Datuk Patinggi Kedit udah mujur ngatur penemuai kena ngerapatka kaul enggau apai indai nembiak di Rh. James Deli, Aur Bangat Betong. Penemuai kami ke tu beketuaika  Tuan Pengetua Dr. Lambat ak Lindong laban YDP PIBG enda ulih enggau ketegal ti bisi pengawa bukai, kami sebala mayuh agi laban ti udah nemu tuju enggau pengerindu bejalai ke rumah panjai kelebih agi ngagai bala pengajar ari Semenanjung.  Bisi sida iya keterubah iya nemuai ke rumah panjai,. Ari perati aku nala sida rindu amat sereta gagit meda sambut bala di rumah panjai Aur. Nitihka anggur kami mupuk ari sekula 08.30 pagi lalu datai din enda sampai setengah jam nengah jalai ti udah ditar tang mayuh amat begelumbang asaika nengah rantau ai enti kitai merau. Tuju pejalai kami ke bendar endang senutuk enggau Sarana Sekolah ti ngasuh bala pengajar enda tau enda bekelala enggau apai indai nembiak ke diajar. Bisi 10 iku nembiak di rumah panjai Aur Bangat tu besekula di SMK Datuk Patinggi Kedit.

Sepengudah kami dialu niti ruai Tuai Rumah James Deli lalu mantaika jaku pengelalu ngagai bala kami.  Pengawa nangkan nya iya nya Jaku ari Tuan Pengetua kami empu Dr. Lambat.  Iya nerangka batang pejalai kami lalu minta semua pengajar bediri siku-siku lebuh nama sida disebut iya. Udah nya Pengetua ngangauka nembiak enggau apai indai sida datai ke mua awakka bekelala enggau bala pengajar ti ngajar anak sida. Bala apai indai nembiak berasai temegah ati meda pengawa nya ti tau mai kaul entara nembiak. apai indai enggau pengajar manah agi.
Sekeda gambar ti sempat diambi:
Bala temuai agi beranti ba padang Aur

Tr. James enggau sida serumah ngandak penatai kami

Pengetua, Pen. Kanan 1, Pen. Kanan Hem sempat begambar enggau Tr. James Deli

Pemakai ti disediaka Biro Wanita Rh. Panjai Aur


Bala rumah panjai ti ngulu kami

Bala pengajar baru terenah duduk

Bala pengajar ti bukai

Tr. James Deli mantaika jaku pengelalu

Pengetua mantaika jaku madahka tuju pejalai

Bala nembiak enggau apai indai dipinta datai ke mua bekelala enggau bala pengajar
Tuan Pengetua nyuaka tepa ngagai Tr. James Deli


Terima kasih ke pemanah sambut kita serumah kelebih agi ngagai Tr. James Deli empu ti udah sanggup nerima penatai kami. Terima kasih mega ngagai sida Dayun sebilik, Aki Atik (entua Pengajar Kanyan) sebilik enggau bala bukai ti enda ulih dirintaika nama ditu.

Arapka pejalai kami tu ulih mai pemanah ke kitai ke pengajar, apai indai, nembiak empu. Arapka kaul kitai makin rapat agi udah tu ila.  Terima kasih.

Jumaat, 20 September 2013

LISIN MELI BELACHAN

Bisi sekali Aya Igat(ukai nama ke bendar) benung nebas payung rumah iya. Enda mukai-mukai indai tuai iya, Ibu Endun, ngangau. Iya lalu berumban tama ke bilik lalu terus ke dapur.
"Nama nya wai?" ku Aya Igat nanya.
"Eh deka manduk rambai tu aku wai. Nemu nya tak nadai belachan dikena ngulai iya. Uji nuan nurun ke pasar kin enda lama meli belachan," ku Ibu Endun.
"Apu. Rambai enti enda dipanduk gulai belachan endang enda nyamai. Nurun aku," ku Aya Igat.
   Aya Igat lalu beguai nurun. Iya ke nurun nya semina sempat nyapai lumpit duit sereta kunchi motosikal iya. Nadai bebaju sereta enda be'helmet'. Iya ngasaika nya enda jauh ke pasar sereta enda lama tambah mega beguai.
Enda mukai-mukai ba rantau jalai nya bisi dua iku polis ke benung ngetu tisi jalai. Seduai iya meda aya Igat nya mansa enda ngena helmet lalu diketuka.
"Deka kini nuan aya. Enda bebaju enda behelmet tu?" ku siku ari polis nya tadi.
"Eh, begaut dom deka meli belachan dikena ibu de manduk rambai," ku Aya Igat nyaut.
"Eh begaut pan enggai nyadi mih enda ngena helmet aya. Salah nuan tu,"ku polis siku.
"Nya mih dom. Kelalu begaut tadi nyau enda ingat. Tambah enda lama tu dom. Semina meli belachan aja," ku Aya Igat nyaut baru.
"Ni lisin nuan aya?" ku polis nya nanya iya baru.
"Bah, enda aku nemu meli belachan diatu nyau ngena lisin mega nih," ku aya Igat.

Polis dua iku nya semina tuchum lalu ngasuh Aya Igat nya mupuk.

Sumber: engkabang.net