Motivasi Kedalih Nembiak

Penutus peresa PMR enggau STPM 2009 udah pansut. Bisi sekeda mujur bulih semua A.Tabi puji ngaai sida iya. Taja pia mayuh mega enda mujur lalu sida tu meh ke mesti dibantu enggau diperansang awakka enda kelalu tusah ati enggau pemutus peresa sida nya.

Bisi empat kategori nembiak pil:

1. Nembiak ke endang rajin belajar sereta bekenanas tang pil mega. Sida tu pil enda bulih semua A. Nya meh jaku ke madahka sida nya pil.

2. Nembiak ke endang enda bebebendar sereta ngelusu belajar lalu pil meh sida nya. Sida tu endang udah nemu diri enda pas.Pekara baka tu nyadi laban ari perangai, chara sida begulai tauka sapa enggau sida bekaling, kelalu deka merindang ati, penaggul ba ruang bilik enggau mayuh agi ke bukai. Sida tu mesti dikaunseling enggau mesti enggau orang ba program motivasi.

3. Nembiak ke pil ketegal enda ulih lati dalam akademik.Sida baka tu laban untak tauka darah sida endang ba bidang enggau pengelandik bukai. Bisi sida tu bekenanas belajar tang naka nya meh utai ulih sida iya. Nya alai anang meh kitai ngeransi sereta ngansak sida tu ngagai utai ke endang diluar ari pemndai untak sida iya. Kelala potensi sida ke bukai baka ba bidang lumba enggau main, pengelandik jari, landik ba komputer tauka ICT, main asal, pengawa dagang enggau ke bukai. Ngena chara baka nya sida tentu ulih mujur ba pengidup dudu hari.

 4. Nembiak ke endang sengaja ngemuntanka diri empu ngena kedalih diri empu baka enggai diau ba buding sekula, enggai belajar ba arus sains, ngena ngelaban penanggul ti nyadi antara sida enggau apai indai lalu besalah orang bukai.Raban nembiak ke baka tu endang enda tau enda dibantu ngena chara kaunseling.  Apai indai mega mesti sedar enti anak enggai diau ba buding anang mejal sida. Mayuh agi nembiak ke pulai hari ke bulih 8A  ba peresa SPM sida.

Kena ngeleda ari pemuntan baka tu, nembiak mesti bisi ngembuan pengerurus ati sereta tebuka ngiga nama kebuah sida bulih pemutus ke baka nya.

Enti endang udah bebendar tang pil mega:

- Nyangka laban ti kelalu belebih-lebih ngarapka diri ti ngujungka sida silap nyaut tanya maya peresa. Nya alai nembiak mesti belajar ari penyilap baka tu lalu peda sereta ulang beberapa kali saut ti udah ditulis kita maya peresa. Nya alai kitai mesti nemu penyilap endang selalu nyadi lebuh dalam peresa.

- Pil laban enda nemu teknik enggau strategi nyaut tanya peresa. Nembiak baka tu mesti enggau masuk program Motivasi enggau Pengelandik Belajar.

 - Nembiak mesti nemu Belajar Chara Labuh. Bisi nembiak ketegal enda pas peresa sampai ngaga ulah ke enda diterima akal baka munuh diri.  Pila dalam peresa ukai reti iya kitai puntan dalam pengidup.Nya meh kebuah nembiak mesti nemu balajar chara labuh:

Mesti nerima penetap ukai semua orang ulih bulih semua A

Nerima penetap pengelandik kitai nyangka ba tempat bukai

Ingat semina Petara ti nemu ngatur peneka iya.                                                            

Terima meh pemuntan nya nyadi ‘Stepping Stone’ ukai ‘Stopping Stone’.

Simpan ba semengat kitai ambika bulih pemutus ke lebih manah ba peresa ti deka datai.Bisi nembiak bulih 5A ba UPSR tang enda bulih 8A ba PMR. Bisi mega enda bulih semua A ba UPSR tang bulih semua A ba PMR. Nya alai, pemuntan kitai sehari tu nadai besangkut paut enggau pemutus ke ulih kitai dudi hari ila.  

Mesti belajar ari pun taun lalu anang betangguh nembuka pengawa ke mar diputar sereta tusah diperati.