Chara Negapka Kaul Entara Menua

Kemaya hari tu, kaul ti tegap entara menua di dunya tu patut dikemeranka semua bansa. Kebuah pia, kaul baka nya meri empas ngagai pengelikun dunya. Enti sema kaul nya bisi pengerunggang sereta beserekang enggau pangan diri dia penyarut deka nyadi. Nya alai, mayuh macam chara ti ulih dikena kitai negapka agi kaul entara menua.

 

Keterubah iya, orang ti bekuasa megai menua di dunya tu patut nyaga komunikesyen enggau pangan diri. Enti pekara tu enda dikemeratka, kitai takut penanggul besai baka perang deka nyadi. Ambika chunto, konflik entara menua baka di Rusia enggau Ukraine ti berengkah ari 24 Februari 2022 sampai sehari tu, ulih diseliahka. Pia mega, enti komunikesyen sida enggau pangan diri manah, perang baka nya ulih dikemadu enggau jampat. Nya alai, menua kitai patut bekerejasama sereta nanggam kaul enggau menua kuasa-kuasa besai baka Amerika enggau China.

 

Kelimpah ari nya, menua kitai enda tau sekali-kali ngachau tauka masuk champur dalam dalam hal politik tauka penyarut menua bukai. Kebuah pia, chara tu ulih nyeliahka menua kitai dikeruga laban enti kirai dulu mungkal ngeruga menua orang kitai tentu nadai chukup pengering nanka menua diri. Ambika chunto, kitai sama nemu menua Malaysia tu ukai menua maju ba pekara aset logistik baka teknologi senyata. Nya kebuah, kitai enda patut masuk champur laban menua kitai udah nyain sempekat Zone of Peace, Freedom and Neutrality (ZOPFAN) ba taun 1971 suba di Kuala Lumpur. Reti nya menua kitai enda tau masuk champur enggau politik menua bukai kelebih agi ba gerempung ASEAN. Empas iya, menua bukai enda masuk champur dalam pekara politik menua kitai mega.

 

Nambahka nya, genap bengkah menua sama bela betulung enggau pangan diri dalam pengawa pemansang. Ngena chara betulung tu mih menua kitai deka maju agi ari semua sukut. Kebuah pia, orang ti bekuasa menua kitai enggau menua bukai sama bela bekunsika penemu senentang chara ngemansangka menua enda ngira nya sektor politik ekonomi enggau sosial. Ambika banding, menua kitai Malaysia ngembuan kaul dagang ba tikas antarabansa nengah Gerempung Pemansang Dagang Luar Malaysia (MATRADE). Nyadi, gerempung tu ulih ngangkatka menua kitai di serata dunya ari segi penatai pemisi menua.

 

Nangkanka nya, menua kitai bebasa sereta nyaga privasi menua bukai. Kebuah pia,  perintah enggau sekeda rayat enda patut negu pekara-pekara sensitif enggaika rayat menua bukai berasai enda nyamai ati. Ulah rayat baka tu tau ngujungka kaul enggau imej menua kitai deka jai sereta mai empas negatif ngagai kaul menua. Nyadi, kitai patut sama bela diau diri sereta ngelaung komen tauka nyebut pekara ti bekaul enggau raja, bansa enggau pengarap ti suah disebut ngena jaku English (3R). Enti pekara baka tu ulih dijaga nya deka mai menua tu likun sereta enda beserekang. Ari nya, menua ti ngemeranka ulah nya ulih bekerejasama lalu bulih pemujur sereta likun agi.  Nya alai, kitai deka ngasaika pengelantang enggau penyenang.

 

Simpul iya, perintah ti megai siti-siti menua patut nemu bejalaika mayuh macham chara dikena negapka agi kaul entara menua. Kebuah pia, kaul tu chukup beguna awakka pengelikun enggau penatai pemisi menua ulih disungkak ngagai tikas ti tinggi agi. Perintah mega diarap seruran meri jaku ajar ngagai mensia mayuh senentang chara negapka kaul enggau menua bukai.

 

 

Dikarang: Zuleyka Viera Nuai Anak Nangok

5 Al 2024

Penguntung Nyimpan Duit Kenyau Ari Biak

Nyebut pasal duit, kitai sigi ngasaika enda kala chukup. Kebuah pia, kitai mensia sigi mayuh pengingin ati deka ngembuan sebarang utai ti dikemisi orang bukai. Kitai betunda deka empu mayuh bengkah kereban taja pan ukai semua kereban  nya beguna tauka semina diguna ba timpuh enda lama aja. Nya alai, ulah nyimpan duit enti bisi laluh belanja ukai budaya. Taja pia, bisi sekeda kitai udah diterenak apai indai besimpanka laluh maya agi biak. Mayuh penguntung ke ulih diulih enti besimpanka maya agi biak.

Keterubah iya penguntung nyimpan duit ari mit tu ulih dikena nyapai juluk ati diri ba pekara mina belanja. Nengah chara tu, kitai ulih nguna duit simpan ti chukup dikena nyapai juluk ati ke diingin ati baka ngembuan kerita kediri empu. Ambika banding, kitai tau nyimpan duit tiap-tiap bulan enda kurang ari RM.200.00. Ari nya tadi enti duit udah chukup kitai nguna duit nya ke bayar deposit tauka bayar pala meli kerita nya. Pia mega, enti deka munka pengawa dagang kitai mesti bisi puku lalu puku nya ulih disediakaka kitai ti udah nabung ari biak. Nya alai, nya ti nyadi pelasar kitai bisi pengelandik mina belanja.

Nangkanka nya siti agi penguntung kitai nemu besimpanka duit tu iya nya ulih ngerari sereta ngurangka tating utang. Nengah ngembuan duit simpan ti chukup, individu enda ibuh bepanggai ba utang dikena nangkup utai ti deka dibeli ke guna ba pengawa tauka pengidup besehari-sehari. Tu deka mantu ngurangka risiko utang sereta meri penegap ba finansial kitai. Kebuah pia, mayuh penanggul enti kitai kelalu mayuh utang ti deka dibayar lalu nya tau ngeruga emosyen.

Nambahka nya, kitai ulih ngembuan pengarap ati enggau pengelikun belanja diri: Nyimpan duit ba umur ti agi biak ngasuh individu bisi pengarap ati enggau pengelikun belanja diri jemah ila. Sida nemu diri bisi duit penabat enti sema dituntung penusah ngenyit baka angus rumah, berubat ke sepital di nengeri, rabat, bebadi di jalai raya enggau ti bukai.  Dikena napi sebarang penusah ngenyit baka nya tauka maya ekonomi enda tentu stabil, duit penabat nya beguna bendar dikena nyalir pengidup semenntara bulih gaji tauka upah ti baru.

Kelimpah ari nya, genap iku kitai patut ngembuan ulah pandai bekelimat ngena belanja. Nyimpan duit lebuh agi biak ulih nerenak perangai tauka ulah bekelimat ngena belanja sereta nemu ngatur enggau mentin belanja diri. Kitai patut belajar enda nguna duit enggau chara ngelui ari pematut lebuh meli barang. Ambika banding, maya di pasar tauka ba kedai, kitai suah amu mata meda utai dijual orang dagang. Nya alai, kitai mesti nemu mida utai ti amat-amat diguna enggau utai ti dikedekaka ati aja lebuh bebelika barang.

Simpul iya, mayuh amat penguntung enti kitai nemu sereta ngemeratka ulah nyimpan duit ari biak laban nya tau nyadi puku ke sanding pengidup besehari-sehari.  Naya alai, lebuh ngenang mayuh bengkah penguntung nemu besimpanka duit lalu ari biak kitai nyadi orang ti pintar ba penemu finansial enggau konsumerisma. Sama-sama mih kitai bekelimat ngena belanja.

Dikarang: Caroline Satok Anak Augustine (5A -2023)

Licha 2: Pemesai Guna Nyaga Rampa Menua

Selamat pagi nuju bala peninga semua. Aku Wlinter Philip Anak Igoh ngarika Kelab Sayauka Rampa Menua deka bekunsi enggau kita semua siti topik licha ke betopik ‘Pemesai Guna Nyaga Rampa Menua’. Meri besai terima kasih ngagai pengatur program tu  laban udah meri aku awak ngenataika licha aku ke pagi tu.

Bala peninga ti dipebasa,

Siti ari pemesai guna enti kitai sama besaup nyaga rampa menua iya nya ulih nyungkak dagang temuai. Utai baka tu ulih nyadi laban pemanah rampa menua kitai udah narit ati bala temuai ari luar datai ngagai menua kitai. Ambika banding, mayuh bengkah palan pengelantang ati enggau rekreasi bisi ditapatka temuai baka Taman Negara Bako, Taman Gunung Gading, Taman Negara Batang Ai enggau mayuh agi ti bukai. Palan baka tu ulih ditemu temuai enti perintah netapka sit-siti taun nyadi Taun Nemuaika Malaysia lalu ejensi dagang temuai Malaysia patut promosyen ngena ‘Kempen Peremisi ke Malaysia’ nengah mayuh kelaing media baka media sosial, media elektronik tauka media chelak. Chara baka tu ulih narit ati bala temuai datai ngagai menua kitai.

Kelimpah ari nya tadi, pemesai guna nyaga rampa menua ti bukai deka dipadahka aku iya nya dikena kitai nyaga mayuh bengkah ekosistem dunya baka biodiversiti spesies flora enggau fauna.  Enti siti ekosistem dikachau, ekosistem bukai mega deka kena empas. Tu tau ngasuh ekosistem enda setimbang lalu ngeruga pengidup mayuh macham spesies.  Rampa menua mesti dijaga enggau manah baka enda betebangka kayu tauka berimba kampung, nyamai mayuh pemanah ngagai pengidup kitai.  Ambika chunto, utai tumbuh gadung nya endang mansutka oksigen ti diguna ba sistem seput mensia enggau mamalia lalu utai tumbuh manstka karbon dioksida ti diguna ba proses fotosintesis. Nya kebuah, kitai anang sesekali ngerusak flora enggau fauna.

Bala peninga ti dipebasa,

 Nangkanka nya, kitai sama nemu diatu dunya kitai udah ngasaika ubah gaya hari tauka ubah klimet.  Pemesai guna kitai nyaga rampa menua tu tau ngelubah sereta ngurangka empas ubah klimet tadi. Pengawa mensia ke ngerusak rampa menua, baka betunuka minyak fosil aba kilang enggau kereban pengangkut sereta berimba kampung enda betatak tau ngasuh gaya hari berubah. Ubah gaya hari tu meri empas negatif ngagai ekosistem dunya. Ambika banding baka tikas ai tasik ti majak niki, kemarau panjai, ampuh bah ngenyit enggau ti bukai. Nya kebuah, kitai mesti nemu pemesai reti ubah klimet tau mai pengerusak baka ti diterangka aku tadi.

Simpul iya, pemesai guna nyaga rampa menua tu mesti dikemeratka laban nya pesaka dunya ungkup generasyen rebak dudi. Kitai sama nemu dunya nya pesaka ti diwaris kitai ari generasyen kelia menya lalu kitai mesti nyaga iya diatu awakka bisi ungkup generasyen jemah ila. Enti kitai enda nyaga rampa menua, anak enggau uchu kitai ila deka diau dalam rampa menua ti rusak sereta enda bepengerai.

Nya aja, terima kasih.

Dikarang: Wlinter Philip Anak Igoh (5A -2023)

Kebuah Kitai Patut Ngetanka Adat Bansa Iban

            Adat mai reti chara idup, prinsip pelasar bejalaika pengidup, budaya enggau pekara ti dipesetuju ba ulah enggau sempekat. Ba pengidup bansa Iban, adat endang mesti dipegai rat laban enti sida ngelaban adat sida deka diukum nitihka adat ti disebut sida Tusun Tunggu baka ke udah dikeluarka ba taun 1993. Nya alai, adat tu beguna amat dalam pengidup lalu kitai mesti ngetanka adat nya.

Siti ari kebuah kitai patut ngetanka adat iya nya adat nya ngayanka identiti bansa Iban. Enti adat enda ditanka, nya ke tau ngasuh identiti bansa deka lenyau. Chunto adat ti agi dikemeranka nyentukka diatu iya nya adat semakai, adat basa, adat pemati enggau mayuh ti bukai. Naka ke diatu, adat baka nya tadi agi ulih dipeda sereta agi ulih dipelajarka kitai kelebih nembiak rebak baru. Nya kebuah, enti adat tu enda dititi entali kitai nyentuk ke jemah ila identiti bansa deka lenyau.

Kelimpah ari nya, adat tu deka mandangka pemanah bansa kitai Iban ke beradat. Pekara tu ulih dipeda lebiuh bisi temuai datai ke rumah panjai. Sekayu rumah panjai enggau naka ulih ngayanka budaya asal Iban baka ngambat pengabang ngena chara berintai di ruai sambil bejalai niti ruai diumba enggau ngepan. Tu siti chara dikena mandangka pemanah budaya ba rumah panjai. Chunto bukai baka ba budaya maya rabat sereta ngulit. Siti timpuh nanggam ulit deka dipesetuju sekayu rumah panjai baikka nya semingu tauka dua minggu. Pekara ngulit tu reti iya enda tau ngintu pengerami tauka rami richah di rumah panjai dalam timpuh ulit nya. Pekara tu mandangka, bansa kitai Iban disebut orang beradat laban semua pengani rumah panjai nya nitihka adat nya enda ngira umur.

           Nangkanka nya, adat ulih ngerapitka kaul entara raban bansa di menua kitai. Ambika banding, di Malaysia semua bansa bisi pengerami bepelasarka jalai pengarap enggau budaya baka Hari Gawai Dayak, Pesta Keamaatan, Hari Raya Aidilfitri enggau ti bukai. Maya hari besai tu mih semua raban bansa sama bela datai ngabang ngagai pangan diri taja pan bebida jalai pengarap enggau budaya. Ari nya tadi, nyata bendar adat maya ngintu pengerami endang diterima sereta nadai penanggul ba semua kitai.

             Simpul iya, kitai anang enda ngetanka adat bansa awakka kitai tebilang sereta dikelala bansa bukai baikka nya di menua tu tauka di serata dunya. Kitiai sama bela ngarapka adat bansa Iban ditemu orang pemanah laban jaku tuai bisi nyebut, ‘dikelala bungai ari kayu, dikelala buah ari langgu, dikelala bansa ari jaku, dikelala basa ari penyiru’. Nya alai, aram mih kitai sama ngetanka identiti kitai enggaika lenyau pia aja lalu tetap dikemeranka nyentukka generasyen ti deka datai.

Dikarang; Jennifer Selah Anak Romula Saging (5A-2023)

Licha 1: Penguntung Nyaga Rampa Menua

             

Selamat pagi sereta meri tabi basa ngagai Tuan Pengetua, Encik Abdul Talip Bin Suliman, bala pengajar enggau bala nembiak ti bisi datai ba pengawa gempuru pagi baka ke sekali tu. Nyadi aku Evelyna Empina ari kelas 5Allamanda deka bekunsi ngagai kita siti licha senentang penguntung nyaga rampa menua beserimbai enggau Minggu Rampa Menua ti diatur ninting taun ba tikas sekula kitai. Topik tu deka ngeang sekeda penguntung enti kitai ngemeranka ulah nyaga pemeresi rampa menua.

Bala peninga ti dipebasa,

              Keterubah iya, penguntung kitai nyaga rampa menua iya nya ulih mantu nyungkak dagang temuai ba menua kitai. Pemeresi rampa menua ulih narit penatai mayuh temuai ngagai menua kitai laban sida rindu deka meda pemeresi rampa menua kitai. Sida rindu meda pemanah rampa menua kitai ti mayuh bukit gadung sepemeda mata lebuh nengah jalai raya. Ari pekara nya tadi sida ulih ngatur aktiviti niki bukit, chunto iya  Bukit Sadok, Bukit Tiang Laju, Bukit Kelingkang enggau mayuh agi ti bukai. Ngena chara nya, sida mega ulih meda mayuh macham spesies flora enggau fauna baka bungai orkid, paku kelindang, spesies jelu siga, mayuh bansa burung  sekumbang ti niki bukit nya.

Bala nembiak semua,

               Nangkanka nya, enti sema kitai nyaga rampa menua kitai mega ulih nyaga ekosistem dunya. Kebuah aku madah baka nya, enti kitai ulih ngetanka spesis flora enggau fauna ba babas menua kitai ti agi bisi kampung asal ti mansutka gas oksigen. Kita sama bela nemu guna gas oksigen ngagai pengidup kitai. Enti sema gas oksigen majak kurang ketegal ari pengawa ngerumpang kampung, ekosistem dunya deka rusak lalu nya tau ngujungka ubah gaya hari. Ubah gaya hari deka ngubah klimet dunya ari bemusin ngagai enda ditemu musin, nya ti disebut orang nyadi ketegal pengangat global.

Sepekara agi, penguntung enti kitai nyaga pemeresi rampa menua, pemakai asal kitai ari kampung agi mengkang beretan. Ambika chunto, bansa Iban enda ulih rari ari begigaka jelu babas baka, babi babas, rusa,  kijang enggau ti ukai. Ukai semina nya aja, kitai mega mesti begigadi sungai laban deka bepakaika ikan baka ikan semah, empurau, tengadak enggau mayuh agi. Enti sema, habitat jelu nyau rusak laban ulah kitai sengaj berumpangka kampung, nya ngujungka penatai pemakai kitai mensia deka pungkang. Nya alai, chara dikena ngetanka ekosistem dunya iya nya kitai enda tau ngerumpang sereta nunu babas sepeneka ati enggaika pemakai asal kitai nadai agi.

Bala peninga ti dipebasa,

             Dikena aku nyimpul pekara ti udah dipejuraika aku tadi, kitai mesti ngembuan pemereti ati pasal rampa menua patut dijaga enggau manah.  Kebuah pia, semua orang patut beserakup nyaga rampa menua laban nya mai mayuh penguntung ngagai kitai. Aku ngarapka semua kitai ulih beserakup nyaga rampa menua.

Nya aja ari aku, terima kasih.

Dikarang: Evelyna Empina Anak Berandak (5A-2023)

Sara Penemu: Filem Malaysia Betikas Antarabansa Nyadi Penyerakup Bansa

Terima kasih tuan chairman.  Selamat pagi ngagai semua bala ti bisi datai ditu kelebih agi, raban hakim, penyaga jam, bala pengajar enggau semua nembiak ti bisi datai ba pekit sara penemu tikas bagi menua.  Aku sekali tu deka nyara pasal, ulih tauka enda filem di Malaysia tu ulih mai penyerakup bansa ti ngerembai datai ba tikas global?

Bala peninga ti dibasa,

Ditu aku deka nanya kita, ulih tauka enda filem kitai Malaysia datai ba tikas dunya?  Aku nyautka kita, ulih.  Keterubah iya, kitai mesti nengkebang pasal fiksyen ti ukai stereotaip aja chunto iya pasal pengerindu bujang dara, cherita pemerindang selama enggau cherita senentang bansa diri aja ti selalu dipeda kitai ba drama Melayu, China, Tamil ari stesyen televisyen bebayar enggau stesyen televisyen perintah.  Filem kitai mesti betikas antarabangsa baka drama tauka filem Hollywood, Korea, Hindi, Thailand, Indonesia enggau ari menua China.  Bisi tauka nadai filem bansa Malaysia udah dipandangka ba stesyen televisyen menua tasik?

Bala peninga ti dibasa,

Enti becherita senentang sejarah filem kitai enda tau ngenang P. Ramlee ti mayuh ngasilka karya jeman 50-an enggau 60-an suba.  Sebut aja nama iya tu, ari orang ti beumur 3 taun ke atas ngelala lalu nemu filem sereta lagu ti dilakun enggau dikenataika iya.  Semina meri chunto aja, iya suah bulih award ba tikas Asia Tenggara enggau di Tokyo, Jipun maya iya agi idup kelia.  Filem baka Bujang Lapok, Antara Dua Darjat, Tiga Abdul, Hang Tuah enggau mayuh agi datai ba tikas antarabansa.  Pekara ti deka aku kenataika ditu iya nya, filem P. Ramlee tu dipeda sereta dikerinduka semua bansa di Malaysia tu ukai semina bansa Melayu aja.  Nya alai, aku setuju amat enti kitai enggau naka ulih beserakup nengah filem endur kitai mantaika cherita ti ngundan mayuh falsafah pengidup, ajar manah, jenaka ti seruran dikeingatka kitai bansa Malaysia. Nya alai, semua kitai enggau enda belampung ati setuju ngaku iya nyadi Seniman Agung Negara semanjai jeman.

Bala peninga ti dibasa,

Kelimpah ari nya, salah enti aku enda nyebut karya kemaya hari tu ti kala dikangauka ngagai festival filem antarabansa baka Olabola ti dikeluarka taun 2016.  Filem tu ulih ngerapatka kaul raban bansa di menua tu laban iya ngenang team main bol Malaysia ti ulih masuk Sukan Olimpik di Moscow 1980.  Sapa enda nemu dalam team sida tu suba endang bisi semua bansa baka Melayu, China enggau India ti nadai bebagi bansa sama mai nama menua kitai ke tikas antarabansa ba Festival Filem Taipei Golden Horse Fantastic (FFTGHT) di Taiwan taun 2016 suba.  Nya alai, aku seratus peratus nyukung filem ti ditengkebang orang ke kreatif ulih bendar nyerakupka semua bansa Malaysia munyi ku rambai jaku, rangkang sebatang mudah dipatah, kayu seberekas enda alah jamah.  

Bala peninga dibasa,

Nangkanka nya, bisi mega filem ti  popular ba taun 2011 udah ngambi pelakun bansa bukai ari United Kingdom ba filem Hikayat Merong Mahawangsa iya nya Stephen Rahman Hughes, Gavin Stenhouse, Jing Lusi enggau bala pelakun menua kitai empu.  Angkat ari nya kitai nemu pengarah filem tu mandangka filem iya ba tikas dunya ngena nama The Malay Chronicles: Bloodlines enggau Clash of the Empires di United Kingdom.  Ari nya kitai meda pemendar pengempu enggau produser filem tu promosyen filem iya awakka menua tu ditemu orang ba tikas dunya. Nya alai aku setuju, ngena chara nya, iya ulih nyerakupka kaul bansa Malaysia enggau bansa bukai di dunya tu.

Enda ditinggal mega, filem ti ditulis ngena jaku Mandarin mega udah popular lalu datai ba tikas antarabansa baka The Journey diasilka ba taun 2014.  Filem tu dichalonka Festival Filem Udine Far East ke-16, Festival Filem Antarabangsa Beijing 2014 enggau Festival Filem Antarabangsa ASEAN 2015.  Ari nya kitai meda seretsa nemu sida nadai milih jaku enggau bansa ti belakun udah ulih narit ati mensia mayuh meda iya datai ngagai tikas dunya.  Enti kitai beratika isi cherita dalam filem tu semina ngenang siku apai indu China ti ngasuh anak iya jadi enggau orang putih.  Nya kebuah, aku setuju enti sida bisi pelakun ti ngena imaginasyen ti tinggi sereta bekarisma udah ulih narit sereta nyerakupka ati kitai enggau bansa bukai ari filem tu.

Bala peninga ti dibasa,

Kepenudi iya aku deka nyara pasal bansa Malaysia ti kreatif tu ulih popular tauka dikelala ketegal ti ayan ba televisyen chunto iya siku anak Iban asil ari tikah champur indai iya enggau orang putih. Iya tu iya nya Henry Golding endang peranak menua Sarawak tu empu.  Iya tu mayuh udah ayan ba program televisyen baka ba filem dokumenteri Surviving Borneo dalam Discovery Channel Asia enggau nyadi presenter ba stesyen televisyen British-Malaysia ari taun 2014 suba.  Iya mega nyadi pelakun filem baka Pisau Cukur nya filem menua Malaysia tu empu, Crazy Rich Asians, A Simple Favor, Monsoon Kit, Last Christmas enggau mayuh agi nya filem Hollywood, Amerika.  Beduduk ari nya, kitai sama nemu, siku-siku mensia enti ngembuan watak ti bekarisma sereta seruran ngingatka penatai diri empu udah ngayanka iya siku ari orang ti udah mujur ba tikas dunya.  Nya alai, aku setuju bendar, iya ulih nyadika chunto bansa kitai lalu ulih ngangkatka nama iya sereta ulih nyerakupka kaul bansa Malaysia.

Bala peninga ti dibasa,

Enggau jaku nya aku sekali agi nyimpul penemu diri, sekali agi madahka filem ti betikas antarabansa endang ulih nyadika penyerakup bansa taja pan kitai bebida ari ba mayuh bengkah aspek baka jalai pengarap, bansa, menua enggau ti bukai.

Nya aja terima kasih.

BULAN BA BANSA IBAN

“Manah hari sehari tu.”  Suah kitai ninga rambai jaku tu dikena munka randau maya betemu enggau pangan diri enda ngira dini-dini baikka nya di rumah panjai tauka di tanah enggau di pasar.  Nama reti lalu nama tuju sida bejaku munyi nya?  Ba penemu aku nya endang besangkut paut enggau chara bansa Iban berunding lebuh muka mata dani pagi.  Enti mata panas bisi cheli-cheli sereta panchar nyau bendang-bendang mantaika mua diri reti nya hari sehari nya dijangka panas. Taja pia, ukai reti jangka kitai betul laban bisi ga sempama ti nyebut rambai jaku ati hari.  Reti nya, budaya bansa Iban bisi gaya pengasai ati tauka mood siku-siku endang bisi diparit biuh gaya hari.

 

Ari kelia nyentukka sehari tu, agi mayuh bansa Iban ti gawa di tanah, nurun ke kebun, ke umai enggau pengawa begiga, ngasu beburu endang begunaka hari ti manah tauka nadai ujan.  Enti hari belunggur ujan kitai ngumbai hari nya jai laban ari nya ulih ngenataika penusah ampuh bah, tanah tusur, jalai lichin, paya rebuh ti nanggul nekul kitai ngereja pengawa sebelah tanah.  Taja pia, sida ti lelaki endang enda masau hari enti hari jai, sida enda duduk changuk-changuk ngapa di rumah.  Maya tu endur sida nyeruri nyeleti atap rumah ti bisi tuduh, nyanggit jala, ngaga buba ensenga, nyepuh ngambuh duku ti enda makai agi enggau mayuh pengawa ti bukai.  Sida ti indu maya tu mih berengkah numbuhka anyam tikai bidai, baka timpa, nenun pua kumbu, gari kelambi enggau mayuh pengawa bukai ti enda alah rintai ditu magang.  

 

Bansa Iban kelia nemu magi taun, bulan, hari enggau jam taja nadai nemu ngitung satu dua tiga baka kitai kemaya hari tu sepengudah bisi besekula nunda ajar orang putih ti mai ubah sereta pemansang ke besai bendar reti ba pengidup kitai besehari-sehari.  Chunto iya taun sida diitung bechuanka pengawa bumai betaun baka rintai iya di baruh tu:

 

No.	Bulan Bumai Betaun	Bulan di Langit	Bulan Orang Putih
1	Bulan Labuh Panggul (maya manggul)	Lima	April
2	Bulan Sandih Tundan (Nebas)	Enam	May
3	Bulan Tujuh @Bulan Tujuh Iban (Nebang)	Tujuh	June
4	Bulan Belenggangka Reban (Sebedau Nunu reban)	Lapan	July
5	Bulan Kelebun/Engkelebun (Nunu)	Semilan	August
6	Bulan Belabuh Benih (Nugal)	Sepuluh	September
7	Bulan Begantung Senduk /Rapas Penyuluk (Mantun)	Sebelas	October
8	Bulan Changuk (Mantap Jagung/ padi ngandung)	Dua belas	November
9	Bulan Buruk Penyedai/Pangka Labu (padi murai)	Satu	December
10	Bulan Empalai Rubai (Matah/Nyumba)	Dua	January
11	Bulan Emperego/Empekap (Ngetau)	Tiga	February
12	Bulan Lelang/Belelang (Berangkut, Ngintu padi, Nyembui, Besimpan) (Lepa pengawa)	Empat	March

Dibali ari: Mr. Philip Langie: Reti Bulan Enggau Bintang. Pegari Vol.61.

 

Bansa Iban mega nemu enti umai sida bisi enda nyadi tau nya sida ngumbai nya salah bulan di langit.  Nya alai, penemu tuai pasal bulan di langit chukup dikemerat maya deka belabuh ngereja pengawa baka nunu,  nugal, nyumba padi enggau pengawa bukai mega.  Sida mega nemu maya ti enda patut meram sereta netas telu manuk ke dikumbai orang bulan buruk jerami. Reti bulan buruk jerami ti iya nya maya padi ti udah diketau kitai dikumbai kitai jerami lalu maya jerami nya buruk nya ti mali netas telu manuk enggaika anak manuk nya buruk burit.  Reti buruk burit nya tai manuk nya anchur lalu lekat di burit lalu ngujungka anak manuk nya mati.

 

Bansa Iban mega nemu ngintai maya ikan ngaban tauka nyaru, ngiga bubuk, ngiga keli enggau lelabi nyuluh pama, nginau nenggau, laban sida ngelala maya bulan baka anak bulan, bulan mansang, bulan surut, bulan belah dua, bulan perenama, bulan mandang kerangan enggau bulan keleman enggau ti bukai.

 

Taja pan penemu pasal bintang enda tentu dikenang sereta dipansik nyangka laban sida kelia enda tentu beguna bintang maya mindah kin kitu tang sekeda bisi ga begunaka bintang ke peduman belayar di tasik luar chunto iya bechuanka bintang banyak, bintang tiga, bintang tunggal, bintang buyu enggau ti bukai.

 

Dikena ngeraup sekali, pelajar sida aki ini kitai kelia pasal rampa menua baka gaya hari, ujan panas, bulan bintang enggau mata panas nya enda ngenalam penemu sains enggau astronomi bansa bukai di Barat enggau Timur Tengah tang enti dipansik manah-manah bisi mih nya pelajar sida pasal nya besangkut paut enggau daya idup enggau adat budaya bansa kitai.