Khamis, 22 Julai 2010

DOM LEMPONG

Bisi ba menua siti iya nya menua di Batang Spinang, bisi siku nembiak ti benama Dom Lempong.  Dom Lempong tu siku nembiak ti merinsa sereta gamal iya enda menyana laban diempa kurap.  Dom Lempong tu diau kediri enggau indai iya aja laban apai iya udah lama nadai.  Iya mega jarang diau di rumah laban ti enggai dikeduan bala nembiak sida serumah dia.
            Lemai siti lebuh Dom Lempong pulai ngabas bubu iya ba sungai tisi langkau umai seduai indai iya, iya bisi tepedaka dua iku orang bujang.  Gamal dua iku orang bujang nya cukup sigat sereta kering.  Dom Lempong lalu rari tama ke dalam langkau.  Iya mega ngiling diri ngena tilam dalam langkau.  Enda lama udah nya iya ninga orang ngangau.
            “Ui..ulih ditiki langkau nuan, Dom! pia ku orang nya.
            Dom Lempong berasai irau ati laban iya ninga orang ngangauka iya. Iya pan lalu bejakuka kediri empu. “Ari ni orang nya nemu nama aku?”
            Enda lama udah nya peda tak beguyat rumah Dom Lempong laban diguyat dua iku orang bujang nya tadi.  Dua iku nya tadi pan bejaku “Dom, enti nuan enggai ngasuh kami duai niki langkau nuan tu, kami tumbangka lagi,” pia ku dua iku lelaki nya bejaku.
            Ninga jaku nya tadi Dom Lempong pan lalu muka pintu langkau sereta ngelalu ke dua iku lelaki nya.  Tubuh Dom Lempong nyau begetar-getar laban takut meda pengering lelaki dua iku nya.  Udah lama sida tiga ti berandau, lelaki dua iku nya ngasuh Dom Lempong nyumai.  Udah tembu nyumai sida tiga iya pan lalu makai mega.  Udah tembu makai baru dua iku orang bujang nya madahka nama diri empu.  “Nama nuan enda ngelala nama aku, aku tu meh dikumbai orang Keling Bujang Keling.”
            Lalu siku bujang sigat ti ngimbai iya bejaku, “Aku tu meh ti dikumbai orang Sempurai Gandai.”
            Udah ninga dua iku nya madahka nama diri nya baru Dom Lempong enda takut agi. 
            Enda lama udah nya Keling lalu bejaku, “Tuju kami duai kitu laban deka mai nuan pulai ngagai menua kami di Panggau Libau.  Kami deka mai nuan pulai ke menua kami di Panggau diatu mega,” pia ka Keling madah baru.
            Udah iya madah munyi nya dia iya lalu ngasuh Dom Lempong mejamka mata.  Lebuh Dom Lempong enchelakka mata iya, iya udah terengkah ba pendai orang.  Datai ba pendai nya, iya lalu diberi orang mandi lalu diunsut orang ngena daun paku.  Dipeda tak ngerupak kurap ba tubuh iya.  Gamal Dom Lempong mega lalu berubah sigat sereta kering.  Udah nya mega iya lalu diberi sida Keling pengaruh dikena iya ngayau enggau pengaruh awakka bulih utai ka dibai iya pulai ke menua sida di Batang Spinang.  Kenyau ari nya nembiak sida serumah enda berani agi beduan Dom Lempong.

Surat Ari Indai

Tabi Endu aku,

            Aku bisi udah nerima surat ari nuan tang lalu apin dibalas laban aku selalu bedau bisi tak nyamai agi.  Diatu pan apin meh aku tak nyamai lalu telih ga jari aku mela ikan masin.  Enda siti-siti penanggul datai.  Nemu ga surat nuan udah lama datai dibacha aku.
            Sinu amat ati ninga nuan minta ti minta kirum ke aku buah. Ni bisi nyamai makai utai ti nadai nuan, asaika puang tang nadai meh nemuka enggau. Nuan ga belajar ukai tak bemain ti ba menua orang.  Ila meh aku ngalau ke nuan buah rian telaga ti baru labuh diatu.  Bisi ga aku bulih sigi dua lebuh iya bisi labuh maya aku nurun kumai.  Kitai sebilik gerai magang, semina aku ti bisi kena temu utai.  Selalu bendar renga. Dom nyau madah ke diri lelak gawa.  Iya nadai diau. Ku iya ka nurun besembiang enda nyadi laban betemu enggau orang mai gawa.  Ka pan enda kitai ga gawa ba orang.  Pedis enda tat ke meh.  Ba kitai enda bebendar maya orang ti ngasuh sekula.  Ni bisi nyamai nama udah gawa kediri.  Ka enda gawa nadai ga utai dempa kitai.  Nadai apai indai kitai ulih nupi kitai belama.  Pegila lusa kada agi bisi dipeda lebuh ti nadai agi enggau begulai.  Nya alai anang enda ngatur pendiau diri ari diatu.
            Ingatka nuan, anang enda belajar taja pedis.  Nadai orang enda belajar au, enggaika kitai diketawaka orang.  Isa kitai nadai ngembuan reta tengkira kelimpah ari pelajar sekula.  Nya meh nyadika tenggau kitai ngiga penyamai kediri empu jemah ila.  Nuan pandai, nuan ga bulih pengawa ke manah jemah ila, ukai nya orang bukai.  Nyadi anang mantul-mantul maya belajar.  Kala kitai agi bisi peluang.  Orang ke nyamai pengidup diatu pedis baka nya meh dulu suba.  Ni nya bisi nyelai lalu meruan nyamai berari.  Lalu besampi meh ngagai petara ngambika merekatka pengawa kitai besari-sari.
            Selamat gerai ngagai nuan, nyamaika nuan endu. 

Pesan aku:  Anang enda ingatka penyayau indai kitai lalu bebasaka iya sereta meruan ingatka ajar iya berari.  Kitai mesti belajar bebendarka ngambika apai indai kitai gaga lalu ulih ngubah pendiau kitai ka dudi hari ila.

Dikarang: Santa @ Eymer (4 Sastera 2)

Jerita Jimbau



            Bisi dulu kelia bisi siku tuai Iban ti chukup beberita, tampak nama, bujang berani ti selalu enggau orang matak serang.  Nama iya Jimbau, tuai Iban ti chukup dikenakut ke bala munsuh.  Maya nya suba bala Iban agi bemunsuh enggau bala Kayan, memaluh enggau Kelabit.  Jimbau tu dikenakutka bala munsuh laban ketegal Jimbau tu ukai semina kering tang Jimbau tu beberita, tubuh Jimbau enda kala ruji laban senyata munsuh.  Jimbau tu ku cherita bisi utai nulung Jimbau tu bisi ditulung bunsu Empeliau enggau bunsu Tenggiling.  Bala tuai munsuh enda berani matak kayau besai ngagai menua Iban laban sida iya nemu bala Iban sigi enda nemu ulih dialahka.  Tuai Kelabit ti benama Nasan Arum enda berani ngelaban Jimbau laban iya tu alah bulu ari Jimbau, nama enda kayau anak bala munsuh sigi enda bulih pala.
            Bala Jimbau enda ga tak nyerang belama laban bulan nya sida benung musim bumai, laban sigi endang pantang bansa Iban sigi enda tau matak kayau maya taun bumai.  Bisi sekali rumah Jimbau kena ambi ngabang Gawai Bebasu Arang ba menua Iban Lemanak.  Semua orang sampal magang semina sida ti tuai ke enda laban nyau enda dapat mindah ke enda enggau orang ngabang.   Jimbau enggau bala iya udah nyikap  diri deka nurun ngabang.  Malam hari ti deka nurun ngabang dia Jimbau bisi bemimpi meda tubuh diri tak dibelit sawa, lalu diirit sawa ke dalam ai, dia iya nyau rauh-rauh.  Tudah tuai ke rauh-rauh lalu nyentuk ke dani.  Jimbau tedani laban digerak bini iya, bini iya nanya nama kebuah iya rauh-rauh dia Jimbau lalu becherita ngagai bini iya.  Iya lalu nusui mimpi diri ti bangat jai.     Sehari nya dia bala Iban ke nurun ngabang nurun magang semina Jimbau ke enda nurun laban malam tadi tudah tuai jai mimpi.  Tambah mega tudah tuai kena tabin chelap angat sehari-hari nya.  Tudah tuai enda angkat ari pandung sida ba ruai, rumah nyau sunyi nadai pengawa ulih dikereja, dia ati tudah Jimbau lalu tingatka padi lama sida ke bedau tinggal ba dampa sida.  Dia ati tudah Jimbau lalu deka ngambi padi ba dampa sayauka enggai ke dempa chit.  Udah besikap indah tudah Jimbau lalu nurun ngelaban ujan nyala, iya enda ngira tubuh diri ke sakit.  Laban ku ati iya din. Nama takutka penyakit anang ke ngelaban munsuh nadai meh takut, pia ku iya.  Datai ba langkau dia Jimbau lalu nyimpan padi ke dalam lanji, hari segi agi panas tang ujan panas mesi-mesi dia Jimbau lalu ngidupka api lalu nunu mambung enggau engkerabun.  Udah hari badu ujan panas dia Jimbau lalu deka mulaika diri, empai lama udah ngejangka dampa dia Jimbau bisi ninga kijang, Jimbau lalu mulaika diri baru ke langkau.
            Malam nya bemalam meh tudah tuai kediri-diri ba dampa.  Pagi siti deka mulaika diri baka nya baru ga kijang.  Tiap kali deka mulaika diri dia tudah Jimbau enda nyadi belama laban tanggul kijang.  Penyakit tudah Jimbau nyau ga belinsur suman.  Pagi nya dia iya tekenyit ati ninga ukui sida iya nyau nyalak naka ngemendar nya, nadai kala ukui sida ngemendar nya nyalak, Jimbau enda nyamai ati lalu ninjau ba mua empelua, peda nadai ga orang, ukui majak nyalak.  Jimbau majak irau, tentu munsuh, ku iya.  Dia Jimbau lalu besediaka senjata.  Nasib bisi ilang enggau terabai bisi tinggal ba dampa.  Enda pia nama meh utai dikena belaban.  Jimbau enda chamang-chamang lalu engkechit ke tanah, Jimbau lalu manjung naka penginggar.  Ninga panjung iya dia bala munsuh lalu pansut ari endur belalai.  Bala munsuh peda Jimbau naka pemayuh tang mimit nadai meh ati iya takut, dia bala munsuh lalu nyerang Jimbau.  Jimbau naka pemendar belaban enggau bala munsuh, biau kiba perawai lima, biau kanan perawai lapan.  Tak pedis amat munsuh gasak Jimbau siku.  Nyau panas diri hari dia Jimbau nyau berasai lelak sereta ikak tang Jimbau agi kering.  Iya bisi tulihka siti runding, dia Jimbau lalu ngansak be bala munsuh ke tebing sungai.  Ai sungai nyau keruh sereta  ngenjing laban darah bala munsuh.  Meda Jimbau enda ulih dialahka dia bala munsuh lalu betangkapka Jimbau.  Tudah Jimbau nadai daya agi.  Tudah tuai lalu dipasung.  Pantap enda ruji, dituku enda pedis.  Naka pemendar bala munsuh nguji mumpung pala tudah tuai.  Nyau ke puas baru tudah tuai nyau enda ulih ngelaban agi.  Dia bala munsuh lalu ninggang tudah tuai ngena lesung, lalu diasurka dalam ungkap batu.  Nama daya agi deh, parai meh tudah Jimbau nengali lemai danjan nengkadah bulan, lesi nengali hari.  Engka nya meh diayuka mimpi enggau utai ti dipadahka kijang ngelama tu.  Bangkai tudah Jimbau dielak ka pia aja.  Rekung tudah tuai nyau demaram laban pemendar baka munsuh ke deka ngulihka pala tudah tuai. 
            Cherita tu ditusi aki aui..iya nya anak Jimbau empu, maya nya suba umur aki aku ditinggalka apai iya parai baru beumur 7 bulan.

Ulah Bujang Dara Kemaya Hari Tu

            Tanda-tanda pengerusak moral sida ke bujang dara makin lama makin terang dipeda kemaya hari diatu.  Tanda tu ulih peda kitai ba gaya pengidup sida tiap-tiap hari.  Ba senentang adat budi basa enggau ulah sida jauh amat nyelai ari bujang dara dulu suba.  Tentu kitai sama nemu, sekeda sida tu endang enda bebasaka orang ke besai tuai.  Mayuh mega sida tu ke kelalu kasar enggau orang ke besai tuai.  Mayuh mega sida ke kelalu kasar enggau orang ke tuai tauka apai indai diri empu.  Laban sida nganggap nadai orang ulih nagang pengawa ti sepeneka ati sida nya.  Sekeda sida numbuhka raban-raban diri sereta ngaga pengachau di sebarang endur.

            Bujang dara rebak baru mega makin enda mereti sereta enda bedisiplin, bekenaka pakayan leluak, lebih agi sida ke dara.  Suah kitai meda sida tu sengaja niru pekayan orang Barat ti kelalu ngeluji mata.  Sekeda sida tu berani bekenaka pekayan sendat ti ngayanka tubuh diri.  Pia mega sida ke bujang mekin rindu niru pekayan ‘hippies’ Barat baka ti ngena tanchut jean ti udak charik, malui sereta kamah.  Sida tu mega rindu ngelinsu buk kuning sereta beantin-antin.

            Diatu mayuh mega sida ke bujang dara udah kena empas tempias nilai materialisme ti lebih begunaka duit sereta reta tengkira kena idup.  Laban ti kelalu mikirka reta enggau duit baka nya meh sida tu kempang sereta berani ati ngereja pengawa kriminal baka enchuri, ngerumpak sereta bedagang belalai.

Disediaka;
Caroline & Wenddy (4 Sastera 1)

Ensera Mimpi Rimau


Nyadi dulu kelia samua jelu endang diau dalam kampung dalam magang. Sida begulai endang nitihka pendiau enggau jalai pengidup bansa diri empu. Jelu ke diau dalam ai endang diau sereta nitihka pengidup diri empu magang. Jelu enggau ikan endang bisi jai lalu bisi mega manah.
Nyadi sekali lebuh maya tu kelia Rimau nurun ari rumah iya lalu bejalai nuju rumah Kambin. Rumah Kambin enda bangat jauh ari rumah Rimau, kira pejalai sejam ari rumah pangan diri. Sida endang bekelala enggau pangan diri. Nyadi Kambin ti dituju Rimau bisi bini siku enggau anak bujang pan siku. Anak bujang Kambin endang anak ti dikerindu ka apai seduai indai Kambin nya.
Datai Rimau ba kaki tangga rumah Kambin, iya lalu negung ngangau, “Kati tau ditiki rumah nuan punggal?” ku iya. Kambing endang nemu nyawa Rimau ti ngangau nya, lalu nyaut. “Tau punggal! Niki meh!” pia ku saut Kambin ari rumah. Rimau tak enda chechamang lalu niki, peda liur Rimau nyau bekerenjui neritik ari dagu iya. Nyema enda pan Kambin ngasuh niki, sigi niki meh iya ke rumah Kambin.
Udah Rimau duduk, Kambin lalu nanya. “Nama pejalai nuan tak tumu-tumu tu deh punggal?” ku Kambin. “Aku tu besai amat pejalai punggal. Nya kebuah aku tak tumu-tumu pagi tu dipeda nuan,” ku Rimau.
“Besai enda besai pan punggal tusui dulu meh kabuah nuan ngagai aku. Enti bisi penusah awak ke aku jampat nemu. Awak ke nyamai ga alai kitai berunding ka penusah nuan,” ku Kambin.
“Nya meh punggal,” ku Rimau, “Demalam lebuh aku tinduk asai ke enda, dia aku bekalih bisi mimpi. Mimpi asai ka meda antu besai bendar gamal datai ngagai aku. Antu nya lalu ngasuh aku makai anak bujang nuan, tang aku madahka diri enggai ngereja pengawa nya, laban aku ngenang nuan pangan aku. Agi ga antu nya, ku iya, ti aku enda makai anak nuan, aku deka mati tauka gila,” pia ku Rimau madahka mimpi diri ngagai Kambin.
“Enti munyi nya punggal,” ku Kambin, “enda meh aku ulih nulung nuan, laban nya tak anak aku ti deka asuh antu pakai nuan. Pasal mimpi nuan tu aku endang enda besetuju enggau nuan,” ku kambin madahka runding diri empu ngagai Rimau.
Udah nya, lama Rimau seduai kambin bechakah ke jaku enggau pangan diri. Sama nyau terit urat rekung seduai bai bekelikuhka jaku enggau pangan. Nyau kelama nya baru seduai sama setuju deka bechara ba Hakim Singa.
Rimau lalu nurun ari rumah Kambin, bejalai nuju rumah Hakim Singa. Rumah Singa nya tinggi bendar ba tuchung bukit nunga ngagai padang ke besai. Singa endang udah meda Rimau ari jauh bejalai nuju rumah iya. Iya lalu bediri ba mua pintu nganti penatai Rimau.
Lebuh Rimau datai ba rumah Singa dia Rimau lalu nabi iya. “Tabi Hakim Besai,” ku iya, “Aku bisi pejalai, ke deka betemu enggau nuan ditu, laban aku bisi pechara ngelaban Kambin. Ari pengawa nya aku minta nuan Hakim Besai nulung mutuska pechara aku enggau Kambin,” pia ku Rimau.
“Enti seduai Kambin bisi laya ti deka asuh seduai putus ke aku, nama deh kebuah aku enggai, ga endang pengawa mutuska pechara orang,” ku Singa. “Tang, enti pia panggil Kambin datai kitu,” ku singa. Singa lalu ngasuh Landak manggil Kambin.
Enda bangat lama Landak udah nyau madahka Kambin, dia deh sida Kambin menyanak lalu datai ba rumah Hakim Singa. Nambahka sida tiga menyanak jelu bukai pan bisi mega datai sama enggau mendingka pechara nya. Udah abis semua randau bukai, pechara pan lalu belabuh.
Dalam pechara tu, dia deh tudah Rimau lalu nusui mimpi diri ke diasuh Antu makai anak bujang Kambin. Udah nya, iya lalu nekanka jaku madah Kambin enda arap ke mimpi nya, lalu enda sekali-kali ngasuh makai anak iya. Nyau kelama sida udah besaut ke jaku ari sepiak-sepiak, nya baru Singa Hakim Besai mutus ka runding diri empu, ku iya, “Nyadi pemutus pechara Rimau seduai Kambin ba penemu aku enda tentu bangat panjai. Jaku ari sepiak-sepiak sama udah terang bendar. Baka kita mayuh sama udah mega mendingka cherita Rimau ke diasuh antu makai anak Bujang Kambin. Ari nya tudah Rimau laban ti apin deka mati, apin deka gila, endang keras deka makai anak bujang Kambin. Iya ke deka makai nya ukai ketegal ati enda manah, ukai ketegal peneka ati iya empu, tang nya endang terang bendar ari mimpi munyi ku iya tadi. Baka tudah Kambin pan udah mega ninga ke penemu Rimau enggau silik, tang iya enda agi arapka mimpi, lalu enda sekali-kali ngasuh Rimau makai anak bujang iya. Nya alai ba pechara tu dalam penemu aku Rimau enggai nyadi enda menang,” ku Hakim Besai mutuska pechara nya.
Serta pemutus pechara nya udah diletak Hakim Singa, madahka iya alah, dia kambin lalu kat-kat bejaku serta lalu bediri nanya ngagai Hakim Singa, nanya ka pechara nya tauka enda diapil. Singa lalu madahka tau, tang timpuh iya ngapilka semina tiga hari aja.
Udah nya semua orang ke bisi datai sama mendingka pechara nya, sama bela mulaika diri magang. Samina Kambin sebilik enda pulai. Ari rumah Hakim Besai Singa sida menyanak lalu bejalai nuju rumah luya pelanduk, laban sida menyanak deka ngambi Pelanduk nyadi luya ngarika sida ba pechara tu.
Datai sida menyanak ba rumah Luya Pelanduk, iya lalu ngangau. “Tau ditiki rumah nuan Luya Besai?” ku iya. Laban Luya Pelanduk tu endang orang ti pintar, iya nyenguk deka nemu sapa orang ke ngangau. Iya lalu tepedaka sida Kambin menyanak, lalu ngasuh sida niki.
Udah sida menyanak duduk, dia Kambin lalu nusui berita ngagai Luya Pelanduk. Iya mega lalu madahka diri deka minta tulung Pelanduk nyadi Luya sida, lebuh bechara apil tu ila. Pelanduk pan nadai mega mayuh jaku, laban nya endang sigi pengawa orang ti nyadi Luya.
Betul-betul chukup tiga hari udah nya sida Kambin menyanak lalu mupuk ga mansang ngagai bilik ke endur bechara. Datai din sida meda bilik endur bechara endang udah penuh laban bala jelu baka ke sama datai deka mending ke pechara apil Kambin ngelaban Rimau. Nyadi hari maya nya kira benung tengan niki mata panas. Apin lama udah sida Kambin menyanak enggau Luya Pelanduk datai ba bilik pechara, dia Singa Hakim Besai pan datai ga entudi sida. Singa lalu duduk ba kerusi Hakim Besai ti endang endur iya mutuska pechara.
Udah nya Luya Pelanduk lalu bediri serta lalu bejaku, ku iya, “Nyadi tiga hari ti udah dia nuan Tuan Hakim Besai bisi ngatur pechara Rimau seduai Kambin. Dalam pechara seduai nya suba, bepun ari Rimau ke bemimpi diasuh antu enda tau enda makai anak bujang Kambin, lalu pemutus runding nuan Tuan Hakim Besai, ba pechara nya suba Rimau menang,” ku iya. “Tang laban Kambin enda puas ati ba pemutus runding nuan ba pechara nya suba. Nyadi sahari tu aku diambi iya jadi ka Luya dalam pechara apil tu. Tang diatu, aku minta ngagai nuan Tuan Hakim Besai nangguhka pechara pagi tu ngagai ngalih hari tu lagi, laban diatu aku buntau bendar, bekau ke udah berundingka pasal pemutus pechara tu, ti lalu diapil Kambin baru. Aku deka natka diri enda lama.” Pia ko Luya Pelanduk.
Datai ba maya ngalih hari, nya baru orang datai baru ngagai bilik pechara. Datai dia sida meda Pelanduk benung tinduk ba atas mija. Tuan Hakim Besai pan udah ga datai. Pelanduk lalu ensugau angkat dani ari iya ti tinduk, lalu meda bilik pechara endang udah penuh laban bala jelu. Tekala nya mega Luya Pelanduk lalu ngasuh semua orang ti bisi datai kia ngambi rangkang sesan siku. Nyadi Kambin diasuh iya ngambi minyak gas sebutul. Udah semua sida ti diasuh iya ngambi rangkang kayu datai semua, luya Pelanduk lalu ngasuh sida nugungka rangkang kayu ba tisau mija Tuan Hakim Besai. Udah nya iya lalu nuangka minyak gas ngagai tugung kayu, sereta lalu ningkuhka machis.
Meda iya baka nya dia Tuan Hakim Besai Singa lalu bejaku, ku iya. “Hey! Luya Pelanduk, nama pengawa nuan baka nya?” ku Hakim Singa nanya iya. Pelanduk lalu nyaut. “Nadai mayuh pengawa aku tu Tuan Hakim,” Ku iya. Tak semina nitihka mimpi aku ke tinduk ba atas mija tadi. Lebuh aku ke tinduk enda lama dia tadi, dia aku lalu enda mukai-mukai bekalih bisi mimpi diasuh antu enda tau enda nunu rumah pechara tu. Enti aku enda nunu rumah pechara tu, aku deka mati tauka gila. Laban aku apin deka mati serta enggai merinsa laban gila, nya alai aku deka nunu rumah tu,” ku iya.
“Enti pia anang nuan nunu rumah tu,” ku Tuan Hakim Besai Singa.
Tu nadai anang-anang Tuan Hakim,” ku saut Pelanduk. “Nuan empu udah ngatur pechara baka nya. Enti nuan deka nawa aku, alah meh nuan, laban nuan ba senentang pechara Rimau seduai Kambin, ngatur Rimau menang, laban iya bisi mimpi diasuh antu makai anak bujang Kambin. Nya alai dalam pechara apil, laban aku bisi mimpi aku mega menang, lalu enda tau enda nunu rumah tu,” ku Pelanduk.
“Enti munyi nya, tebuai meh pechara Rimau seduai Kambin, menang meh Kambin ba dalam pechara apil tu. Nya alai ari diatu datai ka pengujung dunya jemah ila, Rimau enda tau sekali-kali ngachau anak Kambin. Enti Rimau bisi ditemu teketik jari lalu ngemansutka darah anak Kambin sebilik, deka ganti Rimau enggau dagin iya seketi, tu adat,” ku Hakim Besai Singa lebuh iya mutuska runding diri ba pechara Rimau seduai Kambin.
Manah penemu nuan Tuan Hakim Besai Singa,” ku saut Luya Pelanduk. “Enti munyi nya enda meh aku nyadi nunu rumah pechara tu, sebaka enggau Rimau ke enda nyadi makai anak bujang Kambin. Ti nuan nentuka Rimau nyadi makai anak bujang Kambin, aku tunu mega rumah tu, laban kami duai Rimau sama bisi mimpi,” pia ka Luya Pelanduk.
Udah nya tebuai meh pechara Rimau seduai Kambin ketegal pemintar enggau pengelandik Luya Pelanduk ke ngaga diri bisi mimpi, nunda mimpi Rimau. Lepas nya, sereta udah abis pechara Rimau seduai Kambin, gaga meh sida Kambin menyanak. Anak Bujang Kambin nyau ngingkak gagaka diri enda nyadi diempa Rimau. Sida Kambin menyanak lalu meri besai-besai terima kasih ngagai Luya Pelanduk, serta lalu meri Pelanduk sesintong buah buan ke upah iya nulung ngatur pechara nya. Pelanduk pan gaga mega nerima buah buan ngemayuh nya. “Bisi endar ke dempa aku seminggu tu,” ku iya. Baka nya mega bala jelu bukai lalu madahka diri besemaya deka begunaka Luya Pelanduk, enti sema sida bisi bechara dudi hari ila.

Tudah Tuan Hakim Besai Singa nyau enda nyamai asai ketegal ati iya udah bisi deka ngering ka Rimau, enggau ensepi diri alah penemu enggau pemintar laban Luya Pelanduk.


Dikarang:  Jay (4 Sastera 1 2008)