Penanggul Rama Nembiak Sekula Kemaya Hari Tu.

                        Kemaya hari tu kitai besatup enggau mayuh macham penanggul  ti majak balat nuntung nembiak sekula.  Enti enda diputarka enggau jampat penanggul tu tau mai pengerusak enggau penusah ngagai  sida dudi hari.  Sekeda ari penanggul nya deka dipejuraika di baruh tu.

                         

                        Keterubah, penanggul tu bepun ba ruang bilik sida.  Sida beserekang penemu enggau diri sebilik baka apai indai tauka diri menyadi.  Ambika banding, lebuh diajar apai indai sida enggai ninga lalu ngelaban penemu nya. Sida  tu enda sepenemu laban tikas runding apai indai enggau sida ti jauh bebida. Kadang-kadang apai indai bejaku ngajar dikumbai nganu. Tu tau mai penusah nembiak rari ari rumah.

Ketegal ti kurang perati apai indai sida suah ngereja pengawa ti enda

menyana. Chunto ia,  bekaling enggau kaban ti ngereja ulah ti enda menuku baka nginsap, beinsapka gam enggau beambika dadah. Sida mega nyau kurang basa enggau apai indai.  Chunto ia, enda ninga jaku enti diasuh pulai bemain maya lemai hari,  sida enda nitihka maya ti ditetapka nya.

                        Kedua, penanggul ti datai ari kaling tauka bakih sida ti serebak.  Penanggul ti baka tu suah bepun ari nembiak ti enda tan ati dibai kaling sida ti kala ngereja pengawa ti enda menuku baka, nginsap, bejudi, enda datai ke sekula, belaya tauka gangster.  Penanggul tu tau amat mai pengerusak ke pejalai pengidup sida jemah ila.

                        Ketiga, penanggul ba pelajar.  Penanggul tu nyadi laban sida enda rindu ke pelajar sekula.  Bisi sekeda sida enda rinduka pengajar ti ngajar sida di sekula.  Sida ngumbai utai ti dipadahka pengajar nya nadai guna.  Nya ngujungka sida tinggal dalam pelajar ti patut ditemu sida ba maya nya.  Penanggul tu chukup ngemuntanka juluk ati sida empu, apai indai, menua enggau bansa.

                        Kelimpah ari nya, penanggu tau nyadi ari mensia mayuh ti enda mereti ke pengingin ati nembiak sekula.  Tu tau nyadi ketegal mensia mayuh ti enda ngambi berat ke anak urang bukai kelimpah anak diri empu.  Ba kitai,  anak urang ti ngereja penyalah nya enda besangkut paut enggau anak iya.  Pekara tu enda patut nyadi.  Nama penyadi enti anak kitai ti ngereja pengawa ti enda menuku nya?

                        Kepenudi, media massa endang mai penanggul ti besai ngagai nembiak sekula.  Sida iya kelalu amat deka meda televisyen, ninga radio macha majalah pemerindang, enggau salah nguna kereban ICT baka telefon binching, internet, video games, play station, enggau ti bukai. Chunto ia, nembiak kemaya hari tu kelalu bebas ngena kereban tu laban utai baka tu chukup senang dibeli ari kedai di serata dunya.

                       

Ari nya, semua kitai mesti selalu berati, ngambi berat, sereta besaup ngiga jalai mutar penanggul tu.  Enti penanggul tu enda diputarka ia tau amat mai pengerusak sereta penusah ke bansa kitai jemah ila.