.JPG)
Tak malu di lempedu kandang kamai aku tu, laban ngenang udah setaun nampun di
bukit sebulan nandan di langit aku enda ngindik di penaik blog Jaku Iban Kedit
tu. Ukai aku mungkal aku nanjal, ukai
sengaja ukai senika, nya ketegal ari pengelupa, ukai dikedeka tang ari
pengelina ari pengawa ke dikereja nyau enda jena. Sehari tu udah nyadi pagila, pagila udah
nyadi lusa, lusa udah nyadi hari nya, hari nya udah nyadi ila-ila ujung-ujung
enda-senda.
Ngumbai diri mayuh pengawa enda ga, ukai nya pengawa aku tu baka sida menteri ke pedis pala berundingka menua, ukai mega aku baka sida professor
ke lelak bepikirka teori mutarka mensia.
Tang laban ari ansak pengerindu bukai ti mai aku anyut baka penganyut
batu kuai, rarat baka pengerarat suar ratai.
Mayuh bendar penanggul ke enda ulih diseliah ku jaku, ngereja batang pengawa
diri nyadi pengajar, ku ati deka musinka gasing pangka nyinuk, mutarka
sempuling runding anak bansa ngena chara nunjuk ke utai ti betul sereta ngena
nadai bepasuk ke engkerimuk di kaki bejalai. Limpang mih runding penengkebang
tudah aku, kumbai kitai nyamai nusun leka jaku segena sereta menuku, enti nyamai
lapa enda semua kitai ke ngumbai diri Iban ngerang nguji nengkebang blog kediri
empu dih, nunda bala orang putih ke bepurih nemu semua utai.
Minta ampun mih tudah diri laban ninggalka kita pemacha
lebih setaun dua tu ngena cherita enggau berita baru ti ditempa sereta ngena ke
peransang, pengelantang kitai idup di dunya Sarawak ngindang. Berengkah ari
sehari tu aku deka bepun baru nambahka jaku gerah, jaku tesau, jaku tenggau,
jaku peransang, lubang pengerawang.
Minta ari kita mih aku kena nambahka penemu diri empu awakka blog tu tau
mujur sampai ke jemah ila.
Ari perati sereta palik kita ke pemacha sereta bala ke
sanggup lekat betasatka maklumat ditu aku meri besai terima kasih .
Arapka kita ngasuh
aku ngena artikel ari utai ti ditengkebang kita ambika ulih dipasukka dalam
blog aku tu.
Nya aja ari pengarang,
Ibantracker 3013.
Tiada ulasan:
Catat Ulasan