Rabu, 3 Mac 2010

Malin Karang PMR



Ripih Pengawa Ngaga Ai Tuak Belabuh Ari Manduk Beras Pulut Datai Ke Ai Tuak Tau Diirup
            Tuak tu beguna bendar ba bansa Iban. Semua pengerami enggau pengawa ti bekaul enggau gawai begunaka tuak magang. Enti nadai tuak, pengawa ti dikereja nya enda genap. Suah mega tuak digaga dikena nunga temuai ke bisi niki tauka bemalam ba rumah kitai ngambika temuai nya rampak sereta bagak berandau enggau kitai.
            Sebedau ngaga tuak, dulu kitai nyendiaka kereban tauka perengka ti dikena baka beras pulut, ragi tauka chiping, periuk tauka ruas, lia, tajau tauka irun, bubu tuak enggau butul tauka gilin. Enti pulut nya dipansuh, dia iya mesti direndam dulu sebedau disimpan ke dalam ruas ngambika iya dulu kembai. Udah nya baru iya dilulun ngena pengangat bara api di atas raran ti udah disediaka. Enti dipanduk ngena periuk, dia beras nya semina dikirah dulu sebedau manduk iya.
            Lebuh asi pulut nya udah mansau, dia iya lalu diulihka ari ruas tauka disungkit ari periuk sereta diaraka di atas tikai mit tauka di atas chapan ti besai ngambika asi nya chelap. Udah nya baru kitai ngeramika ragi ti udah ditutuk lumat-lumat nya ngagai atas asi pulut nya tadi. Nangkanka nya baru kitai nyimpan asi pulut ti udah dichampur ragi nya tadi ke dalam tajau tauka irun ti udah diperesi ngena ai lia. Tajau tauka irun nya tadi lalu disengkabung manah-manah ngambika iya enda ditama utai ti kamah. Tajau nya ditejuka dia kira-kira dua minggu. Enti timpuh dua minggu nya udah datai dia kitai lalu ngabas tuak ti dalam tajau nya dikena nentuka sekalika tuak nya nyadi tauka enda. Enti beram ke dalam tajau nya udah bisi ai dipeda, dia bubu tuak ke udah beresi lalu ditan dalam tajau nya ngambika nyamai endur ngauk ai tuak awakka enda bechampur enggau rampang beram. Enti beram dalam tajau nya tak lalu apin bisi ai, dia kitai deka manduk ai gula dikena manchak beram nya. Ai gula tu dibanchakka kitai lebuh iya udah mansau sereta udah chelap. Lebuh udah dibanchak, dia tajau nya tadi lalu disengkabung baru lalu ditejuka dia dalam timpuh seminggu.
            Enti timpuh seminggu udah datai, dia kitai lalu muka sengkabung benda nya lalu ngauk ai tuak ari dalam bubu tuak ti udah ditan dulu ari nya. Tuak nya lalu disimpan ke dalam butul tauka gilin ngambika nyamai ditaruh. Maya kitai deka mantaika iya, kitai semina ngambi butul tauka gilin ti udah diisi ai tuak aja dikena kitai betunga enggau pangan diri tauka enggau temuai ke bisi niki rumah kitai.
            Maya ngaga tuak tu, kitai megai penti pemali ke diturunka ari aki ini kitai kelia. Kenu ko cherita, maya kitai ngaga tuak kitai enda tau mai buah masam niki ke rumah enggaika tuak ti digaga kitai nya masam lalu enda ulih diirup. Nya alai baka nya meh gaya ripih pengawa ngaga tuak ti diketemu aku. Aku arapka kitai sama tau nguji ngaga tuak belalauka chara ti udah dirintaika aku nya tadi. Selamat nguji.

Lubuk Tau Meh Nyadi Lansar
            Ba sebuah rumah panjai bisi siku mensia ke kaya sereta angkun ke reta tengkira. Nama iya Bindang. Iya bisi bini ke bajik sereta selalu nganta baik di rumah tauka di tanah. Bini iya nya diberi nama Gendu. Seduai iya bisi siku anak lelaki ke benung ngangkatka diri bujang. Nama anak bujang seduai nya Rengayung.
            Semua pengaya di rumah panjai dikemisika sida menyanak magang. Pemakai baka padi, beras, jagung, nyeli enggau utai bukai bisi magang. Pengeraja asal baka tawak, dumbak, gong, engkerumung, tajau,bedil enggau ti bukai nyau bekelagung sebelah bilik, sebelah sadau. Baka nya mega ngepan penganta baka rawai, sugu tinggi, kain kebat, sirat, gagung tauka baju burung, lampit pirak, ringgit pirak enggau ti bukai nyau penuh jemari endur nyimpan. Pua kumbu enggau pua belantan mega penuh peti endur nyimpan. Sida menyaka chukup angkun sereta temegah ke pengaya sida sebilik. Duit ringgit mega sida menyanak mayuh, tau ke panggal sema jaku tang penyalah iya nadai disimpan ba bank tauka saham. Tak ditaruh teguh-teguh di rumah panjai.
            Sida Bindang menyanak idup midak-idak ngenatka penyamai. Tak nama macham utai dikedeka ulih beli magang laban pengaya endang bisi. Nya alai tak nama bansa utai ti deka dikereja ulih magang-magang. Tu meh maya duit enggau reta nunjukka kuasa ngagai mensia ti ngembuan iya. Nyadi sida tiga menyanak tu enda tentu tau begulai enggau orang bukai di rumah panjai nya laban sida tiga menyanak tak enda rindu sereta kepapas ke orang bukai dalam rumah panjai nya ke enda sama tikas pengidup enggau sida. Ari nya sida lalu belabuh sumbung enggau orang. Enti lebuh maya berandau tauka bekenangka macham leman utai dia sida selalu nyindir sida serumah ke merinsa pendiau sereta bemenangka pengaya diri. Nya meh ti ngasuh sida serumah nanam pemenchi ngagai sida menyanak.
Nyau kelama-lama sida ke diau ngatika diri ari orang mayuh di rumah panjai nya, dia deh anak bujang ke benama Rengayung nya lalu tepejuh jauh ke menggeri lalu begulai enggau raban ke sama tikas pendiau enggau iya. Kaul Rengayung enggau bala kaban iya nyau majak rapat-serapat, nyau baka ke enggau diri menyadi. Rengayung nyau betimbah ayah ngena duit ti diberi apai enggau indai iya ke di menua. Iya suah teparuk enggau orang ngereja pengawa ke enda manah baka bepakaika dadah, betikika kelab malam enggau karaoke enggau ngereja pengawa ke ngilah ari nya. Duit enggau reta sida menyanak pan mayuh udah dijual apai enggau indai iya dikena melanja Rengayung ke ngidupka diri di menggeri.
            Apai enggau indai iya ke di rumah pan nyau nyelai ga pengawa, udu penyabung enggau bejudi. Tak dini endur bisi nyabung endang diturunka seduai magang enda milih maya jai mimpi tauka enda. Kengka manuk ke bisi disabung magang. Kengka main ke bisi dibuka di menalan sabung dipasuk magang. Dipasang magang. Ku jaku deka nambahka pengaya tang anang ke nambah, ngasuh katan diri empu nyau turun. Nya alai tak enda berasai alai reta tengkira ke di rumah lalu dililung dikena malas tuie tauka entaruh ti dikena masang manuk. Nyau kusut bendar meh pengaya sida tiga menyanak, nyau sebaka pendiau enggau sida serumah ke bukai enti enda lebih jai agi. Tu meh ke disemaka orang tuai, “Lubuk Tau Meh Nyadi Lansar”.


 Nembuka cherita; “Aku pan lalu …………”

Aku pan lalu malik ke belakang, tang nadai mega tepedaka utai. Majak mega aku bejalai laju laju baka peluru leka senapang laban ngerumban hari ti nyau deka malam. Ati aku bisi berasai geli udah bekau ke ninga utai ke seguda nya tadi. Aku nyau udah jauh di dalam puak kampung puang nya ketegal ke udah tinggal kaban aku ke sama enggau aku mai ukui maya ngasu ngalih hari nya tadi. Raban ukui ke dibai kami tadi pan nadai didinga aku agi. Kaban ke sama enggau aku mai ukui pan nadai didinga aku. Ati aku nyau majak kesal. Aku takutka diri tesat di kampung puang nya. Suah aku nguji ngagauka orang ke sama enggau ngasu, minta anti sida tang kangau aku enda didinga sida kini.
            Nyau kelama-lama aku udah bejalai kediri dalam kampung puang nya, dia aku tetemuka ratan jalai orang tang aku enda tetemuka abi kaki kami sebuat ke ngasu. ‘Kini-kini meh tunga bala kaban aku tu ?’ tanya aku dalam ati. Aku mupuk bejalai ngiga pemansut ari kampung nya. Utai nyau majak petang dalam kampung nya laban hari enda tentu manah lemai nya. Munyi guntur bisi bekedepur didinga jauah ari endur aku nya. Puchuk kayu nya majak bekeguyat dipuputka ribut. Rangkang nyau bekesetak patah lalu labuh ke tanah. Kadang-kadang nyau deka ninggang tudah aku ke bejalai dalam kampung nya. Lama agi balat agi ga ribut nya bepuput lalu ngujungka kabut. Punggu nyau bekerentum labuh laban kabut. Ati aku majak irauka diri enda tetemuka jalai pulai.
            Ujan udah belabuh turun mesi-mesi. Aku lalu ingatka diri ti bisi mai machis sekerubung ti disimpan dalam kambut plastik. Beguai-guai tudah aku ngaduka bungkus machis nya enggaika basah digasakka ujan. Letup ngitar udah didinga ngachakka pending. Ati aku berasai takut, nyau digenggam semengat, nangika diri dipangka ngitar. Tang nasit Petara bisi nyangkung. Ujan nyau bangat-sebangat. Aku nyau melu-melu baka anak burung, basah digasakka ujan. Aku majak bejalai betudungka daun lemayung ke ulih aku mantap ba emperan ke ditengah aku bejalai. Mayuh sungai udah aku peraka, mayuh bukit udah aku teresa tang lalu enda tetemuka jalai. “Nama meh penyadi aku tu ? Tesat melelat meh aku tu ? Nama meh kaban aku tu tak enda ibuh ke aku ?” ko ati aku .
            Aku lalu niki ke bukit sigi ti enda tentu renjan. Datai ba tuchung bukit nya aku lalu niki pun kayu sekayu deka ninjau tunga menua ke endur aku. Maya tu ujan udah teduh. Aku lalu ninjau menua ari puchuk kayu nya. Ari puchuk kayu nya aku ulih meratika gaya menua ke udah ditengah aku tadi. Aku lalu manjung enggau naka penginggar, ngangauka sebarang orang ke bisi ninga. Ninga orang nadai nyaut, inggar agi mega aku manjung. Nyangka nginggar tu meh munyi panjung Antu Gerasi Papa ke ko sida niang aki menya.
            “Igat ! Igat ! Nama utai dipanjungka nuan tengah malam besut tu ? Nama mimpi nuan Igat ?” ko indai sambil ngusak-ngusak tubuh aku ke benung belungun enggau pua. Aku lalu angkat nudukka diri. “Akai rai indai. Bemimpi meh aku tu tadi. Aku bemimpi asai ke tesat dalam kampung puang maya ke enggau orang ngasu lalu enda tetemuka jalai pulai. Nya alai aku lalu niki ke puchuk kayu lalu manjung ngangauka kaban ke enggau aku ngasu. Pai deh ! Mimpi sial. Ngesalka ati aku ngapa,” ko Igat.
            “Udah meh nya Igat, besembiang nuan ngambi semengat nuan pulai,” ko indai  ngajar aku. Aku pan lalu nitihka ajar indai. Hari pan nyau tebererak tawas. Aku lalu angkat empungas mua sereta nunga indai ti benung kenuh-kenuh nyendiaka bekal aku ke deka nurun besekula pagi nya. Angka ari nya aku lalu mandi, begari sereta nengkiraka diri ke deka nurun besekula.
 


Dikarang: Pengajar Lungah ak. Jayan (x pengajar Jaku Iban Kedit)

Tiada ulasan:

Catat Ulasan