SEMINA PEMERINDANG AJA

SADIN 1

Bisi sekali, beberapa taun ke udah kejang deka gawai, bisi siku indai orang sama bela nurun ke kedai bebelika barang/perengka kena gawai. Mayuh udah mih barang ke udah iya ambi nganti ke mayar, tang mata iya agi majak gining-gining ngiga utai. Agi bisi mih utai ke apin dipeda iya. Mata iya majak malik ngagai tugung endur orang nusun sadin. Peda iya nadai ga bansa sadin ke deka iya beli. Iya lalu bejaku ngena slang ulu: "Cina, bisi sadin chap Iban" ku iya nanya. Tauke nyaut "Sadin nama nya ah?".  Ditandu iya baru "Sadin Chap Iban".  Tauke  enda nemu. Nyau kelama, iya bejaku baru. " Sadin kena ngaga kuih nya dih cina" ku iya nambah. Udah berunding tauke lalu ngeruk siti kutak ba belakang rak lalu mantaika 'Planta'. Tu ukai? ku tauke. Nya mih iya, iga ga nuan enda nemu, berapa nya tauke?  Bala orang ke bisi dia sama bepalik pangan diri, sambil nguingka bukai.

PLANTA

Bisi sekali apai tuai orang nya bebelika barang ba Everise. Dia iya lalu tepedaka utai siti.
"Apu nih, nama planta bansa baru tu nyamai enda kini?" kenu ku iya.
"Beli aja mih tu. Nyepi asai iya" ku iya baru.

Iya lalu ngambi planta nya sereta dibayar ba kaunter. Datai iya di rumah iya lalu ngambi ruti paun laban deka diempa iya enggau planta bansa baru nya.

"Peiii!!! nama asai utai tu tak pedar!! Palui sida ke ngaga planta baru tu!" ku iya sepengudah iya nyepi planta nya.
"Nama nya aki. Nama utai ke diputapka nuan nya?" ku uchu iya nanya.
"Nya tu ah? Planta bansa baru tu tak nyelai asai iya!" ku iya nyaut.
"Planta bansa baru? Apa penama planta baru nya deh aki?" ku uchu iya nanya baru
"Eh enda aku nemu nyebut iya. Tu sepil iya, dinga nuan....." ku aki iya.
"Au... sepil dia" ku uchu iya baru.
A...X....I....O....N ........!!!!!

SADIN 2

Bisi sekali nembiak sekula siku (dipelabaka Taun 1), mai apai iya meli sadin. Datai ba kedai, apai iya ngasuh iya milih kediri. Apai iya nyau meli barang bukai.
"Ngujika sadin rimau," ku ati nembiak nya. Iya lalu nyengkau setin sadin rimau ke bendar nya beer Tiger.
Datai di rumah, iya lalu makai belaukka sadin rimau nya tadi.
Udah makai, iya lalu gali. Apai iya enda ibuhka iya maya nya.
Meda anak iya lama amat tinduk, dia apai iya lalu ngabas anak iya. Datai dalam bilik, apai iya lalu ngerak anak nya tadi. 
"Lama amat dek tinduk, wat." ku apai iya.
"Tak ngasuh palaaku bepusin sereta lembut tulang sadin rimau nya tadi, apai. Nama tak kuah aja dih, nadai isi?" ku anak iya.

Apai iya lalu ke dapur. Datai ba dapur dia iya tepedaka setin Tiger udah diirup.

Sumber: forum engkabang.