Selasa, 24 Ogos 2010

Motivasi Pagi

Pagi tu aku tak baka ke begah-begah bediri chegi-chegi ditisi punggang astaka, ukai mantai ke pemandai bedindang nemu nyadaka nyawa tang dibai ati ti changka deka nyaraka penemu diri meransang kitai ke agi besemekih ngiga penemu di sekula.

Siru aku tu deka bejaku, ka bebagi ke puli aku tu pulut padi jerenang, arapka runding kitai tu ulih tajam baka pengereman mata besi, awakka kitai ti mereti tu tau beati juring muting geraji, nuju kitai ke sama agi mansai di gensarai papan turai ti deka peresa perintah besai ngambi setipikit pelajar Malaysia.

Anang guai gaga kitai taja kitai asaika bisi udah sentagai duku chandung, anang guai ketawa kita meda sarang burung puna taja ia empara rangkang engkabang, anang guai muji sarang burung kanji taja iya tuchi kapas magang.

Kitai tu ga baka ingkat taja tau nyelapat lubang kilat tang dini kitai tetutupka lubang guntur, baka bengkang, taja mengkang lubang nyang tang dini kitai tepampulka lubang lambur, baka mengkam kitai tu nguan lubang ujan tang dini kitai tetikupka lubang lunggur, baka mengki taja pan nguan lubang ai tang kitai enda tealitka lubang panchur, agi baka jani kitai tu ti baru tumbuh ngeli, enti chukup tengkani, angka ga tau dibai bepangki ngeli ngelinggang dulang, agi baka manuk kitai tu baru tau ngair mantuk, enti chukup inang, angka ga tau engkukuk renggang-renggang.  Agi baka menarat kitai tu baru tau telentang tingkap, enti bisi berekat angka tau ga ngerayap empakap batang tiang.

Nya alai aku arapka kitai sama enda leju, arapka pengajar kitai ke sikar dijungkal kandang ati enda sanggu ngajar kitai, sanggup nyambung penemu kitai ti udah, nunda semeliung kepung punggang, minta seleti kitai tu, baka titi andau penyuang, minta jali penemu kitai tu nunda ginti alir sempekang, minta saup kitai tu, minta lilup ukai nya penemu tau chukup, minta jali taji meh kitai tu, baka manuk mansang disabung menang, ukai nya tau ditaruh penemu kitai disemaka baka sesintung pan genselu telu ketupung enti enda dianjung nadai meh teulihka untung menang bebeli, segantang pen genselu batu lua kenyalang enti enda ditandang, nadai meh iya tau meri tebilang pansut pemerani, sepinggai tupai pan genselu batu lua beragai, enti enda diansarka bumai, nadai meh nya meri tebantai bulih padi.

Nya meh ke pengujung jaku aku arapka kitai ditu ti nemu reti tau bulih rita tau bedindit ke langit munyi ke ngerakit papan tebelian, tau bedigah ke dalam tanah munyi gurah ngengkah batu kerangan, tau bereni ke alam ai nempala lenggi bebali nensam, deka bedindit ke langit munyi ke ngerakit papan dipansap, deka bedigah ke dalam tanah nempala  lengkap, deka bereni ke alam ai nempala lenggi rantau riap, sempama jaku kitai, dikelala daun ari kayu, dikelala buah ari langgu, dikelala basa ari penyiru, dikelala bansa ari jaku.

Nya aja. Terima kasih.

PEMUJUR BEPUN ARI MACHA

Nitihka pansik 93%  orang ke mujur endang orang ke rindu macha.  Ba sida nya macha nya enda tau enda dikereja setiap hari.  Reti nya, kitai mesti macha sebarang utai ti tau dibacha berengkah ari maya menchelak mata pagi hari, baka leka jaku padah ke dipeda ba mua mata kitai.  Chunto iya, “Ditagang muai uras sebarang alai.”  Udah macha nya lalu perundingka reti iya.  Udah nya bacha meh bup pelajar kitai.  Enti enda dibacha, ulih ke bup macha kitai tauka kala kita meda orang ke mujur semina engkah bup dalam mija, udah nya bulih pemutus ti lati dalam peresa.
Batang pemujur iya nya penemu.  Kedua, pengeliat ati.  Ketiga, ulah positif.  Ketiga-tiga tu tadi ulih meransang untak/minda lalu ulih ngasilka mensia lati.  Enti nadai penemu, kitai segi enda ulih nemu kini ke penunga enggau nama endur bepanggai enti deka nyadi orang ke lebih mansang, lebih lati ari sebedau nya.
Chara pemadu mudah mansai penemu iya nya ari macha.  Ba jeman ‘cyber’ kemaya hari tu, kitai ulih mega macha artikel-artikel pechuma ari internet.  Enggau chara tu, kitai ulih macha kena ngulihka penemu, ngiga informasyen enggau nitihka pemansang dunya diatu.
Orang ke bepenemu iya nya sida ke mujur sereta inginka pemujur.  Enti deka nyadi orang ke mujur kitai mesti nunda perangai orang ke udah mujur, chunto iya pengajar ke ba mua kita diatu.  Sida udah mujur di sekula enggau ba pelajar sida, nya alai titihka meh singkang pemujur sida iya.  Kitai mesti rajin mansai penemu, rajin belajar enggau nguna utai ke udah dipelajar kitai nya.
Deka nyadi nembiak ke mujur, besemak meh diri empu enggau penemu, rinduka penemu enggau rajin bekunsi penemu.  Pengidup kitai nyadi lebih maju lebuh kitai rajin ngiga penemu.  Semua nya enda nemu abis.
Nya alai, mayuh agi penemu ulih kitai ari ke macha, kunsika meh penemu ke ulih kitai nya, awakka lebih mayuh agi pememu ke ulih kitai!  Pechaya meh “macha nya jematani penemu’.

Jumaat, 20 Ogos 2010

BIAU PEMANSANG SEPENGUDAH MEREDEKA



Sa, dua, tiga, empat, lima, enam, tuuujuh,
Nya alai enda aku busung laya lela,
Aku miau selanjau ijau manuk lia,
Laban kaki  udah bediri ba segi batu tangga,
Belakang tinggang seludang batu mata,
Berang tanchang ibang ngeli sawa,
Perut rutup-rutup balut selaput danan sedepa,
Ngeli nanyi ngetup badi mata lungga,

Nya alai enda aku busung laya pambu,
Aku miau selanjau ijau manuk kelabu,
Laban kaki udah bediri ba segi batu gerugu,
Belakang tiggang seludang baju seribu,
Berang tanchang ibang ngeli sudu,
Perut rutup-rutup balut selaput danan sekayu
Ngeli nanyi ngetup badi mata duku

Nyau kesal aku di jungkal selangka dada
Jari kanan ku miau selanjau ijau jelayan kesumba,
Dipeda kita bekemumuk duduk semuka,
Tang ke diatu laban aku ka miau,
Kesatu Datuk Francis Harden anak Holllis Tini,
Kedua PPD kitai Cikgu Walter Lamat Kiyai
Laban sida iya ngarika kitai bansa Iban
Nulung kitai ngaduka turai jaku bansa

Nyau kesal aku di jungkal kandang ati,
Jari kiba aku miau selanjau ijau labang belansi
Dipeda kita ke bekemumuk duduk bebandi,
Laban ambu aku ka miau kita pengajar,
Kedua rintai pengari,
Laban kita datai bebai-bai nitihka semaya timpuh danji.

Nya alai manuk adung tipisan banda
Dada nyala ngerang kepayang ketugang tuntung nyala
Tu kena aku miau kita ke besemuka duduk bekelinga,
Nyangka dada kita berasa beati dua,
Bejaku agi sanggu singkang enda sebaka
Tang enti udah bekau kebau aku enggau manuk tu lagi
Nya baru kita ngelala reti 1Malaysia,
Laban diatu menua kitai udah meredeka
Dipegai siku raja tampuk perintah menua Malaysia.

Nya alai manuk biring bekubah labang
Dada nyala ngerang kepayang ketunggang  tuntung lang
Tu kena aku miau kita ke besenuka duduk betentang,
Nyangka dada kita berasa beati bimbang,
Bejaku agi saru singkang endang sepasang
Tang enti udah bekau kebau aku enggau manuk tu lagi,
Nya baru kita ngelala rayat Malaysia tanah mansang,
Laban diatu kitai udah segulai sejalai saum tansang,
Siku Menteri Besai, nguasa perintah menang.

Nya alai manuk kelabu bekubah tuntung iku merudu mayuh begupung
Tu kena aku miau kita ke begelumu duduk bebandung
Kena aku nelah bala perintah ke amat manah,
Rayat nadai tusah pengidup selalu betulung-tulung,
Kelia amat meh kitai pedis gawa betangkalka getah nyelutung,
Tang diatu perintah nyediaka projek sepeneka nugung,
 Dipedua bela-bela semua bansa bulih penguntung.

Nya alai manuk menaning tepisan adung,
Iku merudu mayuh begupung
Tu kena aku miau kita ke besemuka duduk bebandung,
Meda burit entam ngubit duduk dijumpit kerusi jelutung,
Meda baju manah udu bejalih gadung,
Tang enda semina naka nya aja kita digela aku ngena jaku nyampau diitung,
Kelia amat meh jenawang bujang bula enda tau betemu,
Enda tau bepansa enggau sida aya tangkai menyimpung
Tang diatu dini bisi baka nya agi,
Laban perintah chukup manah rayat sama diuntung,
Uji kitai meda menua Betong belambangka batang getah putung,
Tanda bansa kitai Malaysia idup senang saum perabung.

Nya alai manuk ke pabu iku merundu mayuh enchemba
Tu kena aku miau kita ke bekemumuk duduk besemuka,
Meda burit entam ngubit duduk dijumpit kerusi sofa,
Meda baju manah udu bejalih mirah jera,
Tang enda semina naka nya aja kita digela aku ngena jaku nyampau didinga,
Menya amat meh sida jenawang bujang melisa,
Seruran nyabak kela-kela tinggal dara panggau bujang,
Tang diatu dini bisi baka nya agi,
Laban menua udah sebaka chukup maju reta tengkira,
Jalai endang udah ga nyamai dialun jalai raya,
Sida ke bujang enggau ke dara dini bisi beraie
Nyabak meraya laban iya ke jauh ambai mata,
Semak di geladak skrin telefon Nokia.

Nya alai tak baru ikak,
Aku tu asai ke nanjak ai menuh pasang lemai,
Asai taban runtuh patah pemanggai,
Asaika nikauka utai jauh rapas tampai,
Nyangka kita ke datai mansang datai betandang,
Bisi salah mimpi salah hari,
Salah pengkangkat salah kenyap,
Jai burung salah tenung,
Salah penatai salah penyangkai,
Awakka tepantup ba manuk tu lagi,
Awakka kita datai mansang datai betandang,
Pan tau gayu guru gerai nyamai lantang senang,

Nya alai manuk tu,
Uji peda kita manuk tu lagi,
Tak lapu-lapu manuk tu terebai lagi baka peluru leka meriam
Kebab sayap munyi tempap sambi buyan
Nya alai iku deru-deru munyi gugu guntur dalam
Paut kaki munyi duyung diri enggi Patinggi Ali pulai berikan
Nya alai manuk tu lagi
Terebai ngagai kampung jerung mansa menua puang
Nuju ngagai tasik begilik ledung lelinang,
Nya alai semua kitai diatu lagi
Gayu guru gerai nyamai.


Nya aja,
Terima kasih.
Winston Gayan ak. Bali