KEBUAH KES DISIPLIN NEMBIAK SEKULA DIATU MAJAK NYADI-SENYADI.

Ba dunya ti udah ngalih ngagai jeman globalisasyen enggau modenisasyen tu, kes disiplin nembiak tau dikumbai majak nyadi senyadi enda salah baka api ke makai sekau. Kitai suah amat tepedaka kes disiplin nembiak diayanka ba dada surat kabar enggau disebut bala deejay rradio. Kes disiplin nembiak ti majak nyadi baka tu meh ti balat ngirauka ati mensia mayuh kelebih agi bala apai indai nembiak ti ngereja kes disiplin ti baka tu.
Siti ari kebuah kes disiplin nembiak tu majak nyadi iya nya mudah kena parit bala kaling ti serambau enggau sida. Kitai sama bela nemu, nembiak kemaya hari tu, kelalu amat beratka kaling sida. Ambika banding, enti kaling sida mai sida nginsap, sida pan alah umbuk bala kaling sida laban enggaika enda diterima ba raban sida. Bala sida ke beraban-raban tu meh ke mudah agi marit bala nembiak bukai ngereja pengawa ti enda bedisiplin baka nginsap, teruan sekula, bepakaika pil, dadah, bejudi, belaya enggau ti bukai.
Kelimpah ari nya mega, bepun ari tempias pengawa ti diseleda sereta ditunda sida ari media massa mega tau ngasuh disiplin nembiak majak nyadi ba sekula. Kitai sama nemu, kemaya hari tu media massa baka televisyen, internet, majalah, filem enggau ti bukai mayuh amat ngayanka ulah sereta pendiau pengidup kitai besehari-sehari. Ambika banding, apai indai nembiak ti bisi agi penatai pemisi tentu melika anak sida komputer dikena belajar. Tang enda sama enggau runding anak sida ti ngena computer nya semina ke pengerindu ati aja baka bepedaka ‘website’ ti enda manah ba internet. Pia mega enti sida meda cherita ba televisyen, sida mudah agi kena parit empas ti jai enti dibandingka enggau empas ti manah ari ti meda filem ari televisyen nya tadi. Mayuh agi pekara ti diayanka ba internet endang nadai ditapis dulu sebedau diayanka ngagai mensia mayuh. Ambika chunto, chara kaul enggau ulah ti enda manah sereta chara bepekayan orang putih ke diayanka ba internet sigi jauh betingkah ari chara kitai. Tang nembiak rebak diatu mudah agi deka nunda chara ti baka nya ti tau ngasuh sida enda bedisiplin.
Nambahka nya mega, atur sekula ti enda tentu terit baka dulu suba tau ngasuh disiplin nembiak sekula majak nyadi. Dulu suba, nembiak ti enda pas peresa enda ulih nampung pelajar sida ngagai ke tinggi agi. Ambika chunto, enti enda pas peresa pom tiga, enda ulih nampung pelajar ngagai pom empat. Kebuah pia laban nembiak suba disarap senentang pengelandik, penemu, pengeregas enggau pemereti ati ngambika ulih nyadi chunto ke nembiak rebak dudi. Enti dibandingka enggau kemaya hari tu, semua nembiak diberi peluang sekula sampaika umur 17 taun, udah nya baru sida bisi disarap ngagai pom 6. Bala nembiak ke ngereja ulah baka nginsap, bebukut, teruan sekula, bejudi enggau ti bukai enda dibuai sekula. Sida ke ngereja ulah baka tu semina diberi ukum ti enda nitihka pemerat penyalah ti dikereja sida ba sekula. Kemaya hari tu, sida semina digantung sekula aja dalam kandang seminggu tauka dua minggu.
Ukai semina naka nya aja, ketegal ari ke pechah ruang bilik mega tau ngasuh nembiak ngereja pengawa ti enda manah. Penusah ruang bilik tu nyengkaum enda sepenemu, sarak, belaya diri melaki bini ketegal ti kurang penatai pemisi enggau ti bukai. Penusah ti baka tu tau ngasuh anak sida rari ari rumah ngiga pengelantang laban diau di rumah semina nambahka penusah. Apai indai ti belaya diri melaki bini lalu enda kiruh ke anak agi. Anak sida ngasaika sida jauh ari apai indai, lalu nadai utai nanggul ngereja pengawa ti enda menuku. Tu ngujungka kes disiplin majak nyadi, baka sempama udah ga chelum iya ga digelintum.
Kepenudi iya, nadai ngembuan pengarap ti teguh dalam pengidup tau mega marit kes disiplin nembiak sekula majak nyadi. Berindik ari penemu ti mabu senentang jalai pengarap tu, dia bala nembiak enggai alah bulu enti dibai orang ngereja pengawa ti enda manah. Kitai sama nemu, tiap-tiap pengarap ti dikembuan kitai sama bela bisi ngajar kitai reti jalai pengidup ti betul. Kebuah pia, jalai pengarap tu tau ninding kitai ari tepawah ngereja pengawa ti enda manah. Ambika banding, orang ke megai pengarap Kristian arapka Sepuluh Pesan ti ngajar sida awakka anang bula, anang ngenchuri, anang betenah ke orang, bebasaka apai indai enggau ti bukai.
Nya alai, dikena kitai nyeliahka penusah ti baka tu majak nyadi, kitai sama megai tanggung pengawa mutarka penanggul tu lalu enda patut nyerahka tanggung pengawa tu ngagai siti-siti pemangku pengawa. Kitai patut mutarka penanggul tu enggau chara ti betul laban nembiak kemaya hari tu meh ke nyadi tuai kitai megai menua dudi hari ila sejarit enggau pemansang ti majak nyadi senutuk enggau Wawasan 2020.
Dikarang,
Sheera ak Abol (5A)

NEMBIAK REBAK DIATU KURANG AMAT BASA ENTI DIBANDING ENGGAU NEMBIAK REBAK DULU. PADAHKA KEBUAH UTAI TU TAU NYADI.

Kemaya hari tu, kitai suah bendar tedingaka senentang nembiak rebak diatu ti kurang basa majak nyadi, tu tau ngujungka nembiak bukai ti sama enggau iya begulai enda nyamai diau dia. Kelimpah ari nya, tu tau ngenyaika nama apai indai. Kes nembiak ti enda nemu basa tu bisi nyadi ba semua tempat ba dunya tu, tau disemaka baka beras enda tau nadai antah. Nembiak rebak diatu kurang amat basa laban mayuh kebuah.
Nembiak rebak diatu kurang amat basa laban anak diatu kurang ajar ari apai indai. Apai indai kemaya hari tu nadai hari ka begulai enggau anak sida. Sida kelalu kiruh ngigaka anak belanja kena nupi pengidup sida. Maya sida gawa, anak-anak sida ditinggalka di rumah kediri. Bala apai indai nya ngarapka bala anak sida ngaga pengawa ti manah maya sida nadai di rumah. Tang, anak sida tu tadi ngaga ulah ti enda manah lebuh apai indai sida nadai ba rumah. Kelimpah ari nya, apai indai sida enda nemu nama ulah ti digaga bala anak sida maya besekula. Sida semina nemu anak sida iya bisi nurun ke sekula. Sida mega enda nemu sapa bala bakih anak sida ti enggau sida begulai. Apai indai mesti nemu ulah ti digaga anak sida maya besekula tauka maya apai indai nadai ba rumah.
Kelimpah ari nya, nembiak rebak diatu kurang basa laban bala nembiak kemaya hari tu mayuh kena parit pekara ke diseleda ari media massa. Chunto media massa tu iya nya baka televisyen, internet enggau filem. Media massa tu ngujungka sida bejai pangan diri, bula, tinggi jaku, enda nemu besebar jaku enggau suah empegal-empegal. Taja pia, enda semua media massa tu ulih meri tempias negatif ngagai bala nembiak kemaya hari tu. Tu tau disemaka baka sekerat kasam bulat anang ngumbai seudat-udat bulat magang. Baka nya mega, enda semua anak-anak bulih tempias ti negatif tu. Sekeda ari sida nemu berunding pekara ti manah enggau ti jai.
Nembiak rebak diatu kurang amat basa laban sida agi kena parit gaya pengidup orang nengeri. Sida kena parit gaya idup orang nengeri baka enda ibuhka pangan diri, enggai betulung, kurang kaul enggau pangan diri sereta sumbung. Tu tau ngujungka nembiak rebak diatu enda bebasa ke orang bukai enda ngira orang nya tuai tauka biak. Lebuh maya sida suntuk teparuk pengawa baka nya tau amai mai penusah. Tu nyadi laban sida nembiak rebak diatu kurang amat basa serta kaul enggau orang bukai. Sida mega nadai orang endur sida minta tulung lebuh maya sida bisi dituntung penusah.
Kelebih agi, nembiak rebak diatu kurang basa laban sida mega kena parit bala pangan serambau enggau sida. Nembiak rebak diatu suah agi alah dibai pangan diri ngaga pengawa ti enda menuku baka sempama alah bungkang laban genalu, nyadi ke perangai enti udah tuai besai. Nembiak bukai mega nunda ulah sida ke disemaka sempama nya tadi. Bala nembiak rebak diatu kurang amat basa laban sida enda nemu milih bakih ke manah tauka jai. Enti sida salah pilih kaban, nembiak rebak diatu enda nemu chara bebasa ke orang bukai. Nya meh, bala orang ke tuai selalu madah, enti salah pilih bakih, kitai tau ngaga ulah ti enda menuku.
Nembiak rebak diatu kurang amat basa enti dibanding enggau rebak ke dulu menya laban sida enda nitihka pengarap tauka kurang telebaka enggau jalai pengarap. Semua kitai ba dunya tu bisi pengarap magang. Semua pengarap di dunya tu ngajar kitai bebasaka orang bukai. Ambika chunto, pengarap Kristian bisi Sepuluh Pesan Petara ngagai orang ti megai pengarap Kristian nya. Sepuluh Pesan Petara tu ulih kena ninding diri ari tepawah ngereja pengawa ti enda manah. Nya alai, kitai mesti nitihka pengarap ti dipegai diri empu. Pengarap tu ulih nulung kitai bejalai ba jalai ti betul.
Bala nembiak rebak diatu patut ngetanka pemanah basa belama iya nyentukka jemah ila awakka nembiak rebak jemah ila enda kurang basa ke orang bukai. Enti kitai nemu masa orang bukai, orang rindu begulai enggau kitai. Tu ulih disemaka enggau sulu jaku, dikelala buah ari langgu, dikelala basa ari penyiru, dikelala bansa ari jaku. Basa kitai ngayanka bansa kitai.

Dikarang: Domenic Engkin (Pom 5A)

Jerita Tuai

NGAMBI BANDIR TAPANG

Cherita antu tu bisi kena pansa pending aku maya aku agi mit suba baka ke ditusui aki aku. Nyadi cherita tu nyadi ba aki aku maya iya agi bujang.
Nyadi dulu kelia, orang Remabong agi diau ba rumah lama kami suba di ulu Remabong, entara menua enggau Maja. Diatu menua nya dikumbai Tembawai Remabong. Nyadi sekali, aki aku enggau menyadi iya sereta apai seduai bebai ngiga bandir tapang di Tembawai Tanjung di menua Manduh. Kenu ku orang tuai, menua Manduh tu endang sigi menua ti bisi utai nyelai. Ba menua nya orang selalu ninga tauka tepedaka antu.
Datai sida tiga di Manduh, sida lalu berengkah ngiga bandir tapang. Benung ke kisuk begigaka bandir tapang nya, dia deh sida tiga bisi ninga munyi orang ngangau ke sida tiga. Dia aki lalu nyaut kangau orang nya, tang sida nadai meda orang bukai kelimpah ari sida tiga. Meda baka nya, sida tiga pan enda ibuh ke utai nya agi tang kangau orang nya tadi meruan didinga. Meda baka nya, sida tiga sama ngetu enda engkeretik laban sama belabaka kangau nya sigi kangau antu.
Tak enda mukai-mukai dinga sida tiga puchuk kayu tak munyi ke dipangkaka kudi, nyau beguyat baka ke digusak. Malik sida tiga, peda antu tak benung ragau-ragau naka pemesai!! Dipeda sida tiga baju antu nya bechura kuning lalu tanchut dikena iya semina ngelamun pala patung. Meda utai baka nya, dia apai seduai lalu deka nimbak antu nya tang apin sempat iya ngachitka senapang, antu nya pan lesap. Udah nya, sida tiga sama bebai pulai lalu sama bepekat enda nusui utai ke nyadi nya ngagai orang bukai.
Malam nya, aki tuai lalu bemimpi betemu enggau niang apai Mawar. Dalam mimpi nya apai Mawar madahka iya meh ke muru sida tiga lari laban bala kaban antu udah bebai deka ngulihka sida tiga. Udah bekau ke bemimpi nya, aki tuai pan lalu sakit balat nyentukka nyau ka parai. Iya selalu amat chelap bulu sereta semampai enda lantang ati. Meda iya baka nya, dia sida serumah lalu belian ke iya. Nyau kedua kali belian nya baru iya gerai baka selama.
Nya alai, enti kitai bejalai di kampung jerung enti nyema kitai bisi ninga orang ngangau, lalu batang tubuh orang nya nadai dipeda, kitai anang sekali-kali nyaut kangau orang nya.
Dikarang: Jenny Liman (3B 2011)

PEMANDAI PELAJAR SEKULA

Pemandai pelajar sekula
Pesaka ti pemadu beguna
Semua mensia berebutka iya
Iya ngasuh kitai bisi kuasa

Aka, adi nurun kitai anang betugau
Baikka kitai di rumah panjai tauka di langkau
Semua kitai anang enda enggau
Enggaika kitai baka orang ke bejalai
Bejalai nadai tenggau
Enda nemu ABC tebalit tunsang

Sapa ke nadai pemandai sekula deka rugi
Deka nesal dudi hari
Patut kitai diatu belajar enggau mutus ati
Runding bukai dulu yar ke tisi
Giga meh pemandai ti mai kitai nuju penyenang

Anang sekali-kali alah laban pemuruk
Laban pemuruk ngasuh kitai suntuk
Lebuh mendingka pengajar anang ngantuk
Enggaika utai ti diajar enda masuk
Lalu kitai deka nyadi orang lansang

Anang ngelaban pengajar enggau atur sekula
Enggaika kitai diukum orang ke bekuasa
Nya alai semua pengajar patut dipebasa
Sereta dikasika belama
Sida ke ngelalau laban kasih sereta angkun
Awakka kitai menyana
Lalu titihka bansa orang ke udah mansang.

Dikarang: Jessica & Constance (4B)


PANTUN BELAJAR

Enti ke pasar meli besi
Besi dibeli chukup besai
Pengajar ngajar mesti ngasi
Laban iya ke penunjuk kitai

Pulai ari pasar meli petai
Petai dibeli di pasar Betong
Enti kitai bisi pemandai
Jemah ila bulih penguntung

Lebuh kitai nurun ke umai
Anang enda ingai bebai tugal
Enti kitai bisi pemandai
Meri pengelantang nyadi ke bekal

Enti lemai besabung petang
Aram kitai nurun mukat
Belajar bebendar jalai pemansang
Jemah ila nyadi orang bepangkat

Begagai-gagai di ruai besai
Betundi kitai lalu bebuti
Ingatka ajar orang ti tuai
Nya meh nyadi peransang ati



Dikarang: Syrianie, Sherelyn & Shillen (4 Sastera ll)

Ai Ansah / Timang Ai Kena Masa Orang

Tu ai peremat Gemala Puchat
Ulihku nangkap di pusat Tedung Gemala
Kapa-kapa landik sentika nyua taring
Datai ari Nanga Bebuli
Nginsap denjang batang Jementi Sukat
Enti lemai munyi ti besanggai
Enti pagi landik betekatap
Munyi sayat Sekalai Bujang ambai sangkung

Tu ai terutu gemala layu
Ulih aku nangkap di iku raja naga
Lisa-lisa ngemeranka puncha tampuk tanah
Datai ari Nanga Meriu Babu
Denjang batang Sabang Bakung

Tu ai tebas bungkal mas
Baruh suluh nampak di segi miga begelung
Tu ai dedak gemala perak
Ulih ku mansap di untak kuang kana
Bunsu antu Raja Genali
Berumah di titi engkalam ribai
Begundai cerai birai-birai nepas patung

Tu ai tebas bungkal mas
Ulih ku muntas di kandung nibung
Baruh suluh bintang sereni
Nampak di segi miga begelung
Nya alai kelia menya sepa jaga
Diau di ulu pengabis ai
Penumbuh matahari
Ngentam di kaki Bukit Nimung
Datai ari tanah langgung tatah
Madang kunyit nempuah bau wangi
Tak ngaba bau balung datai ari langgun landai
Sekapan bidai sana Jawa
Mesai sambang gung senugung

Tu ai riu sera nyawa
Anak lelaki udah dipulah
Darah Ijah Dayang Ani
Datai ari entali bebuli nginsap
Mesai daun birah raya
Sekapan dada tekura takung
Tu ai tangkai raba binjai
Ngasuh gerai ngerak mata
Udah dipulah Dara Ijah Dayang Ensangai
Datai ari sungai tujuh nanga ulu ili enda dikelala
Ka siti ti nyerupa nyengala kebung
Udah tikam Dayang Sudan enggau chuan
lapan leman sembilan belas bansa
Dampar leka lada chantung
Udah tinduk semilu batu pesuk beluyang
lubang
Kandang alam baling butul berekung
Bai pansut ke ruai berimbai enggau kitai
duduk betugung
Dia iya nyembur mua butul
Bekeludas burit gelas tumbuh chap lumur 4
Udah sedia gambar burung
Ai ili empa dulu disepi
Kena aku nabi kitai ti berintai duduk betugung
Enti kita ari nya bisi jaku salah anang nunda lalu
ngayung
Enti kami tu bisi agu bejaku sama berarang
Tulung tikung awak kitai manah begempung
nadai bingung juluk ati

Karang,
Viviana Chin (1B)

KAI SEDUAI TILAN

Nyadi Kai seduai indai iya diau ba langkau kediri ba tebing sungai. Kai agi mit, udah ga tegar belanda. Seduai mindai bumai betaun baka orang mayuh. Taun nya, hari balat endar tak selalu ujan. Nyauka ninting hari. Nya alai ai selalu bah. Lalu pia mega indai Kai jarang endar ulih turun ke umai.
Nyau maya padi mansau agi ga hari selalu lunggur. Hari siti, hari bisi ngetu ujan tang ai agi mengkang bah. Sebedau indai Kai nurun ngetau, iya dulu berapi ke Kai. Udah tembu berapi, indai Kai lalu nurun ke umai ninggalka Kai ngibun langkau kediri.
Bisi sekali, maya nyauka tengah hari, dia Kai ninga orang tak bisi ngangau. Munyi nyawa nya tak datai ari pendai.
“Ni nuan Kai?” ku nyawa orang nya. “Tu aku, di langkau tu,” ku Kai nyaut.
Kai angkat lalu nilik ari mua pintu. Dia deh iya tepedaka siku ikan tilan tak benung bejalai nuju langkau seduai mindai. Datai ba kaki tangga, ikan tilan nya lalu niki.
“Ni indai nuan Kai?” ku tanya ikan tilan nya. “Udah kumai, ngetau,” ku Kai. “Udai makai nuan Kai?” ku Tilan. “Apin,” ku Kai. “Bisi asi nuan Kai?” ku Tilan.
“Bisi sependi-pendi, seperiuk-riuk….ka makai nadai lauk,” ku Kai.
“Oh, iku aku ulur,” ku Tilan.
Kai lalu nanggarka periuk. Tilan lalu ngulurka iku iya dalam periuk.
“Enti ai udah angat lagi, tanggung periuk,” ku Tilan. “Au meh,” ku Kai.
Udah ai berasai angat, Tilan ngasuh Kai nanggung periuk. Lalu makai meh Kai seduai Tilan belauk ai iku Tilan. Kai semina ampit mimit aja asi laban enda tan laban Tilan. Udah kenyang makai, Tilan pulai ke ai baru tang iya bepesan enda ngasuh Kai madah ngagai indai iya.
Nyau lemai nya baru indai Kai pulai. Kai enda madah ngagai indai iya pasal Tilan ti ngalahka iya makai laban takut ke Tilan ninga. Gaga meh Tilan lalu laban iya ulih makai asi Kai tiap-tiap hari. Nyau kepuas, dia deh ati indai Kai tak irau meda tubuh Kai nyau makin kurus. Lemai siti, maya seduai menyanak makai, indai iya nanya Kai.
“Nama kebuah nuan tak kurus deh anak, nama aku tak selalu ninggalka nuan asi maya aku turun?”
Lama Kai enda bemunyi laban Kai ingatka semaya Tilan enggau iya. Nyau kelama nya baru Kai nyaut.
Badu enda meh indai, maya nuan nadai, Tilan datai ngalahka aku makai,” ku Kai madahka indai iya.
Pagi nya indai Kai enda turun. Iya ngambi duku sebilah lalu diansah iya nyentukka tajam. Udah nya iya lalu ngajar Kai, “lagi anak, nama Tilan datai, nuan anang madahka aku bisi di rumah. Enti iya mai nuan manduk iku iya, nuan anang nanggung periuk nya dataika ai nyau melidih,” ku indai ngajar Kai.
Kira hari nyauka tengah hari, indai Kai lalu belalai ba belakang pintu semak dapur. Enda lama udah nya Tilan lalu datai. Baka selama, Kai lalu nanggarka periuk alai manduk iku Tilan ke lauk seduai. Udah periuk ditanggar, Tilan lalu ngulurka iku iya ke dalam periuk. Udah ai berasai angat, Tilan lalu ngasuh Kai nanggung periuk. Kai enda nanggung periuk tang majak manduk iku Tilan nya. Nyau melidih ai, dia Tilan nyau rauh-rauh ngasuh Kai nanggung periuk. Pansut indai Kai ari endur iya ke belalai lalu netak pala Tilan. Nama agi deh, lalu tama dalam periuk meh bangkai Tilan lalu dipanduk seduai menyanak. Kenyang amat seduai makai belauk Tilan tengah hari nya.

Dibali ari ensera ti ditusui:
Tunai ak Lembat.

Ditulis:
Arreonissa Jane Cindy (3B 2011)

60,000 Nembiak Kitai Gian FB

Nembiak ngabiska pengelama 4 jam sehari neresa internet, suah nipu, antisosial (enggai begulai enggau orang).

KUALA LUMPUR: Kira-kira 60,000 nembiak ke beumur entara 12 ngagai 18 taun di menua tu ditemu ngabiska sekurang-kurang empat jam sehari neresa internet kelebih agi laman sosial Facebook (FB).

Gianka internet kelebih agi FB nya ngujungka nembiak nya suah nipu, enchuri, antisosial enggau berubah nyadi orang ke jampat ringat enti sema pengingin ati sida enda dijapai.

Enti sema pengawa gianka laman sosial tu enda ditagang, iya ulih mengenataika mayuh macham empas negatif baka teruan sekula enggau pengawa ke salah sereta antisosial. Nya jaku ti dipansutka Mohd Fadzil Che Din, Pengarah Institut Sosial Malaysia.

Kelimpah ari nya, sekeda ari sida nya deka ngasaika sebening pala, pedis mata sereta pedis perut ketegal ti ngurangka timpuh tinduk enggau belelak ke chukup.

Pengarah Institut Sosial Malaysia (ISM), Prof Madya Dr Mohd Fadzil Che Din, bisi madahka pengawa nembiak ke gian neresa laman web tu nyau majak balat sampaika sanggupngeransi enti sema ditagang ngena perengka online.

“Nembiak ke gian internet tu sanggup teruan sekolah enti sema di rumah sida nadai komputer. Enti duit poket enda chukup, sida sanggup enchuri, asalka ulih ngagai siber kafe,” ku iya lebuh ke ditanya Berita Harian, kemari.

Mohd Fadzil mega madah, neresa internet diatu nyadi sebagi ari pengidup sehari-hari sida sereta seruran ngasaika pengidup ti sunyi enti sema enda beinteraksyen enggau kaling FB.

“Sida mega ngasaika diri nyamai enggau likun agi bekomunikasyen nengah internet sereta ulih nasalka pemansang interaksyen terus entara mensia,” ku iya.

Iya mega enda bebula enti orang ke gian laman web tu sebaka enggau gian dadah ke tusah diubat laban nya siti ari chara mantu iya beinteraksyen.

Ku iya, bisi mega kes sekeda nembiak ke sanggup agi badu kereja ari ke ngurangka timpuh sida kena neresa laman sosial tu enti sema diasuh milih.

“Enti sema gianka laman sosial tu enda ditagang, iya deka nambahka mayuh empas negatif baka teruan sekula enggau pengereja pengawa salah sereta antisosial,” ku iya.

Pakar Perunding Kanan Psikiatri enggau Psikoterapi Universiti Putra Malaysia (UPM), Prof Dr Azhar Zain, madahka gianka laman sosial ulih ngenataika pengelelak fizikal enggau mental ke chukup balat.

Iya mega madah, pengawa tu tau ngachau jam biologi nembiak sampaika ulihngachau hormon, sistem pengetan tubuh kurang kelimpah ari meri empas ngagai mental.

“Lebuh maya timpuh ke patut nya dikena neresa internet, iya ulih ngasuh pnembiak nya lelak fizikal enggau mental sereta kosentrasyen belajar sida makin kurang,” ku iya.

Pensyarah Jabatan Psikologi Pendidikan enggau Kaunseling Fakulti Pendidikan, Universiti Malaya (UM), Profesor Madya Dr Mariani Md Nor, madahka perening enggau runding ke kelalu lama ngagai internet deka ngasuh nembiak lebih deka agi kediri.

Ku iya madah, sida mega ngembuan perangai individualistik kelimpah ari ke mudah tepejuh ngagai laman web kamah laban utai nya mudah amat digiga sereta ulih dipunggah masuk ngena semina telefon binching aja.




Diambi sereta diambi ari : Berita Harian
10/10/2011

Betemu Baru

Minta ampun amat-amat aku ngagai bala ke kala neresa ngelawa blog aku tu ngelama tu, tak nadai hari amat-amat aku deka nambahka penemu diri dalam blog aku tu laban ke umba enggau pemayuh pengawa nyadi pengajar. Enda kala puang jam meh nya.

Enti nitihka ati deka aku bebagi setiap hari penemu diri ngagai kitai semua, tang kati ku gaya nya meh, nama daya enggau kira diri enda chukup rapas penyuluk, enda alah kempuk tanah seberai, enda alah ditunduk orang ke enggai. Tak malu meh aku di lempedu kandang kerigai, deka ngiri bansa diri enggau penemu ke kurang pemandai, tak kawe me mua diri baka ke udah di pechara akim besai, meda blog tu tak udah beberapa bulan enda diseleti dijereki ngena pagar tebelian rangkai.

Tak irau meh aku ba pendiau enggai makai bedamai, enda kala asai ati baka tu meda diri enda ulih mantaika jaku. Bisi ati sinu ke diri tang nadai ku enggau, nama kitai udah mungkal udah nanjal, anang surut di julut lubang ribut, anang malik ke belakang enggaika meda rangkang ngachuk mata, anang enda laju meh kitai baka peluru leka senapang, anang enda regas meh kitai baka upas kesulai tandang.

Niat ati deka negika jaku bansa diri, enggaika jaku kitai tau rimpi mabun pagi, enggaika jaku kitai tak madang mabun petang. Laban ke bepegai ba pengeransing ati diri deka negi deka bebagi ke jaku diri enggau bala anak asi, takutka jaku kitai apas enggaika ayas bansa, laban jaku nya nunjukka bansa, munyi ku jaku sempama ke nyadi malin kitai "Dikelala bunga ari langgu, dikelala buah ari kayu, dikelala bansa ari jaku.

Langgur Penemu Ti Patut Dipejuraika Kena Nagang Penyai Ulah Ba Nembiak Sekula Ari Majak Nyadi.

(Pertandingan Esei Kenegaraaan Tahun 2009 Bahasa Iban) Tempat Kedua Peringkat Negeri)

Olih: Edward Anak Rampai & Lajing Anak Entegar

Semua apai indai ba dunya tu endang bisi ngembuan juluk ati ti chukup besai ba pengidup sida iya nya deka meda bala anak sida nyadi orang ti beguna sereta ulih mai pemansang dikena niri negika bansa diri empu. Nya alai enggau naka ulih sida ngena tulang empat kerat begigaka belanja dikena nyengulaka bala anak awakka bulih pengidup ti menyana kedudi ari ila. Sida endang semampai besampika anak sida awakka bulih penemu sereta mujur dalam semua pengawa lalu bulih pengawa ti menyana dudi hari ila. Ari tu kitai ulih nemu pengarap apai indai endang besai ngagai tiap iku anak sida. Enggau liat ati sida naka ulih ngemesaika bala anak sida ngambika ulih ngangkatka sida sebilik, bansa enggau menua. Kelimpah ti deka meda anak mujur dalam semua pengawa, apai indai mega rindu meda bala anak ngembuan ulah enggau perangai ti menyana sereta lurus ati lalu nemu mai diri enda milih dini endur sida diau. Naka meh penusah ati sida sereta anchur meh pengarap enti nyema sida nemu bala anak sida ngereja pengawa enda menuku lebuh besekula. Semua kitai nemu kemaya hari tu, penyai ulah ba nembiak sekula ti makin hari makin nyadi. Tu ti balat bendar ngirauka ati mensia mayuh kelebih agi apai indai ti bisi anak ka benung besekula. Sida endang semampai nyimpan pengirau ati sempama baka ti ngembuan telu di ujung tanduk. Mayuh orang madah penusah tu nyadi beduduk ari kaul ti enda tentu manah ba siti-siti ruang bilik. Taja pia, baka ni jalai kitai ulih nagang penyai ulah ba nembiak sekula sereta nama langgur penemu ti patut dipejuraika kena nagang penyai ulah ba nembiak sekula ari majak nyadi?

Langgur penemu  keterubah ti manah dikena nagang penyai ulah ba nembiak sekula iya nya ngemeranka ajar pengarap ba tiap iku nembiak sekula.  Tu siti langgur penemu ti chukup manah laban semua pengarap  ngelalau mensia mayuh ngambika begulai  manah enggau pangan diri enda ngira bansa enggau pengarap siku-siku orang.    Kelimpah arinya, pengarap sigi nagang bala  mensia ngereja pengawa ti jai.  Enggau tu apai indai  patut ngiri anak sida enggau ajar pengarap belabuh ari anak sida agi mit ngambika ajar pengarap ulih nyadika tungkat sida lebuh ti jauh ari apai indai.  Ambika chunto, sida ulih mandingka pengawa ti manah enggau ti jai belalauka ajar pengarap sida.Tu ti ngujungka sida berunding dulu sebedau ngaga sebarang pengawa kelebih agi lebuh ke jauh ari apai indai sida.  Enti nyema sida nadai kala diajar pasal pengarap, sida sigi nyamai labuh lalu jampat alah laban umbuk bala pangan sida ke bukai ngereja pengawa ti enda manah baka ngirup ai bisa, main judi, nginsap, nginsap gam, enggau makai dadah.  Bepun ari sida ke nadai pengarap meh ti ngujungka sida enda ngelala pengawa ti tau ngerusak pengidup sida empu.  Iya ke bukai, pengarap ulih nagang nembiak sekula ngereja pengawa ti jai laban ba siti-siti pengarap bisi ukum iya empu.  Nya alai endang bendar meh ajar pengarap tu ulih nagang penyai ulah ba nembiak sekula ari majak nyadi.

                 

                  Kena nagang penyai ulah ba nembiak sekula, semua sekula mega patut ngembuan atur ti terit.  Kebuah pia laban atur ti terit ulih nagang nembiak sekula ngereja pengawa ke enda manah. Kelimpah ari nya, atur sekula ti terit ulih meri penangi ngagai nembiak sekula ti deka nguji ngaga pengawa ti enda menuku laban sida nemu ukum ke ulih sida ari ngereja pengawa nya endang berat.  Atur sekula ti nagang bala nembiak sekula bebaika insap, arak telefon binching sereta pil, siti atur ti ulih nagang penyai ulah nembiak sekula.  Nya alai ukum ti berat patut diberi ngagai nembiak ti ngelanggar atur sekula.  Bala pengajar mega patut manggil apai indai nembiak ti ditemu ngereja penyalah awakka sida nemu pendiau bala anak sereta lalu besaup ngajar sida.  Saup ari apai indai nembiak endang utai ti dikarapka bala pengajar. Kelimpah ari ka ngukum nembiak, bala pengajar mega patut meri jaku puji ngagai bala nembiak ti nunjukka teladan sereta ulah ka manah.  Kebuah pia, jaku puji ti manah ulih ngelembutka ati semua nembiak sekula lalu ngasuh sida ransing ati ngereja pengawa ke manah.  Siti agi, pengawa bala nembiak sekula ti beambai patut ditagang laban nya tau bendar ngenataika penusah sereta ngerusakka nama sekula enggau sida sebilik enti nyema sida nyau tekelanjur ngereja pengawa ti enda manah.  Ukai ngajihka rangkang ngachuk mata tang kitai sama nemu penusah ti baka tu suah amat nuntung bala nembiak sekula.  Nya alai semua sekula patut neritka agi atur sekula ngambika ulih nagang utai ti baka tu majak nyadi.

Langgur penemu ke bukai dikena nagang penyai ulah ba nembiak sekula iya nya, bala pengajar patut ngemeranka bala nembiak sekula ngambika sama bela ngambi bagi dalam pengawa lumba enggau main.  Kebuah pia, pengawa tu ulih ngelimpangka nembiak sekula ari ngereja pengawa ke enda manah baka nginsap, nginsap gam, bejegau ba pasar enggau ‘main entung’.  Tambah mega ngemeranka pengawa ti baka tu tau bendar nyerakupka kaul bala nembiak sekula enggau bala pengajar. Nya alai bala pengajar patut beketup sima ngangkatka pengawa lumba enggau main ba sekula laban pengawa ti baka tu ulih ngurangka penyai ulah ba nembiak sekula.  Kebuah pia, laban tu ulih nulung nembiak sekula ngelarika diri ari ngereja pengawa ke enda menuku laban sida nyau kiruh enggau orang sama bela ngambi bagi dalam pengawa lumba enggau main.  Enggau tu mega sida ulih nambahka pengerai tubuh sereta penemu dikemisi sida.  Sida diajar ngambika semampai nitihka atur awakka ngembuan ulah ti manah.  Nya alai bala pengajar patut nyelitka sekeda ajar ti tau ngasuh sida nemu berunding panjai maya pengawa lumba enggau main.  Tu nunjukka pengawa lumba enggau main endang siti jalai ti manah bendar dikena nagang penyai ulah ba nembiak sekula.     

                 

                    Kelimpah ari nya, apai indai mega patut nangkan sereta nunjukka teladan ti manah ngagai bala anak sida.  Jaku ajar ti manah tau bendar nyadi ke tenggau sereta lalau bala anak lebuh ke jauh ari apai indai.  Ambika banding apai indai patut ngelalau anak sida awakka enda nginsap, belaya, berebutka indu, lalu ngajar anak sida ngambika selalu dampih enggau pengajar sereta begulai manah enggau pangan diri lebuh ba sekula. Jaku lalau ti munyi nya tau ngasuh anak sida nyadi nembiak ti mereti, bebasaka bala pengajar enggau bebasaka atur sekula.  Apai indai mega patut selalu meri awak ti chukup kena begulai enggau bala anak sida.  Lebuh ke begulai enggau bala anak, apai indai patut enggau naka ulih nunjukka ulah ti manah ngagai bala anak sida.  Kebuah pia laban apai indai meh ke  nyadi chuan enggau teladan bala anak sida. Kelimpah ari nya apai indai mega patut madah sereta  ngajar enggau jaku ti manah lalu anang jampat datai jari ngagai anak sida.  Kebuah pia laban nangika anak nya tadi mai pengeringat ati sida ngagai sekula lalu ngujungka sida ngelepaska pengeringat nya tadi ngena chara ti enda manah baka enggau orang belaya.  Apai indai mega enda patut ngelirika anak sida ngirup ai bisa lebuh maya bisi pengerami laban tu tau bendar ngujungka anak sida mai pengawa tu ngagai sekula.  Nya alai jaku tangkan enggau teladan ti manah ari apai indai amat beguna kena nagang penyai ulah ba anak sida ti benung besekula.

            Iya ke penudi, saup sereta sukung mensia mayuh mega beguna bendar dikena nagang penyai ulah ba nembiak sekula. Kebuah pia laban enti enda ari saup enggau sukung ari bala mayuh penyai ulah ba nembiak sekula endang tusah deka diseliahka.  Ambika banding, sida ti bejualka insap enda patut sekali-kali nyual insap ngagai sida ti agi bedau chukup umur.  Sida enda patut semina ngerundingka untung aja tang patut ngerundingka penusah ti nyadi ketegal pengawa sida nya.  Kelimpah ari nya, apai indai mega anang sekali-kali nguji ngasuh bala anak sida melika sida insap lebuh maya anak sida nurun ke kedai.  Bala polis mega, patut nginau semua kedai ti bisi nyual VCD laban bisi sekeda sida ti endang semina begigaka untung aja lalu nyual VCD ke enda betuku ti enda patut dipeda bala nembiak.  Nya alai ukum ti berat patut dikenaka ngagai sida ti endang bisi ditemu ngelaban atur tu.  Bala apai indai patut  mega besaup nyukung bala pengajar ngambika sama ulih nulung bala pengajar nagang penyai ulah ba nembiak sekula.  Sida patut sama bela datai enti nyema bala pengajar bisi muka aum lebuh hari apai indai betemu enggau pengajar nengah Gerempung Apai Indai enggau Pengajar.  Ari nya mega apai indai ulih begulai enggau pengajar kena ngerapatka agi kaul sida enggau pengajar.  Sida enda patut lepas tangan lalu ngelakka pengajar aja ngemataka anak sida tang patut besaup enggau pengajar awakka pengawa ti berat tau nyadi lempung lalu teputar enggau jampat sereta manah.  Nya alai saup ari mensia mayuh endang chukup beguna kena nagang penyai ulah ba nembiak sekula.

Enti ditetak ngena jaku pandak, lalu disimpul enggau betul, penyai ulah ba nembiak sekula ukai semina tau ngerusak nama sekula tang kelebih agi ngagai sida sebilik.  Nya alai, kitai patut besaup nagang penyai ulah ba nembiak sekula lalu enggai meda sekeda apai indai ti ngereja pengawa baka nirika ubung basah, baka nudukka mangkuk belah sepemanjai sida udah merambunka nyawa ngemesaika anak sida ngambika ulih nyadi orang ti beguna ti tau mai pemansang ngagai sida sebilik.  Kitai mega nemu pengidup ngangkatka diri bujang dara endang penuh enggau penguji.  Semina orang ti kering pengarap lalu bisi saup ari sida sebilik enggau bala pangan ulih nempuh semua penguji nya.  Baka nya mega pengidup bala nembiak sekula ti endang suah amai kena penguji ti mai sida ngereja pengawa enda menyana dikena ngemuaska ati diri enggau pengawa ti enda betul baka nginsap, ngirup arak, bejudi enggau beambai.  Tang sida enda sedar sida udah ngerusakka pengidup ngujungka sida jauh limpang ari jalai ti bendar.  Nya alai sama-sama meh kitai begempung lalu betulung enggau pangan diri dikena nagang penyai ulah ba nembiak sekula ari majak nyadi.  Sida nembiak ke dudi endang dikarapka niri negika bansa enggau menua kitai.  Munyi ku jaku tuai kelia, baka wi tampung tali baka rutan tampung danan.  Parai orang ke tuai ganti orang ke dudi.

SURAT NEMBIAK

Tabi Pengajar Kaunselor

Aku tu siku nembiak ti beumur tujuh belas taun.  Aku besekula ba SMK Datuk Patinggi Kedit ba bagi menua Betong.  Ba sekula tu aku mayuh bendar pangan enggau begulai.  Aku mega berasai gaga ulih bekaban enggau sida.  Pangan aku mega sama kelas enggau aku.  Aku besekula ditu mula ari pom satu nyentuk ke diatu.

Sekumbang aku besekula ditu aku mayuh macham ulah ti jai.  Aku selalu ponteng kelas laban nitihka bala pangan aku.  Meda sida selalu teruan kelas aku pan ponteng mega,nitihka sida.  Kelimpah ari nya aku selalu mega tinduk dalam kelas.  Maya pengajar ngajar aku selalu amat ngantuk lalu ngujungka aku enda ulih fokus ngagai utai ti diajar pengajar.

Kelimpah ari nya mega, aku mega bisi penanggul lebuh ngaga kereja rumah.  Aku enda kala ngaga kereja rumah ti diberi pengajar.  Kadang-kadang maya aku ngaga aku selalu enda betanya ngagai bala pangan ti nemu.  Enti aku ngaga pan, aku selalu nunda kereja rumah bala pangan ti udah tembu.  Aku sigi enda kala ngaga kereja rumah kediri.

Aku mega selalu ngelaban jaku pengajar.  Lebuh pengajar ngelara aku selalu ngelaban jaku pengajar.  Nya alai aku baka ke enda peduli ke pengajar ngajar ba mua.  Kebuah aku ngelaban laban aku enggai ngaga kereja rumah.  Lebuh pengajar ngajar mega aku selalu nimbal jaku pengajar lalu ngachau pengajar ti benung ngajar.

Keterubah aku besekula ditu suba, aku endang orang ti mereti.  Tang nyau kelama-lama, aku mega enggau bala pangan aku nginsap.  Aku deka nguji nginsap laban deka nguji asai nginsap.  Bala pangan aku ti bukai sigi lama udah nginsap.  Mula ari nya aku enda ulih muai ulah aku ti deka amai nginsap.  Sampai diatu aku agi nginsap.  Aku diatu nguji deka badu nginsap.  Aku diatu mega jarang nginsap, laban aku deka ngetu nginsap.  Aku mega rua belanja dikena meli insap.

Nya alai aku minta penemu enggau tuling ari nuan pengajar, nyangka icha ulih dikena ngubah diri.  Aku mega ngarapka pengajar meretika penanggul aku dalam sekula.

Nya aja, terima kasih

                                                                                             Ari aku
                                                                                             Bujang Bepenanggul.                                                                                               
Ditulis: William Nanggai 5A