Ikan tuman tu sebengkah ikan ti udah lama nyadika pemakai di menua Malaysia. Nambahka nya, iya mega udah ditetapka nyadi sebengkah pemakai ti tau nyumanka abi telih, kelebih agi lebuh maya udah bebuntas.
Ikan tuman tu sebengkah karnivor ti idup ba kerapa lalu bisi ditemu ba semua menua adap ke Asia Tenggara. Sekeda bansa kitai ngumbai ikan tu tuman, lalu bisi mega ngumbai iya ikan tanah.
Professor Abdul Manna Jais ari Fakulti Perubatan enggau Sains Kesihatan, Universiti Putera Malaysia (UPM) madahka, ikan tu dipasukka dalam kategori ‘Order of Channiformes’, ‘Famly Channidae’ enggau ‘Genus Channa’ lalu ia ti benung dipansik diatu iya nya kategori ‘Channa Striatus’.
Ia mega madahka bisi 30 bengkah ikan tu bisi ditemu di serata dunya, lalu ari nya 8 bengkah bisi di Sarawak, 2 di Sabah, lalu 4 bengkah bisi ditemu di Semenanjung Malaysia.
Kelimpah ari nya, iya madahka ikan tu nyelai, laban idup bepasang (monogami) sereta ulih nguasa kandang alai beridup ti tetap. Ia mega ulih idup dalam ai ti letung, bisi rarat mimit, ai ti mabu enggau ai ti beambuh.
Ikan tu mega suah ditemu sebelah pegung, sungai, danau, entali ai, umai paya enggau sebelah nanga sungai.
Sekeda ripot bisi madahka orang ti nginti kala bulih ikan tuman ti besai, taja pan selalu agi pemerat ikan tu semina kira-kira sekilogram siku.
Professor Abdul Manan Jais belabuh ngaga pansik pasal ikan tuman tu ba taun 1985 lalu tekenyit bendar lebuh nemu ikan tu enda dipasukka nyadi sebengkah ikan ti patut ditupi ba Opis Pengawa Berikan.
“ Ikan tu ngundan pemakai bansa protein ti tinggi, iya nya kira-kira 60 ngagai 70 peratus. Iya semina ngundan kira-kira 20 peratus lemak ari pemerat tubuh iya empu lalu jauh baruh agi ari pemakai bukai baka dagin kambin, dagin manuk, enggau pemakai ti ulih ari tasik,” ku iya.
Ikan tu ngundan mayuh vitamin A tang semina mimit aja kalsium, magnesium, mangan, nikel, plumbum enggau sing ti dikemendarka dalam tubuh mensia.
Professor tu mega madahka penyampau asid arakidonik ti tinggi sereta enda ngundan elkosa pentaenoikasid ti inggi, nyadika siti asil pansik ti chukup manah. Asid arakidonik tu pun penatai prostaglandin. Iya beguna amat laban ngasuh darah jampat meku. Iya mega ngundan asid amino ti dikumbai glisin, iya nya siti ari komponen kolagen. Glisin tu ngundan asid aspartik enggau glutamik, iya nya bansa protein ti tau ngemansangka isi sereta ngalitka abi telih.
Iya mega madahkan, ikan tu ukai semina nyumanka abi telih tang ulih ngurangka pemedis udah bekau bebuntas. Iya mega ulih nulung ubat serap agi masuk ke dalam tubuh siku-siku.
Pansik tu nyadika pelasar saintifik mensia di menua tu ti bepakaika ikan tuman udah bekau bebuntas dikena ngurangka pemedis sereta nyumanka abi telih.
Engkinjur ikan tuman ngundan asid oelik enggau linolik. Asid tu mega mayuh ditemu dalam telu ikan tuman. Telu ikan tuman ti agi baru ngundan mayuh asid arakidonik.
“Pansik ti tetemuka bansa pemakai anti-bakteria balat ngeransingka ati kami, lalu ke diatu kami benung bejalaika pansik bansa ikan tu ti tau nyumanka kuris (ulser) dalam gelung perut mensia enggau jelu,” ku iya.
Isi ikan tuman burak, kering serta enda betulang tau bendar nyaguka ikan tu nyadika sebengkah bansa pemakai rama sereta pemakai tambah ti beguna amat. Ikan tu mega bisi bendar potensi dalam industri pemakai ke guna pengerai, ketegal iya ti udah bisi digaga nyadi sosej tauka fillet.
Professor Abdul Manan Jais besai bendar pengarap ka ikan tu, ukai semina ka pemakai mensia dalam menua tu tang ulih nambahka penatai pemisi orang ti diau di menua tu. Iya arapka ikan tu tau tulihka penuduk ti sama, baka ikan salmon enggau trout, dalam dagang antarabansa.
Professor Abdul Manan udah nerima midul engkeraju Anugerah Mindex-Innotex ketegal ti udah mujur tetemuka sebengkah utai ti dikena nyaga kulit ari ikan tuman ba taun 1996 enggau siti agi midul engkeraju ari Institut Biosains UPM dalam taun 2004.
Kelimpah ari nya, Kepala Eksekuif Cheroh Aquatik Sdn. Bhd., Wan Jusoh Zakaria, ari Raub ngaku bansa pemakai ti bisi diundan ikan tuman endang ditemu urang mayuh. Tuman ti ngembuan pemerat entara 300 enggau 500 gram sereta idup ba pendiau asal, chukup dikerinduka mensia mayuh.
Wan Jusoh madahka ikan tu ngembuan peminta ti chukup tinggi. Kadang-kadang bisi maya pengeluar enda tetangkup peminta.
Taja pia, enda mayuh orang ti udah mujur nupi ikan tuman ngena chara dagang ketegal ti kurang ngembuan pengelandik pasal ikan tu.
( dibali ari Cik Rashidah Abdul Ghani,Harian Metro)
Manah blog nuan tu pengajar.Nagarpka nuan terus ngemansangka blog tu setipak enggau pemansang jaku Iban. Aku baru tetemuka blog.
BalasPadam