Nusun Langkar Karang
Langkar karang nya sebengkah malin ti beguna bendar kena nuan nulis karang ti chukup manah. Nuan enda deka tepawah ari utai ti ditanya maya nulis enti bisi langkar nya. Tiap-tiap langkar karang mesti ngundan tiga bagi pekara baka: pemuka jaku, isi ti dipeguna, penutup.
Semua isi ti dipeguna mesti ditusun nitihka ripih pemerat iya. Isi dalam langkar karang patut ditulis kedut sereta pandak. Kelimpah ari nya, langkar karang mega ulih:
- nentuka semua isi karang nuan nya releven
- nusun semua isi tauka fakta nitihka ripih
- natak pemanjai setiap isi ti dipejuraika nuan
- nentuka pemanjai karang nuan
- nyeliahka diri ngulang fakta
Nulis sereta ngerembaika langkar karang
Kena nulis karang ti tinggi kualiti, nuan patut bisi pemintar nguna penemu ti meruan dikembuan dalam ati nuan empu. Nuan patut ngerembaika langkar karang ti udah disediaka nuan nya ambi ke nyadi siti karang ti menyana sereta nemban nitihka tanya tauka topik. Kena nuan nulis karang ke baka nya, jaku (bahasa) nya sebengkah pekakas ti beguna. Nya alai, sepil, tanda bacha, gaya jaku enggau grama patut enda salah sereta engkeman ba sesebengkah karang.
Sebaka enggau langkar iya mega, karang penuh ngembuan tiga bagi: pemuka jaku, isi ti dipeguna, enggau penutup. Bagi pemuka patut nerangka pasal topik lalu ditulis ngena chara pandak sereta padat dalam seiti paragraf. Taja nadai mark ungkup pemuka jaku, tanya iya ulih meransang sereta narit ati pemeresa tauka pemacha ransing ati deka macha karang nuan nya.
Isi-isi karang nya meh tubuh karang nuan. Bagi isi tu patut ditulis dalam tiga datai ke lima isi pugu. Tiap-tiap isi mega patut ditulis dalam siti paragraf. Tiap-tiap paragraf mega patut kurang lebih sama pemanjai lalu iya ulih nentuka pemanjai karang nuan. Ambi ke chunto, enti karang nuan patut enda kurang ari 150 leka jaku lalu nuan deka ngenataika empat isi dalam empat paragraf mega. Tiap-tiap paragraf patut ngundan antara 50 – 60 leka jaku. Anang nulis kelalu mayuh, anang mega nulis kelalu mimit. Enti kelalu mayuh dalam siti paragraf, nuan deka kurang ruang endur ngenataika isi ba paragraf ti bukai. Tuju paragraf mega, ambi ke karang nuan beresi gaya sereta mudah dibacha pemeresa. Isi-isi ti dikenataika nuan mega mesti bekaul jaul enggau pangan diri lalu beri chunto-chunto ti engkeman.
Tiap-tiap karang mesti bisi penutup. Bagi tu patut ditulis dalam siti paragraf aja. Karang ti nadai penutup sebaka enggau rumah ti nadai pintu belakang. Iya mega sama enggau cherita ti nadai pengujung. Dalam bagi tu nuan semina tau ngetan sereta nguatka penemu diri pasal pekara ti udah dibantaika nuan, Anang sekali-kali nambahka isi fakta ti baru.
Karang ti manah, patut ditulis ngena ayat ti pandak. Anang sekali-kali nguna ayat ti kelalu panjai sereta bebelit-belit, enggai ke pemacha enda meretika pekara ti deka dikenataika nuan nya. Pekara sereta penerang ti deka dikenataika nuan ngagai pemacha tauka pemeresa nya patut terang.
Penulis patut nguna penanda jaku (penanda wacana) ti engkeman dalam karang kena nanda kaul jaul paragraf siti enggau paragraf siti. Kelimpah ari nya, penanda jaku mega ulih nyambung ayat enggau ayat. Sekeda ari penanda jaku ti sekalu dikena dalam karang iya nya baka ti di baruh tu:
- Penambah jaku – tambah mega, kelimpah ari nya, lebih-lebih agi, udah nya, agi mega,
iya ti bendar, sema jaku, etb.
- Jaku penyambung – taja pia, tang, lalu, ambi ke, enggai ke, enti, sereta, enggau, laban,
tegal,
- Sema banding – taja pia, udah ke dibanding enggau, enti dibanding enggau, bebanding
enggau, kebuah pia, enti baka nya, etb.
- Penitih – ari nya, keterubah iya, sepengudah nya, ti penudi iya, lebih beguna agi, etb.
- Chunto – ambi ke chunto, baka, reti iya, etb.
- Maya – sepengudah nya, ngena jaku pandak, sebedau nya, berengkah ari nya, ke diatu,
agi ke diatu, pengujung iya, etb.
- Simpul penemu – ari nya, kena simpul penemu, nitihka penemu,
Nitihka Aminuddin Rosli, (2001) penanda jaku bisi dua bengkah, iya nya:
- Penanda jaku ti ti nerangka bantah idea. Ambi ke chunto, taja pia, enti enda pia, nithka penemu orang bukai, etb.
b. Penanda jaku ti nampung idea baka: kelimpah ari nya, tambah mega, ketegal nya, etb.
Kelimpah ari ke meri kaul jaul paragraf siti enggau paragraf bukai, penanda jaku mega beguna dikena nyambung siti ayat enggau ayat ti bukai.
Ngedit Karang
Udah temu nulis karang, nuan patut ngagihka peluang mimit kena nuan ngedit pekara ti udah ditulis nuan. Sekeda pekara ti patut diedit nuan nya baka:
a. nombor kad pengelala f. Penutup Karang
b. Format karang g. Penyampau leka jaku
c. Pemuka jaku h. Sepil
d. Isi-isi enggau kerebai isi i. Pemeresi tulis
e. Chunto j. Tanda bacha
Struktur Karang
Tiap-tiap karang ti penuh sereta menyana patut ngundan antara 3 – 5 pugu isi. Taja pia, penyampau paragraf bepanggai ba pemanjai kerembai jurai pugu isi nya. Kekadang, sekeda karang ngundan lebih ari lima paragraf. Peratika langkar strukur karang di baruh tu.
Paragraf pemuka jaku |
Paragraf 1: Isi kesatu |
Paragraf 2 : Isi kedua |
Paragraf 3 : Isi ketiga |
Paragraf 4 : Isi keempat |
§ Paragraf 5 : Isi kelima (tau enda ibuh enti 4 iti isi udah padat) |
Paragraf penutup |
Bisi tiga bengkah pekara ti dikemeratka lebuh orang meresa karang nuan lalu meri mark. Pekara nya baka: pugu isi sereta kerembai isi, gaya jaku (gaya bahasa) enggau chara nuan ngenataika jurai idea nuan.
Nuan enda diperansang mantaika lebih ari lima pugu isi dalam karang nuan. Kebuah pia, enggai ke nuan enda ulih ngerembaika jurai idea nuan enggau lenak sereta dalam. Enti baka nya, karang nuan enda tentu padat sereta menyana.
Sema jaku, enti nuan bejuraika semina tiga pugu isi, kelikuh jurai nuan tentu lebih lenak sereta dalam agi. Penyampau isi mega bepanggai ba tanya tauka topik enggau pemintar nuan bekelikuh tauka bejuraika pugu isi nya. Pekara tu mega bepanggai ba pengerajin nuan macha bup, majalah tauka surat kabar. Enti nuan udah nyediaka diri ngena fakta enggau penerang ti chukup, nuan patut ulih mansutka idea lalu ngasilka karang ti bekualiti.
Nuan mega patut nentuka karang nuan enda kelalu panjai sereta ngundan utai ngapa. Utai ngapa reti nya pekara ti enda besangkut paut enggau topik. Taja pia, enti nuan pintar sereta konfiden nguna gaya jaku ti manah, enda ga ngawa enti karang nuan nya panjai mimit ari ti patut.
[ditulis Pengajar Iban Sbw]
Tiada ulasan:
Catat Ulasan