RENTAP LIBAU

      Rentap tauka nama bendar iya Libau diadaka di Skrang. Rentap dikumbai Raja Darat tauka Raja Ulu. Iya mega nyadi tuai bansa Iban di Batang Skrang enggau Batang Saribas. Lebuh kayau ti keterubah nyadi maya taun 1857, dia alai Charles Brooke mai raban soldadu iya kurang lebih 3500 iku bala Iban enggau 500 iku Melayu. Bala raban Charles Brooke nyerang Kuta Rentap di Bukit Sadok. Rentap enggau raban iya malas ngena bedil ti diberi nama Bujang Timpang Berang.

            Kayau ti kedua nyadi maya taun 1858 ti betuaika Charles Brooke nengah jalai ngulu Batang Layar. Sida mega nunu enggau nyerang rumah panjai raban orang ti nyukung Rentap di Batang Saribas. Sepemulai sida ari menua Julau, bala soldadu Charles Brooke nuju ngagai Bukit Sadok deka nyerang Rentap. Ba kayau tu sida Rentap mujur ngalahka Charles Brooke enggau bala raban soldadu iya.

            Ba taun 1861,Charles Brooke sekali agi nyerang Rentap ba Bukit Sadok.  Raban soldadu Charles Brooke bejalai kaki deka ngelancharka perang.  Kayau ke sekali tu, sepemayuh 12  puchuk bedil udah dibai sereta enggau sepuchuk meriam ti digela Bujang Sadok.  Charles Brooke besemaya deka meri 40 igi Tajau Rusa ngagai Nanang seduai Luyoh nya orang ti nanah Rentap ngelama tu.  Charles Brooke nunduk sereta mudi Nanang enggau Luyoh ngasuh berunding dulu pasal utai ti disebut iya maya nya.  Pengawa nya udah mujur mechahka bala Iban Saribas enggau Iban Skrang tang enda ditemu Rentap.  Udah iya nemu pekara tu Rentap ringat bendar lalu ba kayau sekali tu kuta ti didirika Nanang enggau Luyoh ba kaki Bukit Sadok ulih alahka Charles Brooke.

            Urung bulan Oktober 1861, bedil Bujang Sadok mujur nimbakka tujuh belas igi peluru lalu ngerubuhka setengah ari kubu Rentap.  Rentap malas timbak enggau ngena Bedil Timpang Berang tang bedil enggai nyadi dikena agi laban darah Ranjau ti kena timbak ba bau ngasuh ubat bedil nya basah lalu nadai ulih kena bala Rentap malas timbak agi.  Nemu diri enda tealahka Charles Brooke sekali tu Rentap ngasuh bala iya nyurut kediri ngagai Bukit Lanjak lalu terus ngagai Kerangan Pinggai, Ulu Wak Pakan  Ba Ulu Wak mih endur Rentap mati lalu dilumbung ba Bukit Sibau dalam taun 1870.

 

Diambi bali: Gloria Emilly Gading Ak. Sigat 4A

PEMANAH DIAU DI RUMAH PANJAI

             Kemaya hari tu nyau nadai mayuh agi kitai Iban ti diau mendam ba rumah panjai. Ambika banding, maya bisi pengerami tauka bisi pengawa ti berat baka Gawai Dayak, rabat, melah pinang enggau ti bukai, bisi bala kitai ti diau sereta udah bisi rumah kediri di nengeri enda pulai ke rumah panjai.  Taja pia, mayuh macham pemanah enti kitai diau ba rumah panjai.

            Pendiau pengidup kitai ba rumah panjai endang bebida enggau di nengeri. Taja pia, rumah panjai tu endang identiti asal kitai bansa Iban. Reti iya, bansa kitai dikelala di dunya tu ketegal pendiau sereta pengidup asal kitai menya endang berumah panjai. Rumah panjai tu nyadika endur alai kitai diau. Pengawa kitai ke agi diau ba rumah panjai tu nyadi siti pekara ti ulih dikena kitai ngetanka identiti bansa diri ari deka punas. Ambika banding, baka pengawa kraf baka nganyam, betenun, ngukir enggau mayuh agi pengawa di rumah panjai. Kitai mega temegah enggau main asal baka ngajat, pepencha, betabuh, bepantun, berenung enggau mayuh agi ke bukai. Bansa pemakai mega bisi bida enti dibanding enggau pemakai orang kemaya hari tu.  Chunto iya, baka manuk pansuh, mayuh bansa kasam baka kasam ikan, kasam jani, lulun upa pantu enggau mayuh agi ti enda alah sebut ditu.

            Kelimpah ari nya, rumah panjai tu seruan endur kitai berami enggau betundi. Ambika banding, maya hari Gawai Dayak, bala orang ti gawa di nengeri pulai  ke menua sama bela enggau apai indai diri ke tinggal di rumah panjai ngintu pengerami  nya. Maya pengerami nya, endur ti di kumbai ruai  nya endur ti digaga alai bebuti enggau begagai. Ruai tu siti endur di mua kaki lima beantara enggau bilik ti disapat ngena dinding ukui. Lebuh ngintu pengerami, ruai tu mih palan kitai meda bala nembiak tauka sida ti tuai ke nemu pasal budaya asal sereta pengerami bansa baru diatu dibantaika seraya ke bebuti enggau pangan diri.

            Rumah panjai ukai semina ulih endur berami, bebuti enggau pangan diri tang besai endur maya bisi penusah. Ambika banding, baka maya pemati tauka rabat, semua rayat ti sepemakai di sekayu menua tu ditesau sereta sama bela sampal datai ngesah penusah nya. Orang ti ditinggang penusah nya nyau enda tentu tusah ati sereta berasai lempung agi tanggung pengawa laban semua kaban belayan ti datai nya mai pemeri tauka tulung baka duit, tulung gawa baka nulung ngambi ruas, ngambi kayu dikena berapi, ngelulun asi pulut sereta bebelaka lauk nyentukka sama bela beranjungka antu ke pendam.

            Nangkanka nya, pemanah enti diau ba rumah panjai iya nya kitai bisi tuai rumah ti dipaduka ngatur penyarut enti bisi nyadi. Pengawa tu endang tanggung pengawa ti dipegai tuai rumah belalauka adat enggau penti pemali ti dititi ditali, tampung menampung ari peturun asal rumah panjai nya. Adat di rumah panjai nya endang sempekat ti ditemu rayat dia. Pekara tu endang seruran diterangka maya bisi pengawa berat lalu dipegai tiap-tiap iku peranak rumah panjai nya awakka enda mayuh orang berani ngelaban atur rumah panjai. Nya alai, pengidup rumah panjai tau disema baka diau enggau diri menyadi. Taja  bisi belaya tang ukai reti nya laya ti panjai laban tuai rumah endang dibasa baka ti masa menyadi tuai, apai indai tauka aki ini diri empu.

            Pemanah diau ba rumah panjai ulih mandangka penyerakup bansa kitai. Pengawa kitai ulih diperatika orang lebuh kitai ngangauka orang ari rumah panjai bukai datai lebuh penusah enggau pengerami. Maya bisi pegawa berat baka maya bisi orang perintah tauka pemesai ari opis di nengeri datai bala ari rumah panjai ti besemak sapa bela bisi pengari ngulu sereta nyadika raban maya pengawa baka nya. Lebuh bisi penusah baka beranjungka orang sakit tauka deka beranak chunto iya enti tak nadai nadai kerita tauka perau kena beranjung, kaban belayan ari ulu tauka ari ili rumah enda betangguh betulung enti dipadahka nganjung orang nya ke sepital ti semak. Nya alai, kitai mesti bisi penyiru, bebantu sereta masa orang bukai awakka kitai dibalas baka nya mega.

            Ke penudi iya rumah panjai tau nyadi aset dikena narit penatai temuai. Rumaj panjai asal ti agi ngembuan keresa lama tauka asal baka tajau, pinggai lama tauka perengka ari temaga baka baku, lenguai, tabak enggau ti bukai tau dipandangka dikena narit ati bala temuai Nangkanka nya, perengka ti digaga ari pengelandik jari baka pua kumbu, kereban penganta asal indu lelaki kain tating, tumpa, rawai, gagung, baju burung, sirat mega mesti dikembuan tauka diayanka sereta dijual ambika ulih nyadi penatai pemisi kelimpah ari bejualka lada, sawit, getah enggau ti bukai.

     Raup penemu di atas, kitai ti nyadi anak Iban enda tau enda ngembuan sereta ngemansangka penyerakup enggau pemanah basa kitai ngagai orang kelebih bansa bukai. Kebuah pia, laban rumah panjai tu ke nyadi asal pendiau kitai Iban. Sekeda ari pemanah nya iya ulih ngenataika penemu lama ti jarang didinga lalu ditusui baru. Nya alai, kemansangka bansa kitai lalu diau mih ba rumah panjai laban nya endng penatai aki ini ari dulu kelia.

 

Ditulis: Hanes anak Entebang 4A 2019

Kunchit di tisi langit deka ditunu, rusa di kaki tangga enda diemparu

Bansa Iban ari kelia endang suah ngena sempama maya bejaku enggau pangan diri. Kebuah pia, ambi jaku ti dikenataika nya enda kelalu kasar tauka tinggi munyi. Sempama mega ulih ngurangka empas jaku enggau pangka sensitif sereta negatif sesebengkah pekara ti dipansutka siku-siku kitai maya bejaku enggau pangan diri.

      Sempama kunchit di tisi langit deka ditunu, rusa di kaki tangga enda diemparu mai reti utai ti jauh sereta enda beguna ba pengidup kitai nya deka dikereja tang utai ti semak sereta ulih meri penguntung nya enda dikeibuhka. Rambai jaku kunchit di tisi langit dikena nyemaka utai ti mit sereta enda beguna.  Leka jaku ditunu reti nya dibela laban deka dipakai. Tentu emparu rusa mayuh agi penguntung laban mayuh isi. Enti orang nya milih deka nunu kunchit di tisi langit, amat naka penyugau orang nya. Tambah mega empai temu ulih tunu iya kunchit nya kada enda agi idup kunchit nya. Tu pengawa ti ukai semina nadai mai penguntung tang mar mega dikereja. Kada iya datai ba tisi langit dih, enti sema ngambi lalu nunu kunchit nya? Sapa mensia kala datai tisi langit? Baka nya mega enti orang nya ngereja utai ti mai penguntung sereta mudah, rusa di kaki tangga enda diemparu.  Rusa di kaki tangga nya dikena nyemaka utai ti berega sereta mudah dikereja. Enti orang nya enda emparu iya tentu rugi laban enda ngambi peluang iya.

      Orang tuai kelia nengkabang sempama tu kena sida ngelalau bansa kitai, enda ngasuh kitai jugau. Sida nagang kitai ngereja utai ti nadai penguntung sereta mar dikereja. Pia mega, anang kitai ngambi utai ke jauh sereta enda beguna. Ambika chunto, sekeda kitai di Sarawak tu mayuh ke bekereja di menua bukai di Semenanjung Malaysia, Singapura, Brunei tauka menua bukai. Kenu ku jaku deka ngiga pengawa ti manah agi sereta begaji besai tang kekadang penguntung tauka gaji nya enda nipakka penyauh endur gawa bebanding enggau penguntung enti bejaku ba menua diri empu. Sekeda utai enda tegigaka pengawa ti manah agi tang empu. 

      Sempama tu mega tau nyadi lalau kitai maya ti milih utai dikereja diri empu, kekadang pilih kitai nya salah. Nya alai, sebedau kitai milih peratika enggau silik dulu enggaika kitai enda tepedaka utai ti manah baka rusa di kaki tangga kitai empu. Ambika banding , kitai di menua tu selalu bendar belandikka barang import ti mar rega. Kenu ku jaku, semua barang nya manah kualiti memagang bebanding enggau barang digaga ba menua kitai Malaysia tu. Taja pia, barang elektronik,tekstil enggau kerita ti digaga ba menua kitai Malaysia mega diimport ngagai menua bukai baka Jipun, Amerika, Korea enggau Eropah. Utai nya mandangka barang ti digaga di Malaysia mega manah, sereta bekualiti. Kekadang barang baka kain baju ti digaga menua kitai empu mayuh ke manah agi gaya ari menua bukai semina chap iya aja ke enda sebaka rega. Nya mih, anang kitai baka orang ke nunu chit di tisi langit ti nyemaka kitai meli sereta begunaka utai ti meri pengerugi ngagai kitai. Guna mih barang ti digaga ba menua kitai empu. Anang enda beratika pemanah barang ti digaga ba menua Malaysia tu ti jauh lebih murah sereta meri penguntung ngagai kitai semua.

       Nya mih, anang kitai selalu kena pangka sempama di atas nya. Sepemanjai pengidup kitai di dunya tu, tentu kitai kala salah tunjan, tekelanjur kaki kanan. Nya mih, ketegal kitai selalu enda bejimat sebedau ngereja pengawa sereta saru peda. Kitai selalu salah silik, enda betul tilik. Kitai suah tekelambang singkang, ngerembang sebarang. Suah mih kitai tekelambang peda, kelalu jauh perening ari mua empelua, enda tepedaka rusa di kaki tangga. Nyau deka engkechit ngagai tisi langit. Nya alai, anang ngerembang sebarang sebedau nyingkang.

Diambi bali: Jacklyn Jata anak Ripin 5SN 2019

Chara Kitai Patut Bebelanja

            Kemaya hari tu, rega barang menua kitai nyau majak niki ketegal ari rega barang mata ti dibeli ari menua luar laban rega mata duit menua kitai majak baruh enti dibandingka enggau mata duit menua bukai.  Pekara tu mai empas ngagai rega barang ti dibeli kitai ba kedai pan majaka niki. Nya alai, kitai enda tau enda bekelimat ngena belanja enggaika duit kitai enda chukup nentukka ujung bulan.  Ambika chunto, enti suba duit RM50.00 chukup dikena meli mayuh macham barang dapur ungkup seminggu tang diatu enda ulih baka nya agi.  Taja pan barang ti dijual orang ke ba pasar chukup mayuh tang rega duit dikena meli barang ti dikeinginka ati enda tetipakka rega barang ti deka dibeli nya ti udah balat mar.  Nya alai diatu, kitai mesti ngiga chara kitai ulih bekelimat lebuh meli barang.

              Keterubah iya, sebedau nurun bebelika barang ke pasar, kitai mesti nulis dulu rintai utai ti deka dibeli.  Udah nulis utai ti deka dibeli, sediaka duit nitihka penyampau rega barang ke deka dibeli nya.  Enti lebuh bebelika barang, tentuka nadai ngambi barang bukai kelimpah ari iya ke ba rintai nya tadi.  Siti utai ke enda tau enda di keingatka iya nya peda rega barang nya lalu bandingka barang ti sama tang enda sama chap laban bisi chap ti mar tauka murah taja barang nya sama, chunto iya, ai irup ti ngundan bikarbonat baka Coca Cola, Sprite, Fanta, Sarsi enggau ti bukai ngambika nyamai nemu rega ti murah agi.

             Udah nya, apai indai enda tau enda ngajar anak ngambika nemu nabung duit dikena dudi hari. Kebuah pia, kitai enda nemu ni maya penusah tau nyadi, chunto iya baka rabat,  sakit, ampuh bah enggau ti bukai endang begunaka duit lengkas dikena mutarka penusah nya.  Apai indai mesti ngajar anak nguna duit ari mit awakka sida nemu ngaga taga belanja diri lebuh utai di kantin, pasar tauka meli barang ari pangan diri.  Maya ba pasar, tagang bala anak ari bebelika ayam baka anak patung, senapang ayam, kerita ayam enggau ti bukai enti ayam ti lama agi manah laban nya ngasuh duit tebasau.

             Siti agi chara ti tau dikena bekelimat iya nya meratika rega barang ari sesebengkah kedai enggau kedai ti bukai, tentuka kitai meda kemaya hari bulan utai ti dibeli nya enda udah abis timpuh. Ukai semina nya aja, peratika gaya bungkus tauka tin laban enti bungkus bisi masuk angin tauka tin bisi keremping tauka betegar barang nya udah rusak lalu enda manahka pengerai enti kitai makai iya. Pekara baka tau ngujungka kitai rugi.  Kebuah pia, enti kitai udah tebelika barang ke rusak, tentu kitai deka nganti iya, enti rumah jauh ari pasar tentu nya mega begunaka duit ke tambang tauka ungkus minyak kerita ti dikena kitai.  Ari nya, duit udah enda dikelimat agi.  Nya alai, tu siti ari chara bekelimat ngena duit.

             Kelimpah ari nya, bebelanja tu sigi tusah deka dikurangka enti kitai anak indu laban kelalu mayuh utai ti beguna deka dibel. Nya alai, apai indai ke ngembuan anak indu mesti nemu rega barang ti penumbas pemar baka syampu buk, losyen, kereban penganta bukai baka lipstik, minyak wangi, chuk tauka chelak mua enggau ke bukai.  Enti ulih siti chara apai indai ngurangka belanja anak indu iya nya nagang sida ari bebelika kereban penganta laban diau ukai maya begunaka nya enti kitai agi besekula.  Enggau chara tu, kitai ulih bekelimat ngena belanja.

             Nangkanka nya mega, chara kitai patut bebelanja iya nya enda makai di luar baka ba restauran, kedai makai tauka kedai kopi, rumah asap enggau ti bukai tang manah agi kitai makai tauka berapi kediri ba rumah aja. Chara tu ulih ulih ngurangka belanja makai lebuh ba luar. Ba luar rega pemakai sekali ngudar nyauka datai belas ringgit sepinggai bedau agi rega ai tang enti makai ba rumah kitai tau makai lebih ari sepinggai ngena rega ti sama.  Dia mega kitai ulih nyaga chara pemakai kitai ari ti kelalu mayuh undan garam, biching, gula enggau ke bukai laban kitai empu ti manduk iya. 

             Kepenudi iya chara bukai ti ulih digaga kitai bekelimat ngena belanja iya nya ngurangka diri ngena perengka karan enggau ai. Kitai mesiti nerenaka ulah nemu bekelimat ngena perengka karan chunto iya, enda masang lampu, kipas tauka kereban elektrik bukai baka televisyen, radio, komputer sepemanjai hari. Pasang kereban elektrik semina maya kitai begunaka iya aja, pia mega ai beresi ari paip kitai di rumah.  Lebuh kitai kurang nguna perengka nya, bil karan enggau ai kitai tau dikurangka lalu chara tu tau amat ngelimat belanja.

             Kena nyimpul karang tu, aku arapka kitai nemu beratika chara ti udah didipejuraika di atas tadi. Nya alai, aku mesan apai indai mega mesti ngelalau bala anak ngurangka belanja sida maya besekula. Kitai enda tau enda nyaga sereta ngelimat belanja diri lebuh deka bebelika utai enda milih dini-dini endur kitai diau.  Amat mih barang nya enda tau enda dibeli tang kitai patut ngelatih diri ngambika ulih ngelimat anak belanja. Chara-chara tu tau dikena kitai ngelimatka belanja munyi ku sempama untung sekarung rugi seguni.

 Ditulis: Hanes Anak Entebang 4A 2019

SALAH SAPA?

Lebuh nengah pengidup ti mayuh penguji tu, kitai kelalu balat berundingka utai ti ngasuh diri tusah. Maya umur  agi biak, anang guai berunding mayuh macham utai laban nya tau ngasuh kitai labuh sereta tusah ati ngapa.  Nya alai, anang ngenusah diri empu. Nama kebuah aku  madah munyi nya?

                Uji nuan berunding enti kitai agi sekula, besedia tauka enda nuan nyaga ati orang ti dikesayau nuan? Ulih tauka enda nuan ngelantangka ati iya? Uji berunding dalam ati. Anang ketegal utai ti baka nya nyau ngasuh nuan sebarang utai deka dikereja. Aku nyebut munyi nya laban mayuh udah dipeda sereta didinga aku utai ti nyelai nyadi. Bisi sekeda orang nya tadi lalu deka munuh diri, bisi mega gila,tauka  rari ari rumah ketegal ti deka begulai sejalai jadi enggau pangan diri. Nama kebuah pekara nya nyadi?

Sebedau kitai nyalahka apai indai, manah agi nuan berunding bisi tauka nadai apai indai ngasuh kitai bepangan maya agi sekula?  Tentu nadai, enda nemu mih enti nyema bisi apai indai ke ngasuh bala anak sida bepangan.  Nya  salah apai indai pia?   Anang nyalahka sida laban sida enda nemu nama utai di kereja bala anak ba sekula. Nyadi, kitai ti anak tu madahka nya salah apai indai tang nya salah kitai empu.  Sida endang enda ngasuh kitai ngereja ulah ti jai ba sekula.

Diatu, berita pasal  sugar daddy  tu nyau majak nyadi ba bala nembiak rebak baru diatu. Utai tu nyadi, ketegal ulah ti enda menuku tauka enda bemoral. Enti dipadahka kitai jegit, sida ngumbai orang ti ngerara nya bejai. Orang ti ngerara nya dikumbai sida jai. Utai tu ti ngasuh nembiak rebak baru diatu anchur. Nama kebuah sida milih jalai nya? Keterubah ketegal duit, kedua laban deka ke pengidup ti lantang,  ulih meli tu meli nya. Semua utai dikeda ulih beli magang. Baka ni asai ati apai indai sida tu dih?

                Ari diatu kitai ke rebak baru anang enda nemu ngatur pendiau diri. Amat utai nya muntang di sebut tang tusah dikereja. Munyi ku jaku orang kemaya hari, mulut nyebut tang patung enda nyaut. Enti Sema kitai bisi penusah tauka penanggul ba pengidup diri,  anang milih jalai ti salah. Mayuh agi jalai bukai dikena mutarka penusah diri. Enti sema kitai enda chukup belanja kitai patut minta duit ari apai indai. Enda patut sida enda meri anak diri duit enti kitai madah terus terang. Bedau kala aku tetemuka apai indai ti enda kiruh ke penusah bala anak.

Dikena nyimpulka semua nya tadi, anang enda mendingka jaku ajar apai indai. Sida iya andal ke kitai besekula ngulihka pemandai.  Nya alai,  kitai anng main-main. Berunding mih ke pengiruh apai indai ti ngiga belanja dikena nyengula ke kitai.  Anang ngasuh ati apai indai kitai tussah laban sida iya mih orang ti keterubah gaga enti sema kitai mujur dalam pengidup.

Dikarang :Samuel. A 

TANGGUNG PENGAWA DIKENA NYAGA PEMERESI RAMPA MENUA

       Ketegal pemansang dunya ke majak nyadi kitai dipeda baka ti enda ulih ngetanka pemeresi rampa menua. Pemeresi rampa menua patut dijaga  awakka kitai ulih idup ba rampa menua ti beresi. Mayuh macham kebuah ti ngasuh rampa menua kitai kamah baka nunu kampung, nunu uras, muai teda toksik ngagai sungai, ngena kereban ti ngundan kimia ti tau ngerusah rampa menua enggau mayuh agi ti bukai. Tiap-tiap iku kitai patut ngembuan tanggung pengawa nyaga pemeresi rampa menua.

         Keterubah iya, tanggung pengawa ti patut dikereja kitai dikena ngetanka pemeresi rampa menua iya nya ngemeranka pengawa nguna baru utai ti udah dikena kitai. Pengawa tu  tu sigi udah dikemeranka sekeda orang enda ngira di menua tu tauka di menua bukai kenyau  ari suba tang bisi sekeda ti enggai nitih. Pengawa nguna baru tu dibagi ngagai tiga iya nya reuse, reduce, enggau recycle (3R). Pemanah pengawa nguna baru tu tau bendar ngurangka uras ke dibuai kitai besehari-sehari. Ambika banding, keretas tu digaga orang ari kayu. Makin mayuh kitai ngena keretas, makin mayuh kayu ti deka ditebang lalu ngujungka pengawa nebang kayu tu majak nyadi. Pengawa betebangka kayu tu mih mai rampa menua kitai kamah lalu nambahka pengangat dunya. Nyadi, nya mih kebuah kitai patut ngemeranka pengawa nguna baru tu enggau bebendar awakka ulih nyaga pemeresi rampa menua.

           Kelimpah ari nya, kitai enda patut betunuka kampung tauka uras ba sebarang endur. Pengawa betunuka kampung tauka uras tu mih ti balat bendar ngerusak pemeresi rampa menua. Mayuh empas negatif sekali ke nya nuju mensia tauka rampa menua. Pengawa nunu kampung tu kelebih agi orang ke betanam betupi chukup enda ulih ditagang. Perintah patut meri ukum ngagai sida ti nunu kampung awakka sida iya ngetu ngereja pengawa tu. Empas ti dibai pengawa betunuka kampung tu iya nya sebun asap. Sebun asap tu mih ti ngasuh kitai bulih pemedis tauka penyakit baka pedis mata, sendat seput, ampus tauka sengak sereta tau ngujungka bebadi nyawa. Sebun asap ke tebal mega tau ngasuh bebadi di jalai raya enti tikas penampak nyau ba tikas balat. Nyadi nya mih tanggung pengawa ti patut dikena kitai nyaga pemeresi rampa menua.

            Nangkanka nya, pengawa betanamka bungai ngelingi rumah tauka ba palan kitai diau mega siti ari chara aku nyaga pemeresi rampa menua. Pengawa betanam tu manah agi enti digaga ba nengeri laban ba nengeri chukup angat enti dibandingka ba menua kitai ke agi ngembuan mayuh kampung. Pengawa tu ulih nyintak karbon dioksida ti ngasuh angin ba kandang menua nyadi angat. Semua kitai mesti ngemeranka pengawa tu awakka pengangat dunya enda majak niki. Empas pengangat dunya tu iya nya, ais ti di kutub utara tauka selatan anchur lalu ngasuh ai tasik majak niki lalu ngujungka bisi sekeda pulau tengelam.  Pengawa betanamka pun bungai tu endang patut dikemeranka kitai laban pengawa nyaga pemeresi rampa menua tu ukai tanggung pengawa perintah tang semua kitai.

          Pemeresi rampa menua patut dijaga laban mayuh empas negatif enti kitai enda nyaga rampa menua. Chunto iya, sebun asap, dunya majak angat, ramu majak punas enggau tu bukai. Ngetanka pemeresi rampa menua tu ukai semina tanggung pengawa siku aja tang semua orang ba dunya tu awakka kitai ulih idup enggau ati ti lantang, bepengerai, nyintak angin ti beresi enggau tu bukai.

Dikarang: GLORIA EMILLY GADING ANAK SIGAT (5 ALLAMANDA)

EMPAS INTERNET BA NEMBIAK REBAK BARU

 

Internet nya siti kereban telekomunikesyen ti nyau deka sebaka guna enggau sistem pos, semina iya nganjung utai ke deka dianjung jampat agi ari sistem pos. internet dikena kitai nganjung pesan, betelefon, nganjung gambar tauka video engngau ti bukai. Semua nya ngena medium ti besai baka media sosial. Chunto media sosial, iya nya baka Instagram, Snapchat, Facebook, Youtube enggau mayuh agi ti bukai.

Kemaya hari tu, nyau deka semua nembiak di dunya bisi gajet kediri empu baka telefon pintar, komputer enggau tablet. Nembiak mayuh agi ngabiska jam dikena meda mayuh bengkah pekara  ari internet. Ari internet sida nemu pekara-pekara ti benung nyadi ba dunya kitai tu. Nya kebuah, mayuh apai indai kemaya hari tu madahka anak sida mayuh penemu senentang dunya luar.

            Nangkanka nya, mayuh nembiak diatu ngena internet nyadi chara alternatif  belajar kediri dini-dini sida diau enda ngira di rumah tauka di tanah asal bisi arus internet. Media baka Youtube suah dikena bala nembiak belajar ba rumah. Sida enda tentu bepanggai ba pelajar ba sekula agi enti pasal ngiga mayuh macham pekara ti dikerindu sereta deka dipelajar. Ambika banding, diatu bisi beribu-ribu video ti bisi ba internet ti nyengkaum semua subjek ba sekula ulih dipeda ari Youtube. Sida rindu agi meda sereta belajar ari video-video baka toturial tauka chara-chara belajar ti ti ngembuan audio, visual enggau grafik ti interaktif. Video ti ngundan audio ti merindang ati sereta terang didinga, isi-isi pelajar ti numbas iya pemar senutuk enggaau tikas runding sida. Nya kebuah sida iya deka agi belajar ari video ba internet.

            Kelimpah ari nya, nembiak rebak baru nemu ngulihka duit ari internet. Nembiak diatu mayuh pengelandik baka betanda, belagu, bepantun, bepandukka lauk, nyura, bisi mega bejualka produk diri ba internet. Ambika chunto, nembiak ke nyura, nganjung gambar tauka video asil ti dichura iya ti pemadu manah nengah media sosial. Sida tau bulih penguntung laban orang ari serata dunya ulih meda utai digaga iya sereta bisi ke deka meli asil jari iya. Tu ulih meri empas ti besai ukai semina ba daya kreatif nembiak nya tang mega meri empas ti manah sereta ngenataika penguntung. Penguntung ti diterima ulih dikena nyambung pelajar ngagai tikas ti tinggi agi, ngidupka diri empu enggau dikena maya bisi penusah.

            Nambahka nya, kreativiti sereta inovasyen nembiak ulih dipeda ba chara sida berunding maya diasuh pengajar ngaga aktiviti beraban dalam kelas. Enti disemaka enggau nembiak jeman suba ti jarang ngena internet, utai ti digaga sida nembiak rebak baru jauh manah. Ambika banding, lebuh sida mantaika penemu tauka mandangka asil ti udah tembu nya bepanggai bendar ba utai ti ditemu sida iya ba internet.            

Dikena nyimpul pekara di atas tadi, terang bendar internet mai empas ti manah sereta  mai mayuh penguntung enti dikena enggau chara tauka tuju ti betul. Enti nembiak rebak baru ulih ngemeranka runding ti positif, sida ulih ngemansangka diri ngena internet lalu nadai nyadika penanggul dalam pengidup.

Dikarang: Steve Abat Igom Anak James Nyelang - 3BG

Empas Negatif Media Sosial

 

      Media sosial endang kereban ti pemadu beguna ba kitai kemaya hari tu enda ngira tuai tauka biak. Chunto media sosial seruran dikena kemaya hari tu iya nya Facebook, WhatsApp, Instagram enggau mayuh agi. Taja pan media sosial tu mayuh amat guna tang iya mega mai  empas negatif ngagai kitai. Tanya iya diatu,  nama empas negatif media sosial ngagai kitai?

      Keterubah, media sosial tu tau ngachau pelajar sekula. Utai tu ketegal nembiak sekula ti nyau ngembuan telefon kediri empu. Bala nembiak enda ngetu megai telefon belama laban  bepedaka media sosial nyentuk ke sida nyau enda kiruh ke utai ti dipelajarka tauka pengawa sekula ti diberi pengajar ba sekula. Utai baka nya ti tau ngasuh pemutus peresa sida enda ngemuaska ati tauka nadai niki ari ke udah. Nya alai, media sosial tu nyau nyadi sigi kebuah nembiak enda bulih pemutus peresa ti manah. Taja pia, nadai penyalah kitai bemain tauka bepedaka media sosial tang kitai mesti nemu magi jam diri enggaika terunda-runda.

      Nangkanka nya, media sosial tu mega tau ngasuh gian. Enda ngira biak tauka tuai, indu tauka lelaki, media sosial tu endang sigi enda milih sapa ti diasuh gian. Gian media sosial tu iya nya enggai badu meda utai ba telefon baka WhatsApp, Instagram enggau YouTube tauka ba Facebook. Utai ti suah dipandangka ba aplikasyen nya ti tau ngasuh kitai enggai ngetu sereta enggai badu-badu meda telefon tauka gajet bukai. Ba runding aku, tiap-tiap iku kitai endang patut netapka taga jam tauka pengelama sida  meda media sosial awakka ulih nagang diri empu ari ti kelalu lama  nyentuk ke nyau kelalu lama meda  utai ti dipandangka ba YouTube, Facebook enggau ti bukai.

      Udah nya, media sosial tu tau ngenasalka kaul emtara diri sebilik. Kebuah utai tu tau nyadi iya nya ketegal bala diri sebilik ti nyau kisuk nunga skrin telefon aja nyentuk ke nadai berandau betunga mua enggau diri sebilik. Ambika banding, maya bisi duduk tauka begempuru enggau diri sebilik maya bisi pengerami tang bisi ari diri sebilik ti benung kisuk enggau telefon enggau media sosial. Nya pan utai ti ngasuh kitai diri sebilik enda nyamai begulai tauka nemuai ngagai menua kitai laban ngerundingka penatai diri enda diundang. Ba buah runding aku, kitai endang enda patut enda bebasaka diri sebilik laban utai nya tau ngasuh kaul diri sebilik tau tasal. Kitai ulih ngelarika utai baka nya enggau chara nunga bala diri sebilik lebuh ke bisi gempuru bala mayuh.

      Endang amat media sosial tu ngenataika mayuh amat guna sereta pemanah ngagak tiap-tiap iku mensia tang tiap iti utai ti manah bisi mega empas iya ngagai tiap iku kitai mensia. Media sosial tu mayuh mandangka utai ti tau ngachau runding nembiak sekula ti tau ngujungka gian enggau ulih ngenasalka kaul entara diri sebilik. Nya chunto empas negatif media sosial ngagai tiap-tiap iku mensia.

      Kepenudi, sama mih kitai ngena media sosial enggau manah sereta landik ngatur jam entara bemain telefon enggau pengawa ninting hari awakka kitai enda mungkal masau jam enggau utai ti enda ngenataika penguntung ngagai diri empu enggau orang bukai.

Abigail Anak Christopher 5AL 2020

Cherita Maya Perintah Mindah Betagang (PKP)

 

Jimai tu siku nembiak ti bagas ngereja mayuh bengkah pengawa taja pan iya ukai orang ti nyulut ba bidang akademik. Jimai diatu sekula ba SMK Kemboja Tatang. Nyadi taun tu Jimai Pom 3 sereta deka ngambi peresa ti disebut orang Pentaksiran Tingkatan 3 (PT3). Penatai iya rumah panjai Kelabang Ili.

Sepengudah pulai ari sekula Jimai nulung apai indai iya gawa ba kebun. Taun tu sida Jimai sebilik beduruk enggau sida serumah ngumpul buah lada laban lada sida mayuh sereta mansau. Nyau silau hari sida Jimai pan mulaika diri ke rumah.

            Tembu mandi indah indai iya pan ngangau laban deja matahka lengan. Jimai nulung indai iya berenahka pemakai. Maya nya indai Jimai lalu muka randau pasal pemutus peresa penggal sida ti baru udah pansut minggu nya.

            “Kati gaya pemutus peresa nuan Imai?” ku indai iya.

“Manah ga indai,” saut Jimai sambil tuchum malik ngagai mua indai iya. Udah nya indai Jimai lalu meri jaku peransang ngagai iya awakka belajar bebendar agi lebuh napi peresa PT3 ke bendar ujung taun nya.

            Hari teberingkas tawas,  pagi nya Jimai udah nurun ke sekula nepan van Apai Libang. Ari pemayuh sida serumah ti besekula dia Jimai tu siku nembiak ti tumu datai di sekula laban iya siku ti ngembuan disiplin ti tinggi. Maya puang nya seraya ke nganti pengajar  tama ke kelas Jimai macha bup ti dibai iya. Jimai suah dikemeli ke sida sekelas laban iya enda ulih beserara  enggau bup. Kini-kini penunga iya bup sigi nyadika kaban iya. Sida sekelas suah bendar ketawa sereta beduan iya. Taja pia, iya enda ngambi ati ke jaku sida. Siti agi ulah  Jimai iya nya enda malu betanya ngagai pengajar.

           Bala nembiak Pom 3 nyau abis ati ninga kes COVID-19 ti ngerekai serata dunya. Jimai irau ati lebuh meda berita ba televisyen madahka kes COVID-19 tak majak mayuh sererta udah bisi di menua Sarawak. Sida diberi perintah peremisi laban mensia mayuh diberi perintah atur ti disebut Atur Mindah Betagang disebut ngena jaku pandak (PKP) ba jaku Melayu. Nyau enda berasai ti Jimai meda televisyen, telefon iya pan bebunyi. Dipeda iya ba raban WhatsApp sida kelas madahka PKP disambung perintah ari 14 hari nyadi 28 hari. Sida serumah nyau chapuh ninga berita nya tadi. Enda sida ngadang pekara nya tau nyadi. Ba pikir Jimai tentu sekula sida terus tejanggal.

        Sida Jimai sekelas pan nyau tusah ati ngenang pekara ti dipadahka Pengajar Jimbun nengah raban WhatsApp sida. Pengajar sida madah, chara deka diatur ngena chara online baka ari WhatsApp, Telegram, Google Classroom enggai ti bukai. Jimai nyau tusah ati ngenang nasib diri ti nyau tanggul belajar kelebih agi iya deka ngambi PT3.

        Indai Jimai ngelawa Jimai ke bilik besai meda ulah iya ti nyau serebana kediri.

“Oii…, Dom”, ku indai iya ngagau ari jauh. Jimai enda kiruh ke indai iya ti ngangau ke iya.

“Endai, Dom lapa nuan tak enda nyaut? Ku indai iya sambiil malik ngagai  mua iyya ti benung gegenung.

“Nuan nya tadi pia, indai?” saut Jimai pandak.

“Au, aku mih tu anak. Nama nuan tak tegenung baka nya dih anak?  Nama utai ngenusah ati nuan?” tanya apai iya.

“Aku tusah ati ninga perintah deka nginsil PT3 taun tu, apai, ku berita ti didinga aku ari raban WhatsApp kami sekelas.” ku Jimai sambil merening mata apai iya.

         Nyau udah sebulan lebih PKP udah dipejalaika, kes COVID-19 pan nyau belinsur kurang ari ti suba. Sida Jimai pan diasuh perintah nurun ke sekula baru. Sida diasuh perintah nitihka atur baru tauka S.O.P ti terit baka mesti ngena pemampul mulut maya di tempat mensia mayuh, seraka 1 meter, suah nuchi jari ngena sabun tauka Hand Sanitizer sereta tikas pengangat diperesa dua kali sehari. Taja pan nadai ngambi PT3 tang sida Jimai diajar pengajar baka selama nyentukka sehari tu.

Samantha Chumang

3B 2020

Pengelandik Ngajat

 

                Ngajat tauka ajat siti ari tanda  asal  bansa Iban ti tebilang ba menua Sarawak. Ajat Iban bisi mayuh bansa ambika chunto iya nya Ajat Indu, Ajat Bebunuh, Ajat Lesung, Ajat Semain, Ajat Beranyah, Ajat Pua Kumbu, Ajat Kuta, Ajat Ngalu Temuai enggau Ajat Mai Antu Pala enggau ti bukai. Ngajat selalu iya dibantaika maya nyambut hari gawai baka Gawai Dayak, Gawai Mangkung Tiang, Gawai Antu enggau gawai-gawai ti bukai sereta maya bisi pengerami bukai baka ngambat temuai, melah pinang, bepekit enggau  mayuh agi ti bukai.

Ngajat diumba enggau tabuh ambika sida ti ngajat nya nunda rentak iya. Perengka tauka kereban tabuh iya nya bebendai, tawak, engkerumung, enggau ketebung tauka gendang. Bisi sekeda orang nyebut ketebung tauka gendang nya dedumbak tang bisi orang madahka dedumbak nya gendang ti bisi dua endur nempap iya.  Lebuh betabuh, sida berengkah enggau tebah bebendai, dientudika tempap gendang, palu tawak enggau pangkung engkerumung.

       Pemanah ajat diumba enggau pemanah ngepan ti dikena sida. Pala sida dipasukka ketapu ke lebat diujak lelanjang. Sida ngena gegaung enggau baju burung. Ba rekung dipasukka dua utas marik. Simpai dirasukka ba lengan kiba enggau kanan. Sirat kesumba bebuchai ba ujung chukup badas dipeda. Sida nangkin sebilah ilang sereta jari kiba megai siti terabai. Engkerimuk enggau unus sama bisi ngenyukupka raban keresa ngepan.

     Ngepan indu ke ngajat nadai alai mejah.  Sida ngena sugu tinggi dianta tisir pirak bekebelik.  Selampai enggau rawai ke dikena berupai melit ari mua enggau belakang. Dekuan sida dirasuk gelang pirak. Indu ke ngajat mega ngena kain tenun ke bebuah mayuh macham motif. Ba sepiak-sepiak kaki dirasuk sepasang gerunchung. Ajat indu ngemeratka pengelemi tubuh, pengalus ayun jari, singkang kaki enggau kelis mua sereta perening mata sida.

     Ngajat mega siti ari tanda asal ari budaya bansa Iban ti enda tau enda ditanka kitai rebak diatu enggau sida ti dudi. Kebuah pia, ngambika adat asal tu enda alah laban segang pemansang dunya ti tau mai pengerugi ngagai kitai ketegal lenyau identiti bansa diri.

Jennifer Nangan 3B 2020

CHARA NAGANG MENSIA MAYUH NGACHIRKA URAS SEBARANG ENDUR

 

               Nadai siku orang ti benama mensia enda rinduka utai ti beresi tang nama kebuah agi bisi genturung pendiau sida kamah? Penanggul genturung pendiau tu nyadi laban sekeda orang bisi nejuka uras ngachir ba sebarang endur. Genturung pendiau ti kamah, enda nyamai endur diau laban igi penyakit enda ulih ngerekai ngagai sida ti diau dia.  Ditu aku deka bejuraika sekeda chara dikena mutarka penanggul nya.

                 Chara ti keterubah iya nya kitai mesti ngatur gotong royong meresi endur ba genturung pendiau diri empu. Pengawa gotong royong tu chara ti chukup engkeman dikena meresi genturung pendiau kitai. Kitai patut ngumpul uras awakka nadai endur nyamuk, lalat, gerinang enggau chit besarang laban jelu nya ti mai igi penyakit. Kelimpah ari nya, kitai patut ngumpul uras ba parit laban enti uras balat ngachir ba parit tau ngasuh ampuh bah ba endur ti baruh ketegal parit nya sebat tauka betekat. Pengawa bebuaika uras tau mai mayuh empas negatif ngagai kitai baka ampuh bah, igi penyakit, pemeresi enggau mayuh ti bukai. Nya alai, kitai patut ngatur pengawa gotong royong awakka genturung pendiau kitai beresi, selamat sereta nyamai endur diau.

                  Nangkanka nya, kitai tau ngaga endur nugungka uras ti menyana sereta sistematik. Endur nugungka uras tu chukup beguna awakka uras ke diengkah dia ulih nyeliahka jelu baka ukui enggau mayau merunsaika uras nya. Endur nya tau digaga jauh mimit ari genturung pendiau awakka nadai jelu baka tikus, menarat, gerinang niki ke rumah kelimpah ari nyeliah bau ti enda manah enggau ti bukai. Ukai semina pemeresi genturung pendiau patut dijaga tang pemeresi endur nugungka uras mega patut sedia sereta dijaga enggau manah. Nya mih siti chara dikena mutarka penanggul tu ari ti ngaga tauka ngagihka endur nugungka uras ti menyana.       

Kelimpah ari nya, chara bukai iya nya meri licha ngagai bala mayuh penguntung nyaga pemeresi genturung pendiau ari orang ti bekuasa. Dikena nyempulang pengawa gotong royong kitai tau begempuru sambil mendingka atur enggauu jaku ajar ari sida nya pasal penguntung nyaga pemeresi genturung pendiau. Kitai tau ngangau ke orang ari opis pengerai, opis rampa menua, opis pelilih menua enggau ti bukai. Penerang ari licha tu chukup beguna awakka mensia mayuh sama bela nemu penguntung enti kitai diau ba genturung pendiau ti beresi.

           Chara ti kepenudi iya nya bejalaika atur tauka undang-undang ti terit. Ngena  chara bejalaika atur ti terit mensia mayuh tentu nangi sereta nemu tanggung pengawa diri empu enda bebuaika uras sebarang alai enti enggai ditunggu tauka diukum. Enti sema kitai tepedaka orang bisi muai uras sengapa endur, kitai patut meri jaku tangkan dulu tang enti iya agi ngereja pengawa nya baru ngena ukum ti terit. Neritka atur sereta ngukum tu disadang ngasi laban nya tau ngasuh sida bejimat lalu nangi ngereja pengawa nya agi. Ukum nya baka ngena mata duit nitih ke pemayuh enggau penyuah sida bebuaika uras.

           Dikena nyimpul penemu tu, kitai sama bela nemu genturung pendiau ti beresi sigi nyamai endur diau. Ari chara baka ti dipadahka tadi kitai mesti nyaga pemeresi genturung pendiau awakka enda ngenataika  mayuh empas negatif. Ambika banding, kitai patut nyaga pemeresi genturung pendiau awakka angin dia enda kamah, nadai igi penyakit, nyamai mata meda enggau ti bukai.   Nya alai, jaga mih enggau manah genturung pendiau kitai awakka pengidup  nyamai sereta lantang belama.

Gloria Emilly Gading anak Sigat - 5AL 2020