Selamat Napi SPM

Nuju ngebiak form 5.
Aku ngarika panitia Jaku Iban, meri selamat napi peresa spm ti deka datai kena 23 November 2010 tu.  Pesan aku ngagai kita, ngarapka kita udah besedia ari segi mental enggau fizikal. Kebuah pia laban enti kitai enda besedia kitai empu rugi laban peresa SPM nya peresa ke pemadu iya berat sereta beguna ngagai kitai kena nentuka tuju pengidup kitai jemah ila.

Enti nuan nemu reti peresa nya enda patut nuan empelitaka diri enda ngerunding nama pengawa ti mesti digaga nuan sepemanjai SPM tu bejalai.  Anang enda berunding panjai laban peresa tu aja ke ulih
ngubah pengidup kita sebilik jemah ila. Tips kena kita napi peresa baka tu:

1.  Sediaka kereban ti patut baka kereban nulis enggau kad pengelala sereta slip mija kita.
2.  Maya malam sebedau peresa nya anang kelalu laun tinduk, enggaika maya peresa nya kita ngantuk.
3.  Pagi nya sebedau nuan angkat ari peninduk, nuan enda tau enda besampi ngagai Petara, awakka Iya meri        pengadang ati ngagai nuan.
4.  Datai di dewan sebedau masuk ke bilik peresa, anang begagai tauka betundi meiga-iga.  Fokus ke ngagai keretas ke deka disaut udah nya.
5.  Nuan semina tau macha nota pandak nuan aja tauka formula ke diadang nuan pansut.
6.  Lebuh keretas udah dibagi besampi dalam ati diri, minta berekat ari petara.
7.  Maya peresa bacha manah ke jaku padah (arahan) manah-manah baru nyaut tanya.
8.  Garis (kata kunci) semua tanya awakka enda lari ari tuju tanya nya.
9.  Enti idea enda datai anang panik tang tinggalka tanya nya lalu saut tanya ke bukai.
10.  Saut tanya ke mudah dulu baru nyaut tanya ke tusah agi.
11.  Enti udah tembu anang terus engkendukka pala, tang peresa baru saut ke enda tentu ngemuaska ati.
12.  Kena jam enggau manah, anang masau jam ngapa maya peresa.
13.  Enti udah peresa enda ibuh ngaga pemetul tinggalka aja, tang uji belajarka keretas ke nangakan nya.

Naka tu aja meh tips ke ulih diberi aku ke sekali tu.  Selamat napi peresa SPM.

Terima kasih.

SINDROM UJUNG TAUN

                                                                               Enti kitai beratika nama pengawa nembiak enti udah ujung taun, dia kitai meda sida nadai tentu nemu nama pengawa.  Sida nyaut pengajar " Nadai pengawa agi pengajar".  Mayuh nembiak ke enda nemu nama pengawa ke patut dikereja sepengudah abis peresa ujung taun.  Seraya ke nganti pemutus peresa dikeluarka, nembiak lalu rindu main-main dalam kelas sereta nadai tuju agi.  Sida rindu maya tu laban pengajar nadai ngajar tauka nembuka Turai Pelajar ke udah diungkupka ba taun taun nya.  Sida nembiak ngerunding udah tembu peresa lalu nadai agi pengajar ngajar sida enda ibuh belajar.  Nama kebuah pia?

    

         Siti ari kebuah iya laban nembiak enda nemu nama batang tuju sida datai ke sekula.  Sida tu nembiak ke enda kiruh sekalika sida bulih penemu tauka enda.  Nembiak ke baka tu selalu iya dalam kelas ujung.  Nembiak ke pandai selalu iya  bisi mai bup bacha diri empu baka majalah, novel tauka komik.  Sida ke tengan pemandai bisi mai perengka kena bemain baka  main sahiba, chess, dam, saduku, puzzle enggau ti bukai.  

         Kebatang iya agi mayuh pengawa ti tau dikereja sida iya sepengudah peresa ujung taun.  Enti udah tembu revisyen, ngaga pemetul ke keretas peresa nembiak mesti ngaga aktiviti baka macha kena mereti enggau belematika karya.  Chunto kereban bacha ti tau dibacha nya baka ensera Jerita Asal, Ensera Pelanduk enggau Tekura, Ensera Ruai Enggau Bubut enggau ti bukai.  Ari ti macha bup ensera baka nya penemu nembiak makin nambah sereta ulih ngepunka nembiak ti nemu nengkebang karya kediri. 

          Kepenudi iya, nembiak ulih ngasilka karya baka nulis karang, leka main, jerpan enggau utai bukai.  Nengkabang karya kediri nya ukai pengawa ke senang, ukai semua orang nemu ngasilka karya ke manah.  Iya begantung enggau pengelandik sereta teknik ke betul.  Iya mega bepanggai ba pemayuh kereban ti udah dibacha baka bup teks, surat kabar, brosur temuai, bup cherita enggau ti bukai.

          Kena aku nyimpul penemu tu, mayuh pengawa ke ulih dikereja nembiak enti udah ujung taun, ukai muai jam baka nya aja.  Pekara tu ulih mujur enti pengajar bisi malin sida ngereja pengawa tu enggau manah.  Pengerindu macha enggau ngasilka karya ukai dikereja di sekula aja tang di rumah mega maya kitai kemisi.  Nya alai selamat kemisi ngagai semua kita nembiak semua.  Betemu baru taun baru. 

JAKU BAHASA MALAYSIA KE SUAH DIKENA NEMBIAK DALAM KARANG

Di baruh tu aku ngerintaika sekeda jaku Melayu (Bahasa Malaysia) ti suah dikena  nembiak nulis karang dalam peresa sida.  Reti jaku nya dalam jaku Iban ulih kena nitihka konteks ayat.  Ukai semua reti iya engkeman baka ke dalam kamus (diksionari).  Bisi mega leka jaku Melayu nya dikena enggau salah chara dalam ayat sida.  Nya alai aku minta kita pemacha ngambi chunto ke diberi aku tu ke malin kita.  Enti bisi enda setuju tau beri komen di baruh tu lagi.  Terima kasih.

JAKU MELAYU	JAKU IBAN
AGAMA	PENGARAP/UGAMA
ALAM SEKITAR	RAMPA MENUA
BACA	BACHA
BAHAYA	NGENUSAH
BANDAR	NENGERI/MENGERI
BANGSA	BANSA
BANGSA LAIN	BANSA BUKAI
BERPERANSANG	BEPERANSANG
BUKU	BUP
CEMBURU	CHEMURU
CIKGU	PENGAJAR
CINTAILAH	SAYAUKA MEH
CUCI	TUCHI
CUTI	KEMISI/PEREMISI
DIDENDA	DIUKUM
FAEDAH	GUNA
GAGAL	PIL
HIASAN	PENGIAS
JASA	BUDI/PEMANAH PENGAWA
JENIS	BANSA
KAMPUNG	TUMPUK PENDIAU
KATAK	ENGKATAK/PAMA/BECHI
KELAPA	NYIUR
KEPUTUSAN	PEMUTUS
KERETA	KERITA/MOTOKAR/ENTUKA
KERJA	KEREJA
LANGSUNG	TERUS
LAPANG	LEPA
LULUS	PAS
MANUSIA	MENSIA
MASA	JAM/MAYA
NEGARA	MENUA
NEGERI	MENUA
NYURUH	NGASUH
PALING	PEMADU
PANAU	KERAK DULANG
PEGAWAI	PEMESAI
PEKAN/PASAR	PASAR
PENTING	BEGUNA/BERAT
PERABOT	KEREBAN/PEKAKAS/PERENGKA
PERASAAN	PENGASAI ATI
PERCUBAAN	PENGABAS
PERKARA	PEKARA
PUNCA	PUN
RANTING	DAN
RINDU	LELENGAU/ENDA BETAH
SEDAR	SEDAR/NGELEDA
SERTA	SERETA
SIJIL	SETIPIKIT
SIKAP	ULAH/PERANGAI
SIRAM	PANJAH/TANJAH
SISA	TEDA/LALUH
SUSAH	TUSAH
TAHUN	TAUN
TEGAS	TERIT
TELEFON	TELEFON (sama) nginjau ari English
TERLANJUR	KELANJUR
UJIAN	PERESA
WAJIP	MESTI

SEPIL TI SELALU SALAH MAYA NULIS KARANG BA PERESA

1. ENYAU – NYAU (KIN) – LENYAU (NADAI TEMU)

2. NGERACUN – NGERACHUN

3. NYELIAH KA – NYELIAHKA (j.PENGAWA)

4. NGAMBIKA – NGAMBI KE (AWAK KE) ENGGAI KE (SUPAYA)

5. BESARI-SARI – BESEHARI-SEHARI

6. ARI LIMA – HARI LIMA

7. HARI ATAS – ARI ATAS (JAKU PENEMPAT)

8. NANGUNG – NANGGUNG

9.  AMBIS – ABIS

10. MAIE – MAI

11. SIDAK –SIDA

12. IA NYAK, IA/NYA,  - IYA NYA

13. INIK – INI

14. NAGAI/AGAI/AGI/NGENAGAI/NGAGGAI – NGAGAI

15. KERJA – KEREJA

16. BERSI – BERESI

17. NGAU – ENGGAU

18. URANG – ORANG

19. UKOM – UKUM

20. GOTONG–ROYONG – GUTUNG RUYUNG

21. TONG – TUNG

22. ALAKA – AWAKKA/ LAKKA

23. NGADU RUMAH – NGAGA RUMAH

24. DIYATU – DIATU

25. BAKANYA/BAKATU – BAKA NYA/ BAKA TU

26. TABIK – TABI

27. BAKANI – BAKA NI

Not:  Siti agi penanggul nembiak kemaya hari tu sida enda berasai ngena sepil jaku pandak (SJP) tauka SMS ke dikena kitai nulis lebuh maya nganjung pesan nengah telefon binching.  Penanggul tu enti enda diseliahka tau ngerusak sepil/jaku Iban kitai jemah ila. "Lenyau jaku lenyau bansa".

SEMPAMA IBAN

No.	Sempama	Reti
1	Asai ke pansut ari nyawa baya	Lantang ati laban udah lepas ari penusah/penanggul/pengiruh
2	Asai ke pansut leka mata, Asai ke turun darah mua	Ngasaika pemalu ti pemadu berat lebuh maya nanya indu ke bini
3	Asai ke tinggal pemati	Ngasaika penyunyi menua ketegal nadai pengerami
4	Baka api ke dipanjah ai	Padam tauka ngetu tekala nya
5	Baka api nyerarai ujung tebang	Lembau tauka lubah ngereja pengawa
6	Baka apung balu, rarat ke ili mudik ke ulu ngiga jerangku alai tepanggai	Jaku dikena madahka diri ngiga pangan enggau idup sekunsi begulai sejalai
7	Baka belida nyanda tulang orang	Ngasuh orang ngereja pengawa
8	Baka buah ilang ilu, diempa parai indai, dilua parai ga apai	Enda teseliahka diri ari ti dituntung penusah/penyalah/penanggul
9	Baka empeliau bedua iku	Nelap ati enggau orang, nya kengka utai dikemisi nya ga dibagi enggau orang
10	Baka ke ngerumpang para angus	Berumban tauka beguai-guai enggaika enda sempat
11	Baka manuk pulai ke tansang, baka burung pulai ke sarang	Pulai ngagai bilik penaik diri empu
12	Batu api	Nyabung orang belaya
13	Bebulu ati	Seruran ngembuan pengedi ati ngagai orang
14	Begau nitihka terantang, rayah nitihka gendang	Ngereja pengawa nitihka gaya orang ke nyadi tuai
15	Belakang ga bungkuk diasuh ngema pintu, Lengan ga singkung diasuh nyan alu	Nya utai ke enda diketau, nya ga diasuh kereja
16	Beranchau	Nganchau tikai endur mutarka penyarut ke bisi nyadi
17	Berani nebang berani ngesan	Sengaja deka ngereja lalu sanggup nerima penusah tauka penanggul
18	Indu bantang, indu gang, indu takar, indu gar	Indu ke tebilang landik sereta sikar ngereja pengawa indu
19	Ingkat nemu nyapat lubang kilat, tang enda nemu mampul lubang guntur.Bengkang nemu nensang lubang nyang, tang enda nemu mampul lubang lambur	Amat nyadi tuai megai adat tang ukai semua laya enggau chara ulih diatur magang.
20	Injau kara	Injau lalu diempu/enda dipulaika agi
21	Lelabi makai gaji, tekura terima upah	Sama reti enggau chapi empu nama kerebau empu lemak. Lain orang ke ngereja pengawa lain orang ke empu penguntung
22	Luchuk Purih	Punas/Nadai anak/Nadai purih
23	Mai jari sepuluh	Datai tauka nemuai ngagai orang nadai utai dibai-bai
24	Makin peluh makin bekayuh, Makin lelak makin berumpak	Liat ati ngereja pengawa enda bedulika diri udah lelak
25	Mantap bemban ai ngemalu mua diri, Mantap bemban batu ngemalu mua diri empu	Jaku dikena nanya indu dipansutka raban ari lelaki ke madahka diri datai mai pemalu laban indu ke deka ditanya nya apin temu bisi tauka nadai, deka tauka enggai
26	Meranggang jari	Enda tentu tan megai tauka naruh utai
27	Munyi daun Gawai	Munyi orang rami baka ke bisi begawai
28	Munyi ke charutka tui	Munyi orang bekelakarka penemu ngelaban pangan diri
29	Munyi ke ngakika umai	Inggar lalu serap-serap bepantapka utai
30	Munyi ke ngerendai	Munyi jaku ngelaban orang belaya tauka munyi letup senapang ti nyau beterachat ditimbakka ngelaban munsuh
31	Munyi ukui labuh gelung	Gaga ati lepas ari kungkung orang
32	Nadai ati	Nadai pengerindu/nadai niat
33	Ninggang luan ninggang papan, Ninggang bilik ninggang penaik, Ninggang tikai ninggang balai	Tanggung penusah tauka penyalah
34	Nyempelah bangah enda ditunu, ngeregau lachau niki alu	Seredah, sebarang utai sebut tauka kenang
35	Nyuaka pala nyurungka patung, Nyurukka tunjuk nyurungka rekung	Marukka diri ngagai orang ketegal udah ngereja penyalah, ngichaka orang ulih ngampun penyalah
36	Orang Engkari madahka diri nadai besi,dinga tak besehari-sehari ngambuh duku, Orang Skrang madahka diri nadai pinang, peda tak bekechirak ga baruh dagu, Orang Julau madahka diri nadai semakau, peda tak bekeliau ga api ruku	Ngemaruhka diri tang ke bendar iya mayuh bendar penemu tauka landik ngereja pengawa
37	Pantak ngelambai/nyelawai	Nyambar sekejap aja lalu rari
38	Pungka lelaki baka manuk	Regas, bagak, rajin sereta kering lalu nadai orang bukai ulih ngalahka iya
39	Puni taju tedung, puni taju remaung	Indu dara ke udah ditanya lelaki lalu udah ditinggalka tinchin ke kelai seduai deka jadi melaki bini
40	Rapit jari	Tan/teguh megai tauka nyimpan utai lalu enda mudah meri iya ngagai orang bukai
41	Raung ke beketebung, pama ke betanda,	Orang bukai ke empu pengawa, kitai ke ngiruh/ngisuk diri gaga
42	Raung ke ngandung, pama ke bepenti, Lutung ke beketebung, empeliau ke bengkak jari	Bulih pengiruh, penusah, pengelelak tauka pengerugi ketegal pengawa orang bukai
43	Ripung nadai rekung dibai ke tegalan, Sawa nadai pala dibai ke penian/tenian	Orang ke nadai chukup penemu dibai mutuska penyarut/laya
44	Tawang landik bedagang diajar ga bebeli, Sebaru landik merau diajar ga ngemudi	Orang ke endang udah landik, udah nemu enda ibuh diajar kitai agi laban iya endang udah nemu ari kitai
45	Tebak sengkilu diri empu	Bulih pemedis tauka penusah ketegal ari jaku tauka ulah diri empu
46	Tinggang dilah	Enda ditusui abis utai ke ditemu enggaika ditemu orang magang
47	Tubai langkung	Gaya orang ke deka bendar diumba tauka dilangkung ngereja pengawa

 Ditusun:  Pengajar Lungah Jayan.

                 x- Pengajar Kedit