Ahad, 30 Jun 2013

BULA

Bisi sekali,dua iku diri menyanak tu,bejalai nemuai ngagai siti menua.Hari pan nyauka lemai,alai seduai iya datai ba pendai orang dia.
Enda jauh ari pemandi orang dia,bisi dih tugung kayu nyau deka ninggi kitai duduk.
" Apoo....!!!!" ku anak pangan kitai tu,
" Nama pengawa mayuh amat dan kayu tu ditugungka orang,Apai?" ku nembiak tu nanya apai.
"Eh...anak,nya mih dikumbai orang tugung pemula..." ku saut apai iya.
"Enti kitai ditemu orang bula,lalu ditugungka orang baka tu mih kitai.." ku apai tu tadi.
"Nya alai anak.kitai enda tau sekali-kali bula, enggaika ditugungka orang..."
"Oohhh.....Iya baka ni kitai ka muai pemula enti kitai bisi bula dih Apai..?" ku tanya nembiak tu tadi.
" Ngg....Bisi ga chara iya...nyelam ke dalam ai kin mih...Baka tu..." ku apai.Udah nya apai nembiak tu tadi lalu enda chamang-chamang,lalu chemebur terejun kedalam ai. Nyaaa kenu...,tudah nembiak tu tadi lalu gut-gut kediri nganti apai iya ke pansut muai pemula kenu ku jaku. Nembiak tu tadi lalu mupuk irau meda apai iya tak lalu enda pansut-pansut ari dalam ai, reni pan nadai peda agi...Nyau mupuk takut iya. Benung tudah pangan ke jengau-jengau sebelah tebing sungai dia,dia dih apai iya tak lalu ngenyit pansut ari ai sereta manjung.

" Udah..!!!" ku iya.
" Nama udah ,apai..?" ku tanya anak.
" Udah dibuai magang pemula aku tadi..." ku saut apai iya.
" Nama kebuah nuan lama amat tadi,Pai..?" Ku anak iya nanya.
" Eh,Jang.....ngetu makai mee dulu, nya lah bisi lama mimit.." ku saut apai iya.
"Bah,...nuan ga Dom..nyau ka lemai amat hari tu...enggaika petang lagi.." ku apai iya.
" Au meh Pai,.." saut nembiak tadi. Peda tak terejun kenu anak, ninggalka apai iya ba tebing. Nama dih,nyelam mih nembiak tu, deka muai pemula.
Nyau ka apus insap sebatang, lalu empai ga nembiak tu bisi ayan.  Apai iya nyau mupuk irau amat, nyau kalat-kalat iya sebelah nya.  Iya tak seruran rangau-rangau. Tak ngenyit nembiak tu tadi pansut lalu beguai-guai nyemerai ke tebing.Apai iya lalu belanda ngelawa iya...
" Apuu...Irau amat ati aku..."
" Nama main nuan lama amat dalam nyin..?" tanya apai iya...
 Nembiak tu tadi enggau seput-seput lalu nyaut,
" Kati ku aku enda lama dih, nyau puas aku betalat enggau orang din.."
" Nuan ke makai mee tadi lalu enda dibayar, aku ke pedis jamah sida din...!!!!"

Sumber:  Pengajar Timothy Salang. forum engkabang.net

Sabtu, 15 Jun 2013

Jaku Sempama


Tuju aku masukka jaku sempama ari pom 1 - form 3 ditu laban kena aku malin nembiak ke ngambi PMR taun tu 2013.  Taun tu iya nya taun ke penudi PMR dikena nisih nembiak ba sekula sekondari baruh sereta pemutus iya tau kena milih nembiak ke ulih masuk ngagai form empat.  

Taun baru 2014 nyangka bisi tisih baru kena nganti PMR.  Nya alai nembiak sekula form 1 enggau form 2 taun tu udah ditisih ngena Penilaian Berasaskan Sekolah (PBS).

Form 3

Lumur
Jaku Sempama
Reti
1
Belakang duku enti diansah tau mih nyadi tajam
Baka ni pan nembiak muntat besekula enti selalu belajar enggau bebendar tau mih mujur dalam peresa
2
Nebang tapang ngena lungga, mansai sungai ngena tapa

Nguji ngereja pengawa ti sigi ditemu mar dikereja
3
Untung nemu beliung enda ngambuh, nemu peredah enda ningkuh

Gaga ati laban bulih utai enggau mudah
4
Lelabu enda bulaka peputan, tukul enda kala bebulaka tempan

Pengawa nitihka jaku/enda bulaka semaya tauka janji
5
Penyayat dua mata

Bulih penguntung ari kedu-dua piak
6
Baka batu tungku

Nelap
7
Begantung senduk

Suntuk bendar, enda chukup belanja
8
Lurus ulu lungga, bingkuk batang empasa

Enda tentu rurus adat tang enda ga tentu bingkuk
9
Besai beliung besai kelibak, besai periuk besai kerak

Besai gaji besai ga belanja

Jumaat, 14 Jun 2013

Jaku Sempama

Form 2

Lumur
Jaku Sempama
Reti
1
Baka buah ilang ulu, ditelan mati apai, dilua mati indai

Sereba salah, dikereja enggai tentu nyadi, diteju pan enggai ga nyadi
2
Lubuk bisi baya, tapang bisi rembia

Udah bisi orang empu lalu enda ulih dikachau agi
3
Orang di ili ngunsi tebu, orang di ulu dibalut miang

Orang bukai ke ngereja penyalah orang bukai ke kena ukum
4
Remaung di rumah, raung di tanah

Di rumah bejaku kerah-kerah ngumbai diri kering sereta berani tang lebuh dibai kereja sebelah babas nyau nadai utai ulih dikereja
5
Baka baya ditegah indu

Nadai temu tunga ati laban kesal
6
Baka pendiau bunsu bubut

Diau kediri-diri
7
Lansar tau nyadi lubuk, lubuk tau nyadi lansar

Orang ti kaya tau nyadi miskin, pia mega orang ti miskin tau nyadi kaya
8
Di rantau nyengkau, di lubuk ngauk

Mayuh endur bulih
9
Baka api dipanjah ai

Padam sedu tauka ngetu tekala nya
10
Lelabu enda kala bebulaka peputan, tukul enda kala bulaka tempan

Pengawa nitihka jaku/enda kala bulaka semaya tauka janji
11
Dipelam pan buah rian, agi mih bebau, dibungkus pan abus agi mih tekebu.

Enda ulih dipelalaika pekara ti bendar, lama laun ditemu mih.
12
Mit leka semakau

Taja gamal mit tang kering sereta bagas
13
Orang bukai ke ngambuh kitai ke abis arang

Rugi ketegal pengawa orang bukai ti nadai bekaul enggau kitai
14
Kunchit di tisi langit deka ditunu, rusa di kaki tangga enda diemparu

Ngumbai diri ngiga utaiti jauh sereta mar tang utai ke semak tak nganti ngambi enda dikeibuh
15
Mai tunjuk sepuluh

Nemuai ngusung orang nadai mai pemeri
16
Ati hari

Orang ti jampat berubah ati
17
Au belau

Setuju tang enda ngereja pengawa
18
Aum juak
Dua mua tauka dua ati lalu bulih penguntung ari kedua-dua piak
19
Buai batu

Enda ingatka pangan diri
20
Berani kesa

Berani tang enda mutus ati
21
Tibar jala enda betating
Mansutka penemu nadai berurun sereta enda besebar
22
Ngerabu jelu di puchuk kayu, ngerami ikan dalam ai

Ngereja pengawa ti ngelebu diri
23
Untung nemu beliung enda ngambuh, betuah nemu peredah enda ningkuh

Gaga ati laban bulih utai enggau mudah
24
Kudi memuri hari enda ujan, ikak lelanggak ikan enda ngaban

Ngiruh diri ngapa nguji deka narit ati orang ti sigi enggaika kitai
25
Ngenung baka empelekung mabuk ambuh, ngetu baka puyu mabuk keruh

Ngetu sekejap seraya ninga runding ke badas dikena mutarka penusah diri empu
26
Baka dampa ngumbaka langkau, baka tangga ngumbaka lalau

Asil kereja nitihka gaya enggau perangai orang ke ngereja pengawa nya
27
Berumban baban semalam di rantau jalai, jamah lubah tumu datai
Deka beguai tang laban berumban pulaika lubah lalu laun

Khamis, 13 Jun 2013

Jaku Sempama

Form 1

Lumur
Jaku Sempama
Reti
1
Genggam bara api sampai nyadi arang

Tunggang ati ngereja pengawa enda mudah ngalah ngapa biar sampai begadai nyawa
2
Enti deka alah enda, enti enggai bisi tau mih nadai
Enti ati sigi amat udah tunggang deka ngereja pengawa, pengawa ti mar dikereja tau mih nyadi mudah tang enti ati sigi enda amat pengawa mudah tau mih nyadi tusah
3
Dilah enda betulang
Kadang-kadang kitai enda berasai tesebutka jaku jai ti tau ngasuh ati orang enda nyamai
4
Baka idung antara mata, dilah antara nyawa
Orang ti ngintu penyarut orang enggau betul enda ari sepiak lalu enda mega ngarika sepiak
5
Lempung sama nanggung, berat sama ngangkat
Maya ngereja pengawa kitai patut selalu besaup enggau pangan diri enda ngira pengawa nya berat tauka lempung
6
Baka ke ngelakuka tajau belah

Orang ke muji anak diri awakka bulih laki tauka bebini jampat agi
7
Baka mayau enggau uduk

Selalu belaya
8
Baka empelekung mabuk ambuh, baka puyu mabuk keruh

Tegenung enda engkebut enda bejaku
9
Baka engkudu mayuh mata

Mayuh ati
10
Baka pinang dibelah dua

Setipak pemajik enggau penyigat
11
Baka Manang ke nangkap semengat

Beguai sereta berumban ngereja pengawa
12
Baka pitak dibuai mata

Nadai kira, nadai daya agi
13
Baka kepayang ngadaka dilah
Semina nemu mansutka jaku enggau penemu tang enggai kiruh ngereja
14
Baka uduk ke labuh anak

Kiruh, ngenjing selalat kia-kia
15
Bengal beruang



Enda tentu ninga tang pama mimit ari tuli
16
Bedau kijang nyungkah bedau ga punggu rebah

Bedau orang nya bisi, bedau ga utai dia bisi gelana
17
Berani babi

Berani tang enda berunding
18
Baka mayau ke ngelamun tai ngena abus

Orang ke ngelalaika penyalah diri
19
Baka pelanduk enda ingatka panjuk

Enda ingatka pekara tauka penanggul ke tau ngenataika penusah

Motivasi Pagi 14 Jun 2013

Semina Gambar Pengiyas aja
Salam Perjuangan Menjulang SMK Datuk Patinggi Kedit.
Yang berusaha Tuan Pengetua Dr. Lambat anak Lindong, Penolong Kanan 1 Cikgu Menchon anak Mering, Penolong Kanan Hem Cikgu Anggat Unding, Penolong Kanan Kokurikulum Cikgu Azmi Abdullah, Penolong Kanan Tingkatan 6 Cikgu Sima anak Unchit, guru-guru kanan, pengawas-pengawas sereta pelajar yang saya kasihi.
Bisi sekali bisi ba menua siti bisi siku raja deka ngatur pekit ngiga orang ti ulih ngarika menua iya ba Lumba Olimpik.  Mayuh macham lumba ke tau dipasuk rayat iya. Raja lalu nesau ari radio lalu nampalka iklan ba serata nengeri enggau genturung pendiau mensia mayuh.
Mayuh mih bala rayat ti tetarit ati lalu bisi ati deka masuk ngarika menua diri.  Ba lumba nyemerai ke diatur ba pegung semerai ba mua istana raja deka milih sapa ti pemadu deras ti bulih timpuh  ke pemadu laju deka diambi nyadi pengari menua nya.
Beratus-ratus mih orang datai ba tebing pegung semerai nya.  Sekeda deka masuk enggau orang nguji diri lalu sekeda deka meda sapa ti pemadu laju nyemerai.  Mc udah berapa kali ngangauka sapa deka nguji diri empu dulu, tang nadai siku berani.  Sida takut nguji diri tajapan endang nemu diri tegar sereta laju nyemerai.  Nya ketegal dalam pegung semerai nya bisi  dilepaska raja,  baya!
Mayuh mih jaku sida, bisi madahka enda patut mih raja baka nya, bisi deka nguji tang ati agi kakang.  Enda mukai-mukai terejun siku orang bujang siku, enggau penapat inat iya nyemerai naka pengelaju deka nyelamatka diri ari dipakai baya dia. Sekejap mata aja iya udah sangkai ba seberai ti endur mc bediri.  Datai dia bala mayuh lalu tempap jari enggau panjung-panjung gaga ke iya ti udah sangkai.
Mc lalu nanya iya “Pama de bakih. Kati asai ati nuan udah sangkai ditu?”
Saut iya, “Sapa ngejuka aku tadi?!” Ku iya enggau mata kuring malik ke seberai .

Ajar manah ti ulih ari cherita tu tadi:  Mayuh kitai enda nemu potensi diri empu, enda nemu diri empu nya bisi penegar ba sesebengkah pengawa kelebih agi ba lumba.  Nya alai latih mih tubuh diri ambika kitai ulih ngarika rumah, sekula, bagi menua enggau menua kitai empu.  Selamat belatih.

Rabu, 12 Jun 2013

Bakul Rutan/Wi

Siti ari pengawa pengelandik jari ti tau mai penguntung ngagai pengaga asil barang nya bakul / tray /setan ti digaga ari rutan tauka wi. Sepemanjai taun 2012 kami sebilik bisi ngasilka mayuh bansa barang ari rutan baka ke di baruh tu:












Musim Buah 2012/13

Musim buah taun tu kelalu mayuh sampai enda alah empa. Dijual pan nadai agi rega laban semua orang mayuh buah magang. Di baruh tu sekeda ari buah ti ulih diambi kami sebilik.













Penemuai Ke Ulu Skrang



BETONG - 15 Julai 2012, 5 iku pengajar ngarika Gerempung Apai Indai Pengajar SMK Datuk Patinggi Kedit bisi ngatur program nemuai sambil matau menua ke Ulu Skang.  Penemuai tu di ketuaika Tuan Pengetua sekula tu empu Dr. Lambat anak Lindong lalu disempulang Penolong Kanan 1 En. Menchon anak Mering, Guru Kanan Bahasa En. Nelson Lunyat, Guru Kanan Kemanusian En. Winston Churchil enggau penulis empu.
Tuju ngatur program tu ke bendar iya kena ngerapatka kaul pengajar enggau apai indai nembiak kelebih agi ngagai bala ari Tr. Ambu Emperan Ulu Skrang.  Penemuai kami sebuat mupuk ari sekula kena pukul 1.30 lemai sepengudah macha sehari nya.  Pejalai berengkah ngerinduka ati laban disambut apai indai nembiak enggau pengaga ati di Pangkalan Murat. Pejalai lima jam enda tentu berasai taja pan bebatak 43 kali nurun sepengelama nengah rantau ngulu ai Skrang.  Pengeransing ati deka datai lalu nemu gaya penyauh pejalai mai tubuh lelak nadai berasai.  Punggung berapa kali dikedang lebuh nurun bebatak tang laban tulang enggau pengeransing ati nya nadai ngenataika penanggul ngagai kami sebala.



Kami mupuk ari Pangkalan Murat kira-kira pukul
2.00 lemai nepan 2 buah perau panjai ti dikemudi En. Bair enggau perau En. Abol (naka Nanga Tebat) udah nya ditukar ngagai perau En. Jada.  Pejalai nanjak ai Skrang ti langkang laban maya nya hari balat amat kemarau.  Pengerindu meda rampa menua enda ulih ditiu enggau jaku.  Rumah-rumah panjai betangkan-tangkan dipansa kami berengkah ari Rumah Mejong sampaika Sekula Primari Nanga Entalau. Ari nya kami neruska pejalai nuju Rumah Panjai Emperan kira- kira pukul 7.00 lemai.

Datai di rumah panjai kami disambut ngena basa temuai, endang udah disayatka babi siku ti penumbas iya pemesai.  Naka pengenyang makai laban ti dijamahka asi olih orang ti nyerumpu kami makai. Mayuh mih randau dikenatai dikusai, betusut enggau randau ruai ti bukai.

Pansut ke ruai kami dilaluka tuai rumah enggau jaku pengelalu.  Iya berasai temegah ati laban kami sebuat ulih ngenataika diri ke remah sida. "Tu keterubah bala pengajar sekondari ke endur anak kami belajar datai nemuai kitu" ku jaku Tuai Rumah Ambu. Iya mega serebanaka menua sida apin datai jalai sereta ngenang pemerinsa beranjungka anak sekula sampai ke pandai.
Pengetua Dr. Lambat anak Lindong mega ngarika kami sebuat mantaika seleka dua jaku ke peransang apai indai nembiak dia nyengulaka anak sida. Iya ngelalau apai indai enda ngasuh sida mantul ngapa enti bedau datai di ujung.  Agi mayuh mih randau bukai semalam-malam nya.  Kami dibantaika ai kopi ti penumbas iya penyamai, ai tuak enggau utai bukai. Enda berasai nyau pukul 3.00 pagi, baru bala nyau belinsur mulaika diri sereta bebai tinduk.  Kami sebuat tinduk di ruai.  Taja malam udah lunggar tang mata aku endang enda ulih tinduk ketegal ti ngirup kopi lebih 3 gelas.  Siti pemanah malam nya tak nadai nyamuk enggau kerengit.  Nitih ke penerang ari tuai rumah, kebuah nyamuk enggau kerengit nadai laban sida ngasika penti lebuh berumah iya nya nusun ramu mesti nitihka punggang, enda tau besundang luntang.

Pagi siti ekspedisi ke diteruska ngagai Sekula Primari Nanga Menyuau, penjalai kia ngena perau panjai enda sampai setengah jam tang kami sebuat dulu nyala, nimbak ikan enggau beambika gambar sebelah niti sungai. Datai di SK. Nanga Menjuau
Nganti ba pendai SK Ng. Menjuau
bala kami lalu niki ke sekula, tang aku empu enda niki ke atas laban ti deka ngujika ginti achar ba sebelah pendai sida, tang nadai nasit pirun. Bala sida disambut laki indai sekula lalu dilaluka sida ngirup kopi. Sepengudah nya sida lalu begambar pengingat enggau bala nembiak sekula dia.


Pengawa begigaka ikan diteruska agi sampai lemai, kami belelak ngetu tengah hari di kerangan makai ikan semah enggau ikn bukai.  Naka pengenyang mih perut laban ti udah lelak sereta baru iya makai ikan semah agi baru ulih. Kami mega bisi bejalai kaki ngulu ai ari pengetu kami nuju pendai orang Lepung Kepayang.  Orang dia benung ngambat van bejual ngena Hilux sangkai di atas pendai sida nengah jalai batang ari kantin semak Sarikei.  Bisi ga bala ari rumah panjai dia berandau enggau kami, dibai sida niki ke rumah kami enggai  Malam nya kami lalu bemalam di sungai Ai Skrang. Kira-kira pukul 2.30 dini hari kami lalu ngidupka diri ngena sup pansuh ikan ke ulih bala nimbak malam nya. Bala ke tinduk ngelingi unggun api. Peninduk kami betilamka batu kerangan lalu beatapka langit. Aku empu tinduk ba kemah ti dibai aku kediri. Pagi nya kami lalu ngundurka diri.  Asai jemu ambun pagi di Ulu Skrang chukup chelap asaika chelap ari dalam opis pengajar ke bisi airkon.
                                                                             
Pemulai kami hari minggu nya bisi empat jam lebih baru datai di Pangkalan Murat. Bisi amat utai ulih sepi aku, ari segi peneleba, kaul enggau apai indai, pengerindu bemalam di sungai enggau begigaka ikan.  Umbas ga kena mantupka tetenguk.
Kena ngujungka jaku aku meri besai terima kasih ngagai semua apai indai nembiak ke udah nulung kami ari pun sampai ke ujung penemuai kami sebuat.  Enda ulih sebut enggau mulut, enda ulih keingatka nama sida iya tang pemanah kita segi bisi Petara malas iya.


Nya aja terima kasih.