Sara Penemu: Filem Malaysia Betikas Antarabansa Nyadi Penyerakup Bansa

Terima kasih tuan chairman.  Selamat pagi ngagai semua bala ti bisi datai ditu kelebih agi, raban hakim, penyaga jam, bala pengajar enggau semua nembiak ti bisi datai ba pekit sara penemu tikas bagi menua.  Aku sekali tu deka nyara pasal, ulih tauka enda filem di Malaysia tu ulih mai penyerakup bansa ti ngerembai datai ba tikas global?

Bala peninga ti dibasa,

Ditu aku deka nanya kita, ulih tauka enda filem kitai Malaysia datai ba tikas dunya?  Aku nyautka kita, ulih.  Keterubah iya, kitai mesti nengkebang pasal fiksyen ti ukai stereotaip aja chunto iya pasal pengerindu bujang dara, cherita pemerindang selama enggau cherita senentang bansa diri aja ti selalu dipeda kitai ba drama Melayu, China, Tamil ari stesyen televisyen bebayar enggau stesyen televisyen perintah.  Filem kitai mesti betikas antarabangsa baka drama tauka filem Hollywood, Korea, Hindi, Thailand, Indonesia enggau ari menua China.  Bisi tauka nadai filem bansa Malaysia udah dipandangka ba stesyen televisyen menua tasik?

Bala peninga ti dibasa,

Enti becherita senentang sejarah filem kitai enda tau ngenang P. Ramlee ti mayuh ngasilka karya jeman 50-an enggau 60-an suba.  Sebut aja nama iya tu, ari orang ti beumur 3 taun ke atas ngelala lalu nemu filem sereta lagu ti dilakun enggau dikenataika iya.  Semina meri chunto aja, iya suah bulih award ba tikas Asia Tenggara enggau di Tokyo, Jipun maya iya agi idup kelia.  Filem baka Bujang Lapok, Antara Dua Darjat, Tiga Abdul, Hang Tuah enggau mayuh agi datai ba tikas antarabansa.  Pekara ti deka aku kenataika ditu iya nya, filem P. Ramlee tu dipeda sereta dikerinduka semua bansa di Malaysia tu ukai semina bansa Melayu aja.  Nya alai, aku setuju amat enti kitai enggau naka ulih beserakup nengah filem endur kitai mantaika cherita ti ngundan mayuh falsafah pengidup, ajar manah, jenaka ti seruran dikeingatka kitai bansa Malaysia. Nya alai, semua kitai enggau enda belampung ati setuju ngaku iya nyadi Seniman Agung Negara semanjai jeman.

Bala peninga ti dibasa,

Kelimpah ari nya, salah enti aku enda nyebut karya kemaya hari tu ti kala dikangauka ngagai festival filem antarabansa baka Olabola ti dikeluarka taun 2016.  Filem tu ulih ngerapatka kaul raban bansa di menua tu laban iya ngenang team main bol Malaysia ti ulih masuk Sukan Olimpik di Moscow 1980.  Sapa enda nemu dalam team sida tu suba endang bisi semua bansa baka Melayu, China enggau India ti nadai bebagi bansa sama mai nama menua kitai ke tikas antarabansa ba Festival Filem Taipei Golden Horse Fantastic (FFTGHT) di Taiwan taun 2016 suba.  Nya alai, aku seratus peratus nyukung filem ti ditengkebang orang ke kreatif ulih bendar nyerakupka semua bansa Malaysia munyi ku rambai jaku, rangkang sebatang mudah dipatah, kayu seberekas enda alah jamah.  

Bala peninga dibasa,

Nangkanka nya, bisi mega filem ti  popular ba taun 2011 udah ngambi pelakun bansa bukai ari United Kingdom ba filem Hikayat Merong Mahawangsa iya nya Stephen Rahman Hughes, Gavin Stenhouse, Jing Lusi enggau bala pelakun menua kitai empu.  Angkat ari nya kitai nemu pengarah filem tu mandangka filem iya ba tikas dunya ngena nama The Malay Chronicles: Bloodlines enggau Clash of the Empires di United Kingdom.  Ari nya kitai meda pemendar pengempu enggau produser filem tu promosyen filem iya awakka menua tu ditemu orang ba tikas dunya. Nya alai aku setuju, ngena chara nya, iya ulih nyerakupka kaul bansa Malaysia enggau bansa bukai di dunya tu.

Enda ditinggal mega, filem ti ditulis ngena jaku Mandarin mega udah popular lalu datai ba tikas antarabansa baka The Journey diasilka ba taun 2014.  Filem tu dichalonka Festival Filem Udine Far East ke-16, Festival Filem Antarabangsa Beijing 2014 enggau Festival Filem Antarabangsa ASEAN 2015.  Ari nya kitai meda seretsa nemu sida nadai milih jaku enggau bansa ti belakun udah ulih narit ati mensia mayuh meda iya datai ngagai tikas dunya.  Enti kitai beratika isi cherita dalam filem tu semina ngenang siku apai indu China ti ngasuh anak iya jadi enggau orang putih.  Nya kebuah, aku setuju enti sida bisi pelakun ti ngena imaginasyen ti tinggi sereta bekarisma udah ulih narit sereta nyerakupka ati kitai enggau bansa bukai ari filem tu.

Bala peninga ti dibasa,

Kepenudi iya aku deka nyara pasal bansa Malaysia ti kreatif tu ulih popular tauka dikelala ketegal ti ayan ba televisyen chunto iya siku anak Iban asil ari tikah champur indai iya enggau orang putih. Iya tu iya nya Henry Golding endang peranak menua Sarawak tu empu.  Iya tu mayuh udah ayan ba program televisyen baka ba filem dokumenteri Surviving Borneo dalam Discovery Channel Asia enggau nyadi presenter ba stesyen televisyen British-Malaysia ari taun 2014 suba.  Iya mega nyadi pelakun filem baka Pisau Cukur nya filem menua Malaysia tu empu, Crazy Rich Asians, A Simple Favor, Monsoon Kit, Last Christmas enggau mayuh agi nya filem Hollywood, Amerika.  Beduduk ari nya, kitai sama nemu, siku-siku mensia enti ngembuan watak ti bekarisma sereta seruran ngingatka penatai diri empu udah ngayanka iya siku ari orang ti udah mujur ba tikas dunya.  Nya alai, aku setuju bendar, iya ulih nyadika chunto bansa kitai lalu ulih ngangkatka nama iya sereta ulih nyerakupka kaul bansa Malaysia.

Bala peninga ti dibasa,

Enggau jaku nya aku sekali agi nyimpul penemu diri, sekali agi madahka filem ti betikas antarabansa endang ulih nyadika penyerakup bansa taja pan kitai bebida ari ba mayuh bengkah aspek baka jalai pengarap, bansa, menua enggau ti bukai.

Nya aja terima kasih.

BULAN BA BANSA IBAN

“Manah hari sehari tu.”  Suah kitai ninga rambai jaku tu dikena munka randau maya betemu enggau pangan diri enda ngira dini-dini baikka nya di rumah panjai tauka di tanah enggau di pasar.  Nama reti lalu nama tuju sida bejaku munyi nya?  Ba penemu aku nya endang besangkut paut enggau chara bansa Iban berunding lebuh muka mata dani pagi.  Enti mata panas bisi cheli-cheli sereta panchar nyau bendang-bendang mantaika mua diri reti nya hari sehari nya dijangka panas. Taja pia, ukai reti jangka kitai betul laban bisi ga sempama ti nyebut rambai jaku ati hari.  Reti nya, budaya bansa Iban bisi gaya pengasai ati tauka mood siku-siku endang bisi diparit biuh gaya hari.

 

Ari kelia nyentukka sehari tu, agi mayuh bansa Iban ti gawa di tanah, nurun ke kebun, ke umai enggau pengawa begiga, ngasu beburu endang begunaka hari ti manah tauka nadai ujan.  Enti hari belunggur ujan kitai ngumbai hari nya jai laban ari nya ulih ngenataika penusah ampuh bah, tanah tusur, jalai lichin, paya rebuh ti nanggul nekul kitai ngereja pengawa sebelah tanah.  Taja pia, sida ti lelaki endang enda masau hari enti hari jai, sida enda duduk changuk-changuk ngapa di rumah.  Maya tu endur sida nyeruri nyeleti atap rumah ti bisi tuduh, nyanggit jala, ngaga buba ensenga, nyepuh ngambuh duku ti enda makai agi enggau mayuh pengawa ti bukai.  Sida ti indu maya tu mih berengkah numbuhka anyam tikai bidai, baka timpa, nenun pua kumbu, gari kelambi enggau mayuh pengawa bukai ti enda alah rintai ditu magang.  

 

Bansa Iban kelia nemu magi taun, bulan, hari enggau jam taja nadai nemu ngitung satu dua tiga baka kitai kemaya hari tu sepengudah bisi besekula nunda ajar orang putih ti mai ubah sereta pemansang ke besai bendar reti ba pengidup kitai besehari-sehari.  Chunto iya taun sida diitung bechuanka pengawa bumai betaun baka rintai iya di baruh tu:

 

No.	Bulan Bumai Betaun	Bulan di Langit	Bulan Orang Putih
1	Bulan Labuh Panggul (maya manggul)	Lima	April
2	Bulan Sandih Tundan (Nebas)	Enam	May
3	Bulan Tujuh @Bulan Tujuh Iban (Nebang)	Tujuh	June
4	Bulan Belenggangka Reban (Sebedau Nunu reban)	Lapan	July
5	Bulan Kelebun/Engkelebun (Nunu)	Semilan	August
6	Bulan Belabuh Benih (Nugal)	Sepuluh	September
7	Bulan Begantung Senduk /Rapas Penyuluk (Mantun)	Sebelas	October
8	Bulan Changuk (Mantap Jagung/ padi ngandung)	Dua belas	November
9	Bulan Buruk Penyedai/Pangka Labu (padi murai)	Satu	December
10	Bulan Empalai Rubai (Matah/Nyumba)	Dua	January
11	Bulan Emperego/Empekap (Ngetau)	Tiga	February
12	Bulan Lelang/Belelang (Berangkut, Ngintu padi, Nyembui, Besimpan) (Lepa pengawa)	Empat	March

Dibali ari: Mr. Philip Langie: Reti Bulan Enggau Bintang. Pegari Vol.61.

 

Bansa Iban mega nemu enti umai sida bisi enda nyadi tau nya sida ngumbai nya salah bulan di langit.  Nya alai, penemu tuai pasal bulan di langit chukup dikemerat maya deka belabuh ngereja pengawa baka nunu,  nugal, nyumba padi enggau pengawa bukai mega.  Sida mega nemu maya ti enda patut meram sereta netas telu manuk ke dikumbai orang bulan buruk jerami. Reti bulan buruk jerami ti iya nya maya padi ti udah diketau kitai dikumbai kitai jerami lalu maya jerami nya buruk nya ti mali netas telu manuk enggaika anak manuk nya buruk burit.  Reti buruk burit nya tai manuk nya anchur lalu lekat di burit lalu ngujungka anak manuk nya mati.

 

Bansa Iban mega nemu ngintai maya ikan ngaban tauka nyaru, ngiga bubuk, ngiga keli enggau lelabi nyuluh pama, nginau nenggau, laban sida ngelala maya bulan baka anak bulan, bulan mansang, bulan surut, bulan belah dua, bulan perenama, bulan mandang kerangan enggau bulan keleman enggau ti bukai.

 

Taja pan penemu pasal bintang enda tentu dikenang sereta dipansik nyangka laban sida kelia enda tentu beguna bintang maya mindah kin kitu tang sekeda bisi ga begunaka bintang ke peduman belayar di tasik luar chunto iya bechuanka bintang banyak, bintang tiga, bintang tunggal, bintang buyu enggau ti bukai.

 

Dikena ngeraup sekali, pelajar sida aki ini kitai kelia pasal rampa menua baka gaya hari, ujan panas, bulan bintang enggau mata panas nya enda ngenalam penemu sains enggau astronomi bansa bukai di Barat enggau Timur Tengah tang enti dipansik manah-manah bisi mih nya pelajar sida pasal nya besangkut paut enggau daya idup enggau adat budaya bansa kitai.